ខេត្តសៀមរាប ៖ ក្រោយឃើញរូបភាព Poster មួយសន្លឹកនេះហើយ មហាជនខ្មែរលើបណ្តាញសង្គមបានរិះគន់យ៉ាងចាស់ដៃ ដោយសម្តែងប្រតិកម្មបែបខឹងសម្បារ ហើយសូម្បីតែពលរដ្ឋថៃ ក៏កំពុងមានចម្ងល់ដូចគ្នា ហេតុអ្វីរឿងភាគថៃដាក់រូបប្រាសាទខ្មែរ?
យ៉ាងណាក៏ដោយ ភ្លាមៗគេនៅនៅមិនទាន់ឃើញភាគីខាងទស្សន៍ប៉ុស្តិ៍លេខ៣ថៃ ចេញមុខមកបញ្ជាក់បកស្រាយពីមូលហេតុនៅពីក្រោយ Posterមួយនេះនៅឡើយទេ ប៉ុន្តែមហាជនខ្មែរ ដាក់ការសង្ស័យថា បើសិនជារូបខ្លោងទ្វារប្រាសាទក្នុង Posterនេះ ពិតជាខ្លោងទ្វារប្រាសាទតាសោមពិតមែននោះ ប្រហែលជាភាពយន្តថៃមួយរឿងនេះ អាចត្រូវបានទូទស្សន៍ប៉ុស្តិ៍លេខ៣ថៃ បានមកថតនៅប្រាសាទខ្មែរមួយនេះក្នុងទឹកដីខេត្តសៀមរាប ប្រទេសកម្ពុជា ឬ ក្នុងសាច់រឿងនេះអាចរៀបរាប់ទាក់ទងនឹងខ្មែរ។
គួរកត់សម្គាល់ថា នេះមិនមែនជារឿងថៃដំបូងបង្អស់ទេ ដែលប៉ុស្តិ៍ទូរទស្សន៍ថៃបានយករូបប្រាសាទរបស់ខ្មែរទៅដាក់ Poster ផ្សព្វផ្សាយភាពយន្តរបស់ខ្លួន ហើយដែលភាគច្រើន គឺភាពយន្តបុរាណ និងរឿងដែលនិយាយអំពីប្រវត្តិសាស្ត្រ ។
តាមរយៈរូបភាព Poster ដែលបង្ហោះដោយផេក Facebook និង Instagram ដោយប៉ុស្តិ៍លេខ៣ថៃនេះ គេអាចកំណត់ថា ជាខ្លោងទ្វារខាងកើតនៃប្រាសាទតាសោមដែលមានដើមត្រាំង ដុះគ្របពីលើ ប៉ុន្តែគួរឱ្យសោកស្តាយ ដើមត្រាំងនោះងាប់ជាស្ថាពរហើយ កាលពីដើមខែមីនា ឆ្នាំ២០២៤នេះ។
ប្រាសាទតាសោម ត្រូវបានចាត់ទុកថា ជាប្រាសាទមួយមិនសូវមានអ្នកស្គាល់ និងទៅដល់ទីនោះឡើយ ខណៈដែលប្រាសាទតូចមួយនេះលាក់ខ្លួននៅកណ្តាលព្រៃយ៉ាងស្ងប់ស្ងាត់ ដែលស្ថិតនៅតាមផ្លូវវង់ធំ ខាងកើតប្រាសាទនាគព័ន្ធ មានចំងាយប្រមាណជា២៧គីឡូម៉ែត្រ ពីទីរួមខេត្តសៀមរាប ។
ប្រាសាទតាសោម ជាផ្នែកមួយនៃតំបន់រមណីយដ្ឋានអង្គរ ដែលជាតំបន់បេតិកភណ្ឌពិភពលោករបស់អង្គការយូណេស្កូ ហើយត្រូវបានគេស្គាល់ថា ជាប្រាសាទដែលនៅតែថែរក្សារចនាបទបានយ៉ាងល្អ ជាពិសេស គឺច្រកទ្វារចូលរបស់ប្រាសាទតែម្ដង។
គេច្រើនតែប្រៀបធៀបប្រាសាទតាសោមទៅនឹងប្រាសាទតាព្រហ្មដ៏ល្បីល្បាញ ព្រោះប្រាសាទទាំងពីរត្រូវបានសាងសង់ឡើងក្នុងពេលដំណាលគ្នា និងមានរចនាបទសំណង់ស្រដៀងគ្នា ដោយមានដើមឈើដុះចេញពីប្រាសាទ។ យ៉ាងណាក៏ដោយ ប្រាសាទតាសោមមានទំហំតូចជាង និងមិនសូវល្បី ហើយមិនសូវមានមនុស្សច្រើនស្គាល់ទេ ដែលធ្វើឱ្យប្រាសាទនេះក្លាយជាកន្លែងស្ងប់ស្ងាត់សម្រាប់អ្នកដែលចូលចិត្តផ្សងព្រេងមកតំបន់ប្រាសាទអង្គរប៉ុណ្ណោះ។
ប្រាសាទតាសោម ត្រូវបានកសាងក្នុងរជ្ជកាលព្រះបាទជ័យវរ្ម័នទី៧ នៅចុងសតវត្សទី១២ ដើមសតវត្សទី១៣ ក្នុងគោលបំណងធ្វើជាអគារព្រះពុទ្ធសាសនាមហាយានឧទ្ទិសដល់លោកេស្វរៈ ។សំណង់ប្រាសាទតាសោម ត្រូវបានសាងសង់ដោយថ្មភក់ និងថ្មបាយក្រៀមមានកំពែងខណ្ឌចែកចំនួន៣ជាន់ ហើយមានខ្លោងទ្វារចេញចូលចំនួនពីរបែរមុខទៅទិសខាងកើត និងទិសខាងលិច។
ខ្លោងទ្វារនីមួយៗមានលម្អដោយរូបព្រហ្មមុខបួនធំៗដូចគ្នាទៅនឹងប្រាសាទបន្ទាយក្តី និងប្រាសាទតាព្រហ្មដែរផង ខណៈដែលសំណង់ប្រាង្គកណ្តាលរំលេចដោយក្បាច់រចនាដ៏ច្រើន។
ទោះបីជាប្រាសាទនេះមានរូបចម្លាក់ និងស្ថាបត្យកម្មសំណង់ស្រស់ស្អាត មិនចាញ់ប្រាសាទនានាក្នុងតំបន់អង្គរក៏ពិតមែន ប៉ុន្តែចំនួនភ្ញៀវទេសចរដែលបានទៅទស្សនាមានចំនួនតិចតួចនៅឡើយ បើសិនជាប្រៀបធៀបជាមួយប្រាសាទក្បែរៗនោះ។
ឈ្មោះ: ប្រាសាទតាសោម
អ្នកកសាង: ព្រះបាទជ័យវរ្ម័នទី៧
កាលបរិច្ឆេទកសាង: សតវត្សទី១២
ឧទ្ទិសថ្វាយ: ព្រះពុទ្ធសាសនាមហាយាននិងលោកេស្វរៈ
ស្ថាបត្យកម្ម: រចនាបថបាយ័ន
ទីតាំង: ខេត្តសៀមរាប ប្រទេសកម្ពុជា ។
ដោយ៖ អោម ចែតច័ន្ទណារ៉ា
ចែករំលែកព័តមាននេះ