រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅយប់ថ្ងៃទី០៩ ខែមីនា ឆ្នាំ២០២៤នេះ បានចេញសេចក្តីប្រកាសព័ត៌មាន ករណីវិវាទការងារនៅក្រុមហ៊ុន វ៉យ…
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅយប់ថ្ងៃទី០៩ ខែមីនា ឆ្នាំ២០២៤នេះ បានចេញសេចក្តីប្រកាសព័ត៌មាន ករណីវិវាទការងារនៅក្រុមហ៊ុន វ៉យ & ដាប់បលយូ ហ្គាមិន ។
ក្រសួងការងារ និងបណ្តុះបណ្តាលវិជា្ជជីវៈ បានឲ្យដឹងថា ការធ្វើបាតុកម្មរបស់កម្មករនិយោជិត នៃក្រុមហ៊ុន វ៉ាយ & ដាប់បែលយូ ហ្គាមិន ដែលមានអាសយដ្ឋាន ស្ថិតនៅផ្លូវចំការដូង(២១៧) ភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ នៅថ្ងៃទី៩ ខែមីនា ឆ្នាំ២០២៤នេះ បានឈានដល់ការបិទផ្លូវសាធារណៈ លេខ ២១៧ សង្កាត់ព្រែកជ្រៃ ខណ្ឌដង្កោ បង្កឱ្យមានការកកស្ទះចរាចរណ៍ និងប៉ះពាល់ដល់សណ្តាប់ធ្នាប់សាធារណៈ។ ក្រសួង សូមអំពាវនាវដល់កម្មករនិយោជិត អ្នកប្រឹក្សាយោបល់ផ្នែកច្បាប់ សហជីពមូលដ្ឋាន និងអ្នកពាក់ព័ន្ធផ្សេងទៀត ត្រូវបញ្ឈប់សកម្មភាពនេះ ជាបន្ទាន់ ហើយងាកមកស្វែងរកដំណោះស្រាយតាមផ្លូវច្បាប់ជាធរមាន ដើម្បីរក្សា
សណ្ដាប់ធ្នាប់សាធារណៈ និងផលប្រយោជន៍ប្រជាពលរដ្ឋទូទៅ ។
ក្រសួងការងារ និងបណ្តុះបណ្តាលវិជ្ជាជីវៈ ជម្រាបថា វិវាទការងារនៅក្រុមហ៊ុន វ៉ាយ & ដាប់បែលយូ ហ្គាមិន ជាករណីក្រុមហ៊ុនបិទទ្វារ ដោយថៅកែបានរត់ចោលរោងចក្រ ដែលត្រូវដោះស្រាយទៅតាមច្បាប់ ស្តីពីការងារ និងតាមច្បាប់ស្តីពីក្ស័យធន។ យោងតាមនីតិវិធីច្បាប់ ក្រសួងនឹងប្ដឹងក្រុមហ៊ុនទៅតុលាការ ដើម្បីស្នើសុំដីការចាត់ចែងរក្សាការពារទ្រព្យសម្បត្តិ និងដោះស្រាយលើបណ្តឹងអង្គសេចក្តី ដើម្បីអាចមានលទ្ធភាពទូទាត់ប្រាក់ឈ្នួល និងអត្ថប្រយោជន៍ផ្សេងៗ ជូនកម្មករនិយោជិតទាំងអស់ ។
ក្រសួង សូមរម្លឹកដល់អ្នកប្រឹក្សាយោបល់ផ្នែកច្បាប់ សហជីពមូលដ្ឋាន និងអ្នកពាក់ព័ន្ធផ្សេងទៀត ត្រូវស្វែងយល់ឱ្យបានច្បាស់អំពីវិធានច្បាប់ ប្រកបដោយវិជ្ជាជីវៈ និងមនសិការទទួលខុសត្រូវ ហើយមិនត្រូវឆ្លៀតឱកាសកេងចំណេញ ក្នុងរូបភាពណាមួយពីករណីវិវាទការងារនេះ តាមរយៈការបកស្រាយ និងធ្វើសកម្មភាពនានា ផ្ទុយពីខ្លឹមសារ និងគោលការណ៍ច្បាប់ឡើយ។ ជនទាំងឡាយណា ដែលព្យាយាមបកស្រាយច្បាប់ដោយមិនត្រឹមត្រូវ ក្នុងចេតនាបង្កឱ្យមានការតវ៉ាដោយខុសច្បាប់ ត្រូវទទួលខុសត្រូវចំពោះមុខច្បាប់ជាធរមាន ។
សូមជម្រាបដែរថា «កម្មករ-កម្មការិនីរោងចក្រY&W ជាង៤ពាន់នាក់ធ្វើបាតុកម្មបិទផ្លូវ» កម្មករ កម្មការិនីជាង៤ពាន់នាក់ ដែលបម្រើការងារនៅរោងចក្រ Y&W ដែលមានទីតាំងស្ថិតនៅតាមបណ្ដោយផ្លូវ២១៧ ជិតផ្សារព្រែកជ្រៃ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ បានប្រមូលផ្ដុំគ្នាដង្ហែរក្បួនធ្វើបាតុកម្មបិទផ្លូវ កាលពីវេលាម៉ោង៨ និង២០ព្រឹកថ្ងៃទី៩ ខែមីនា ឆ្នាំ២០២៤ ដើម្បីទាមទារលក្ខខណ្ឌការងារចំនួន ៥ចំណុច ។
ក្រុមកម្មករខាងលើ ក៏បានអះអាងផងដែរថា ប៉ុន្មានថ្ងៃមកនេះនៅសុខៗ ស្រាប់តែបាត់ខ្លួនថៅកែ ហើយ១ថ្ងៃក្រោយពីថៅកែបាត់ខ្លួន រោងចក្រក៏ផ្អាកដំណើរទាំងស្រុង ដោយពុំបានទូទាត់ប្រាក់ឈ្នួល និងអត្ថប្រយោជន៍ជូនកម្មករឡើយ ។
តាមប្រភពព័ត៌មានបានឲ្យដឹងថា រោងចក្រY&W នេះគឺជារោងចក្រកាត់ដេរសម្លៀកបំពាក់សម្រាប់កូនក្មេង ដែលមានកម្មករ កម្មការិនី បម្រើការងារសរុបជាង ៤ពាន់នាក់ ។ ហើយនៅព្រឹកថ្ងៃកើតហេតុខាងលើ ក្រោមការដឹកនាំដោយលោកជួន ប៊ុនថុល ប្រធានសហព័ន្ធសហជីពសេរី ដើម្បីកម្មករខ្មែរ កម្មករទាំងអស់ បាននាំគ្នាធ្វើតុកម្មបិទផ្លូវ ២កន្លែង។ ដោយមុនដំបូង បាននាំគ្នាឈរ រួចយករនាំងដែក និងតុឈើជាដើម ទៅដាក់បិទផ្លូវលេខ២១៧ ត្រង់ចំណុចមុខផ្សារព្រែកជ្រៃ ក្បែររោងចក្រ ដោយបិទទាំងគន្លងផ្លូវ ដែលចូល និងគន្លងចេញពីរាជធានីភ្នំពេញ តែម្ដង ។
ប្រភពព័ត៌មានដដែល បានប្រាប់ឲ្យដឹងបន្តទៀតថា ក្រោយពីបិទនៅត្រង់ចំណុចខាងលើនោះ រយៈពេលមួយសន្ទុះធំ ក្រុមបាតុករកម្មករនោះ បានកាន់បដារ ដែលសរសេរដោយដៃដង្ហែរក្បួនចេញពីចំណុចនោះ ដើរទៅបិទផ្លូវបំបែកជាបួនរវាងផ្លូវ៥០ម៉ែត្រ និងផ្លូវ២១៧ ភ្លើងស្ដុបព្រែកជ្រៃទៀត ប៉ុន្តែក្រោយពេលទៅដល់បិទផ្លូវបានបន្តិច ក៏បានរំសាយត្រលប់ចូលទៅកាន់រោងចក្រវិញ បន្ទាប់ពីអាជ្ញាធរ និងនគរបាលខណ្ឌដង្កោ រួមជមួយមន្ត្រី នៃក្រសួងការងារ ចុះទៅធ្វើការសម្របសម្រួលជាមួយកម្មករ រួចមក ។
ក្រុមកម្មករ បានប្រាប់ឲ្យដឹងថា ថៅកែរោងចក្របានបាត់ខ្លួន ឬក៏អាចនិយាយបានថា រត់គេចខ្លួន ចោលកម្មករ កាលពីថ្ងៃទី១ ខែមីនា ឆ្នាំ២០២៤ លុះ១ថ្ងៃក្រោយមក គឺនៅថ្ងៃទី២ ខែមីនា ស្រាប់តែរោងចក្រ ផ្អាកលែងដំណើរការ ទាំងដែលមិនបានប្រាក់ឈ្នួលខែចុងក្រោយ និងប្រាក់អត្ថប្រយោជន៍ផ្សេងៗ ជូនពួកគាត់ឡើយ។ បន្ទាប់មក ពួកគាត់បាននាំគ្នា ធ្វើការទាមទារនៅក្នុងរោងចក្ររយៈពេល៥ថ្ងៃ កន្លងមកហើយ ប៉ុន្តែគ្មានដំណោះស្រាយ ថៅកែអត់ចេញមុខដោះស្រាយ ទើបនៅព្រឹកថ្ងទី៩ ខែមីនានេះ ពួកគាត់ប្រមូលផ្ដុំគ្នា ធ្វើបាតុកម្មបិទផ្លូវ បែបនេះតែម្ដង ដើម្បីឲ្យខាងក្រសួងការងារ បានដឹង និងជួយដោះស្រាយជូនពួកគាត់ផង ។
កម្មករដដែល បានប្រាប់ឲ្យដឹងបន្តទៀតថា ខណៈនេះ ពួកគាត់ទាមទារ នូវលក្ខខណ្ឌការងារចំនួន ៥ចំណុច រួមមាន ៖
ទី១-ស្នើរសុំឲ្យភាគីរោងចក្រ បើកប្រាក់ឈ្នួលចុងក្រោយ តាមមាត្រា១១៦ នៃច្បាប់ការងារ។
ទី២-ស្នើរសុំឲ្យភាគីរោងចក្រ បើកប្រាក់ជួសការសម្រាកប្រចាំឆ្នាំ តាមមាត្រា១១៦-១១៧ នៃច្បាប់ការងារ។
ទី៣-ស្នើរសុំឲ្យភាគីរោងចក្រ បើកប្រាក់បំណាច់អតីភាព ដែលនៅសល់ តាមមាត្រា៩៨ថ្មី ប្រកាស៤៤៣។
ទី៤-ស្នើសុំឲ្យភាគីរោងចក្រ បើកប្រាក់ជូនដំណឹងមុន តាមមាត្រា៧៥-៧៧ -៧៩ ។
ទី៥-ស្នើរសុំឲ្យភាគីរោងចក្រ បើកប្រាក់សងជម្ងឺចិត្តជូនកម្មករ កម្មការិនី តាមមាត្រ៩១ថ្មី ៕
ចែករំលែកព័តមាននេះ