ខេត្តក្រចេះ ៖ បច្ចុប្បន្ននេះ សកម្មភាពនៃការដឹកជញ្ជូនថ្មម៉ាបតាមបណ្តាក្រុមហ៊ុនផ្សេងៗក្នុងខេត្តក្រចេះនៅតែបន្តកើតមានយ៉ាងអនាធិបតេយ្យ បើទោះបីជាកន្លងមក អជ្ញាធរខេត្តក្រចេះធ្លាប់ចេញសេចក្តីប្រកាសអោយសមត្ថកិច្ចពាក់ព័ន្ធ អោយមានការត្រួតពិនិត្យយ៉ាងណាក្តី ករណីដឹកជញ្ជូនថ្មម៉ាបធំៗតាមផ្លូវជាតិលេខ៧ឆ្លងកាត់ខេត្តក្រចេះ ឆ្ពោះទៅកាន់ព្រំដែនវៀតណាមត្រូវបានគេឃើញថា ការផ្ទុកថ្មហាក់ដូចជាពុំបានត្រឹមត្រូវតាមណែទេ ។
លក្ខណៈទាំងអស់នេះហើយ ដែលជារឿយៗតែងតែបង្កការគ្រោះថ្នាក់ចរាចរណ៍ ក៏ដូចជារអិលធ្លាក់ពីលើរថយន្តមកលើផ្លូវជាតិ ក៏ដូចជាប្រជាពលរដ្ឋអាស្រ័យលើដងផ្លូវនេះ ដែលបង្កឲ្យមានរបួសស្នាមកន្លងមក ។
បើយោងតាមការជូនដំណឹងស្ដីពីការដឹកជញ្ជូនថ្មអាលើដងផ្លូវរបស់រដ្ឋបាលខេត្តក្រចេះ កាលពីថ្ងៃទី១ ខែកញ្ញា ឆ្នាំ២០២៣កន្លងទៅ ក៏បានបញ្ជាក់ឲ្យដឹងដែរថា ដោយបានសង្កេតឃើញថា ក្រុមហ៊ុនសហគ្រាស ធ្វើអាជីវកម្មធនធានរ៉ែ ក្នុងភូមិសាស្ត្រខេត្តក្រចេះ ដែលបានដឹកជញ្ជូនផលិតផលថ្មអារលើដងផ្លូវ ដើម្បីឆ្ពោះទៅកាន់គោលដៅនានា ក្នុងគោលបំណងធ្វើពាណិជ្ជកម្មរបស់ខ្លួន បានបង្កឲ្យមានផលប៉ះពាល់ដល់ សណ្តាប់ធ្នាប់សាធារណៈ ក៏ដូចជាគ្រោះថ្នាក់ចរាចរណ៍ និងខូចខាតផ្លូវជាដើម ដែលករណីនេះបណ្តាលឲ្យខាតបង់ដល់ផលប្រយោជន៍ជាតិ និងផលប្រយោជន៍សាធារណៈ ដែលបណ្តាលមកពីការវេចខ្ចប់ទំនិញមិនបានត្រឹមត្រូវតាមលក្ខណៈបច្ចេកទេស ។
រដ្ឋបាលខេត្តក្រចេះ បានណែនាំគ្រប់បណ្ដាក្រុមហ៊ុនថ្មអារដែលដឹកជញ្ជូនថ្មទៅកាន់ទីផ្សារផ្សេងៗដូចខាងក្រោម ៖
១-ក្រុមហ៊ុនថ្មអារទាំងអស់ ត្រូវដឹកជញ្ជូនទំនិញមិនឲ្យលើសទម្ងន់កំរិតកំណត់អតិប្បរមាដែលច្បាប់បានកំណត់ទៅតាមប្រភេទរថយន្ត ។ ត្រូវសរសេរស្លាកលេខរថយន្តសម្គាល់លើថ្មដែលដឹក ។
២-រថយន្តសម្រាប់ដឹកជញ្ជូនផលិតផលថ្មអារចេញពីក្រុមហ៊ុន ត្រូវមានទ្រុងដែលមានកម្ពស់ចាប់ពី០,៥០ម៉ែត្រ ។
៣-ការដឹកជញ្ជូនថ្មអារតាមរថយន្តត្រូវគោរពទៅតាមបទដ្ឋានបច្ចេកទេសអោយបានត្រឹមត្រូវ ដូចជាការចង រឹតដោយប្រើខ្សែកាបអោយបានជាប់ការប្រើកំណល់ដោយប្រើប្រាស់ឧបករណ៍ដែលប្រកបដោយសុវត្ថិភាព ។
៤-ក្រុមហ៊ុនដែលប្រើប្រាស់ផ្លូវត្រូវមានផែនការថែទាំ ជួសជុលផ្លូវជាប្រចាំដូចជា ការគៀរសម្រួល ការលុបជង្ហុក ការស្រោចទឹក ដើម្បីការពារសុខភាពសាធារណៈ និងកាត់បន្ថយគ្រោះថ្នាក់ចរាចរណ៍ដែលអាចកើតមានជាយថាហេតុ ។
៥-គ្រប់ការដ្ឋានទាំងអស់ត្រូវមានប៉ុស្តិ៍ប្រចាំការ ដើម្បីត្រួតពិនិត្យរថយន្តដែលត្រូវដឹកជញ្ជូនចេញឲ្យបាន ត្រឹមត្រូវតាមការណែនាំ ។
៦-មន្ត្រីមានសមត្ថកិច្ចពាក់ព័ន្ធ ត្រូវធ្វើការត្រួតពិនិត្យអោយបានហ្មត់ចត់ ចំពោះការដឹកជញ្ជូនផលិតផល ថ្មអារ ។ ក្នុងករណីពិនិត្យឃើញថា ក្រុមហ៊ុនមិនបានអនុវត្តតាមសេចក្ដីណែនាំខាងលើ ជំនាញនិងសមត្ថកិច្ចពាក់ព័ន្ធ ត្រូវមានវិធានការអនុវត្តតាមច្បាប់ និងបទប្បញ្ញត្តិផ្សេងៗដែលមានជាធរមាន ។
ពាក់ព័ន្ធករណីណែនាំរបស់រដ្ឋបាលខេត្តក្រចេះខាងលើនេះ ប្រជាពលរដ្ឋនិងមហាជនមើលឃើញថា បានផលមួយរយៈពេលខ្លីប៉ុណ្ណោះ ។ មកដល់ខែមីនា ២០២៤ សកម្មភាពដឹកជញ្ជូន គឺផ្ទុយពីការណែនាំចាប់ផ្ដើមកើតមានឡើងវិញ ។ ហើយពួកគាត់ឆ្ងល់ថា ការដឹកថ្មទាំងនេះ មានលក្ខណៈស្របច្បាប់ដែរឬទេ ហើយដឹកចេញពីក្រុមហ៊ុនមានអាជ្ញាប័ណ្ណត្រឹមត្រូវឬយ៉ាងណា ព្រោះកន្លងមក ឯកឧត្តមរដ្ឋមន្ត្រីក្រសួងរ៉ែនិងថាមពលក៏ធ្លាប់បានលើកឡើងពីបញ្ហានេះ ។
សូមបញ្ជាក់ថា ការដឹកជញ្ជូនថ្មម៉ាប ថ្មអាដុំធំៗរាប់តោនក្នុងភូមិសាស្ត្រខេត្តក្រចេះ ។ ចំពោះត្រើយខាងកើត គឺមួយចំនួនដឹកជញ្ជូនចេញពីរខាងតំបន់ត្រូនទៅកាន់ទីផ្សារ ដោយឆ្លងកាត់ទីរួមខេត្តទៅតាមស្រុកឆ្លូងនិងដឹកទៅក្រុមហ៊ុននៅភ្នំព្រិច ហើយបន្តទៅកាន់ឃ្លាំងអាកាត់ជ្រៀកក្បែរព្រំដែនវៀតណាមនៅស្រុកស្នួល ខេត្តក្រចេះ ដើម្បីដឹកបន្តទៅកាន់ឆ្លងដែនទៅវៀតណាមតាមចិត្តគ្មានការត្រួតពិនិត្យទេ ។
អ្នកខេត្តក្រចេះនិយាយថា ថ្មម៉ាបរបស់ខ្មែរត្រូវក្រុមហ៊ុនជាច្រើនមានខ្មែរឈរឈ្មោះឱ្យវៀតណាមអារច្រៀកដឹកជញ្ជូនទៅស្រុកវៀតណាមយូរឆ្នាំហើយដោយរលូន ។ ភ្នំដែលមានថ្មម៉ាបក្លាយជាវាលរាបដូចសមុទ្រទៅហើយ…មិនដឹងថា ស្របច្បាប់ដែរឬអត់ទេ?
បានទំនាក់ទំនងសុំការបំភ្លឺពីមន្ទីររ៉ែ និងថាមពលខេត្តដែរ តែគ្មានចម្លើយសោះ ហាក់ដូចមានអាថ៌កំបាំងពេកក្រៃ ។
ក្រុមហ៊ុនបានដឹកថ្មម៉ាបឆ្ពោះទៅស្រុកវៀតណាមយ៉ាងតិច១០ឆ្នាំជាងមកហើយ គឺកាត់ថ្មជាផ្ទាំង
ធំៗដូចទូកុងតឺន័រ ឆ្ពោះទៅស្រុកវៀតណាមដែលមានខ្មែរឈរឈ្មោះឱ្យថៅកែវៀតណាមដែលយើងមិនអាចស្វែងរកឈ្មោះបានឡើយ ។
មានព័ត៌មានបន្ថែម កោះសន្តិភាពនឹងផ្សាយជូនបន្ត ។
ចែករំលែកព័តមាននេះ