វិស័យធនាគារនៅកម្ពុជាមិនរង្គោះរង្គើអ្វីឡើយ ទោះបីជាស្ថានភាពនៃប្រាក់ចំណេញរបស់បណ្តាស្ថាប័នធនាគារ និងគ្រឹះស្ថានហិរញ្ញវត្ថុខ្លះមានការថយចុះក៏ពិតមែន ។ ជារួមវិស័យនេះនៅតែប្រសើរ ប៉ុន្តែសម្រាប់ពលរដ្ឋដែលជំពាក់ធនាគារឃើញថា មានបញ្ហាច្រើនជាងពីឆ្នាំមុនៗ។ តាមរបាយការណ៍របស់ធនាគារជាតិនៃកម្ពុជាបានឲ្យដឹងថា នៅកម្ពុជាកាលពីឆ្នាំ២០២៣ កន្លងទៅ…
វិស័យធនាគារនៅកម្ពុជាមិនរង្គោះរង្គើអ្វីឡើយ ទោះបីជាស្ថានភាពនៃប្រាក់ចំណេញរបស់បណ្តាស្ថាប័នធនាគារ និងគ្រឹះស្ថានហិរញ្ញវត្ថុខ្លះមានការថយចុះក៏ពិតមែន ។ ជារួមវិស័យនេះនៅតែប្រសើរ ប៉ុន្តែសម្រាប់ពលរដ្ឋដែលជំពាក់ធនាគារឃើញថា មានបញ្ហាច្រើនជាងពីឆ្នាំមុនៗ។
តាមរបាយការណ៍របស់ធនាគារជាតិនៃកម្ពុជាបានឲ្យដឹងថា នៅកម្ពុជាកាលពីឆ្នាំ២០២៣ កន្លងទៅ គឺមានធនាគារពាណិជ្ជសរុប៥៨ស្ថាប័ន ធនាគារឯកទេស៩ គ្រឹះស្ថានមីក្រូហិញ្ញវត្ថុ ទទួលប្រាក់បញ្ញើ៤ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ៨៣ គ្រឹះស្ថានឥណទាន ជនបទ១១៤ និងស្ថាប័នសេវាកម្មហិរញ្ញវត្ថុផ្សេងៗទៀត ។
ប្រភពដដែលបានឲ្យដឹងថា ទ្រព្យសកម្មរបស់ប្រព័ន្ធធនាគារមានកំណើន៨,៦ភាគរយ ដែលមានតម្លៃប្រមាណជា៨៤,៣ពាន់លានដុល្លារ ។ ឥណទានអតិថិជនកើនឡើង៤,៨ ភាគរយ គឺប្រមាណជា៥៧,៦ ពាន់លានដុល្លារ ហើយប្រាក់បញ្ញើអតិថិជនមានកំណើនប្រមាណជា១៣,១ភាគរយ មានតម្លៃសរុប ៤៧,៩ពាន់លានដុល្លារ ហើយដើមទុនស្ថាប័នទាំងនោះមានកំណើន១០,៦ភាគរយ ដល់៩,២ពាន់លានដុល្លារ ។
ប្រភពដដែលបានបន្តថា ទោះបីជាទទួលរងសម្ពាធពីស្ថានភាពនៃការរិតត្បិតហិរញ្ញវត្ថុពីខាងក្រៅភាពមិនច្បាស់លាស់ដោយសារតែភាពតានតឹងភូមិសាស្ត្រនយោបាយ និងការកើនឡើងឥណទានមិនដំណើរការ ក៏ប្រព័ន្ធធនាគារបន្តរក្សាបានស្ថិរភាព និងភាពធន់ ។
នេះ គឺជាស្ថានភាពពិតប្រាកដរបស់វិស័យហិរញ្ញវត្ថុនៅកម្ពុជា ប៉ុន្តែនៅក្នុងរបាយការណ៍បានបង្ហាញថា ចំណុចមួយដែលយើងត្រូវតែយកចិត្តទុកដាក់ គឺការកើនឡើងនូវអនុបាតនៃឥណទានមិនដំណើរការ ។ ការកើនឡើងនូវអនុបាតនៃឥណទានមិនដំណើរការ គឺជាចំណុចដែលបញ្ជាក់ពីស្ថានភាពរបស់ប្រជាពលរដ្ឋកម្ពុជាផងដែរ ហើយក៏ជាមូលហេតុមួយដែលនាំឲ្យប្រាក់ចំណេញរបស់ធនាគារមួយចំនួននៅកម្ពុជាមានការថមថយចុះ ។
របាយការណ៍ដដែលបានបញ្ជាក់យ៉ាងច្បាស់ថា អនុបាតឥណទានមិនដំណើរការនៅកម្ពុជា បានកំពុងតែបន្តកើនឡើង ទន្ទឹមនឹងការថមថយកំណើនឥណទាន ។ ទោះបីជាអនុបាតនេះ ធនាគារជាតិនៃកម្ពុជាបានអះអាងថា បន្តស្ថិតនៅក្នុងកម្រិតអាចគ្រប់គ្រងបានក៏ពិតមែន ប៉ុន្តែវា គឺជាសញ្ញាមួយដែលបញ្ជាក់ថា អ្នកដែលប្រើប្រាស់ឥណទាន ហើយនិយាយឲ្យចំ ទៅ គឺកូនបំណុលរបស់ស្ថាប័នហិរញ្ញវត្ថុនានាដែលមិនមានលទ្ធភាពសងបំណុល គឺមានកំណើនខ្ពស់ខុសពីធម្មតា ។ អនុបាតនៃឥណទានមិនដំណើរការក្នុងវិស័យធនាគារនៅក្នុងប្រទេសមានកម្រិតឡើងដល់ ៥,៤ភាគរយ ហើយនៅក្នុងវិស័យមីក្រូហិរញ្ញវត្ថុមានរហូតដល់កម្រិត៦,៧ភាគរយ ដែលជាកម្រិតមួយខ្ពស់ ។
ការកើនឡើងនៅអនុបាតនៃឥណទានមិនដំណើរការនេះ គឺសរបញ្ជាក់យ៉ាងច្បាស់ថា ប្រាក់ ចំណេញរបស់គ្រឹះស្ថានធនាគារនិងហិរញ្ញវត្ថុនៅក្នុងប្រទេសបានថយចុះ ដោយអនុបាតប្រាក់ចំណេញធៀបនឹងទ្រព្យសកម្ម និងអនុបាតប្រាក់ចំណេញធៀបនឹងមូលនិធិភាគទុននិករបស់វិស័យធនាគារ មានកម្រិត០,៧ភាគរយ និង៣,៨ ភាគរយ រៀងគ្នាថយចុះពី១,៤ភាគរយ និង៧ភាគរយ នៅក្នុងឆ្នាំ២០២២ ខណៈដែលវិស័យមីក្រូហិរញ្ញវត្ថុមានកម្រិត១,៥ភាគរយ និង៦ភាគរយរៀងគ្នាថយចុះពី៣ភាគរយ និង១៣,៦ភាគរយ ។
របាយការណ៍នេះមិនបានលម្អិតថា មានពលរដ្ឋប៉ុន្មានដែលរងគ្រោះហើយជាប្រភពនៃអនុបាតនៃឥណទានមិនដំណើរការនោះទេ ប៉ុន្តែគេដឹងថា វិស័យធនាគារ និងហិរញ្ញវត្ថុគ្រប់ប្រភេទ គឺមានកូនបំណុលសរុបប្រមាណជា២,២លានគណនី ។ នៅក្នុងនោះ ពួកគេអាចជាអ្នកដែលជាប់បំណុលនៅក្នុងសេវាកម្មលក់រាយដោយសារសន្ទស្សន៍អ្នកដែលជាប់បំណុលផ្នែកនេះ គឺមានប្រមាណជា១៧,៦ ភាគរយ ។ ហើយក៏អាចជាអ្នកដែលជាប់បំណុលទិញលំនៅស្ថានដែលមានចំណែកប្រមាណជា១៣,៥ភាគរយ, អ្នកជួញដូអចនទ្រព្យមាន ៩,៨ភាគរយ, កម្ចីជាបុគ្គល៩,៨ ភាគរយ សំណង់ប្រមាណជា៩,៥ភាគរយ ការជួញដូរដុំ៩ភាគរយ កសិកម្ម៩ ភាគរយ កម្មន្តសាល៤,៤ភាគរយ សណ្ឋាគារ និងភោជនីយដ្ឋាន៤ភាគរយ ៕ ដោយៈ ហេង ចេស្តារ
ចែករំលែកព័តមាននេះ