រាជធានីភ្នំពេញ ៖ អភិបាលខណ្ឌ ២រូប ត្រូវបានតែងតាំងជាប្រធានគណៈកម្មាធិការគណបក្សប្រជាជនកម្ពុជា គឺខណ្ឌមានជ័យ លោក សេង គន្ធ ជាប្រធានគណៈកម្មាធិការគណបក្សប្រជាជនកម្ពុជាខណ្ឌមានជ័យ និងលោក សក់ ច័ន្ទកញ្ញារិទ្ធ ប្រធានគណៈកម្មាធិការគណបក្សប្រជាជនកម្ពុជាខណ្ឌពោធិ៍សែនជ័យ ។
ពិធីប្រកាសតែងតាំងនេះ បានធ្វើឡើងនារសៀលថ្ងៃទី០៦ ខែមីនា ឆ្នាំ២០២៤នេះ ក្រោមអធិបតីភាព លោក ឃួង ស្រេងសមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ នៅមន្ទីរបក្ស រាជធានីភ្នំពេញ ។
លោក ឃួង ស្រេង ក្នុងឱកាសនោះ បានថ្លែង នូវការអរគុណចំពោះសមាជិក សមាជិកាគណបក្សប្រជាជនកម្ពុជាទាំងអស់ ដែលបានលះបង់អស់កម្លាំងកាយចិត្ត ដើម្បីគណបក្សប្រជាជនកម្ពុជា និងបានបោះឆ្នោត ជូនគណបក្សប្រជាជនកម្ពុជា ដែលធ្វើឲ្យគណបក្សប្រជាជនកម្ពុជា ទទួលបានជ័យជំនះ ក្នុងការដឹកនាំប្រទេសជាតិ រហូតមកដល់ពេលនេះ ។
លោក ឃួង ស្រេង បានស្នើឱ្យប្រធានគណៈកម្មការគណបក្សប្រជាជនកម្ពុជា ខណ្ឌទាំង២ បន្តយកចិត្តទុកដាក់ ថែរក្សាសន្តិសុខ សណ្តាប់ធ្នាប់សាធារណៈ ពិសេសធ្វើយ៉ាងណាឲ្យភូមិ សង្កាត់មានសុវត្ថិភាព។ បន្តរឹតបន្តឹងច្បាប់ចរាចរណ៍ បង្ក្រាបគ្រឿងញៀន និងល្បែងស៊ីសងខុសច្បាប់គ្រប់ប្រភេទ ទៅតាមអនុសាសន៍ ណែនាំរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី ។
លោក ឃួង ស្រេង ក៏បានជម្រុញអោយគណបក្សខណ្ឌសង្កាត់ ត្រូវផ្ដល់សេវា ជូនប្រជាពលរដ្ឋឲ្យបានលឿន និងមានតម្លាភាព ដើម្បីអោយប្រជាពលរដ្ឋ គោរពស្រលាញ់ ហើយបោះឆ្នោតជូនគណបក្សប្រជាជនកម្ពុជា ដើម្បីអោយគណបក្សប្រជាជនកម្ពុជា មានឱកាសអភិវឌ្ឍន៍ប្រទេស សម្រេចបាន នូវចក្ខុវិយ អោយក្លាយជាប្រទេស ដែលមានចំណូលមធ្យមកម្រិតខ្ពស់ នៅឆ្នាំ ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០ ។
គួរបញ្ជាក់ថា លោក សេង គន្ធ សមាជិកគណបក្សប្រជាជនកម្ពុជា ត្រូវបានតែងតាំជាប្រធានគណៈកម្មាធិការគណបក្សប្រជាជនកម្ពុជាខណ្ឌមានជ័យ ជំនួសលោក ហែម ដារិទ្ធ ដែលត្រូវទៅបំពេញការងារនៅខេត្តផ្សេង។ ចំណែកឯលោក សក់ ច័ន្ទកញ្ញារិទ្ធ សមាជិកគណៈបក្សប្រជាជនកម្ពុជា ត្រូវបានតែងតាំងជាងប្រធានគណៈកម្មាធិការគណបក្សប្រជាជនកម្ពុជាខណ្ឌពោធិ៍សែនជ័យ ជំនួសលោក ក្រូច ផាន ដែលចាស់នឹងសុំចូលនិវត្ត ។
លោក សក់ ច័ន្ទកញ្ញារិទ្ធ ក្នុងឱកាសនោះបានប្ដេជ្ញាចិត្តគាំទ្រ សម្ដេចតេជោ ហ៊ុន សែន ជាប្រធានគណបក្សប្រជាជនកម្ពុជារហូត ។
ប្តេជ្ញាចិត្តគោរពច្បាប់ បំពេញការងារអោយបានល្អឆ្លើយតបទៅនឹងតម្រូវការរបស់ប្រជាពលរដ្ឋ នៅក្នុងមូលដ្ឋាន អនុវត្តនៅអភិក្រម អភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ។
ប្តេជ្ញាបម្រើសេវាជូនប្រជាពលរដ្ឋឲ្យបានលឿននិងមានតម្លាភាព ពង្រឹងសាមគ្គីភាពផ្ទៃក្នុងឱ្យបានល្អ។ ពង្រឹងការអនុវត្តធ្វើអោយភូមិសង្កាត់ មានសុវត្ថិភាព ។
ប្ដេជ្ញាកសាងសមាជិកបក្សទៅតាមផែនការរបស់គណបក្ស និងគៀងគរ សមាជិកគណបក្សអោយបានច្រើន ដោយសមាជិកម្នាក់សន្លឹកឆ្នោតមួយសន្លឹក ៕
ចែករំលែកព័តមាននេះ