ADផ្ទាំងផ្សព្វផ្សាយពាណិជ្ជកម្ម

មហាសេដ្ឋីឥណ្ឌារៀបការកូនប្រុសលើកនេះធ្វើឱ្យកក្រើកពិភពលោក

2 ឆ្នាំ មុន

០២ ខែ មីនា ឆ្នាំ ២០២៤ ម៉ោង ២០:០៤

ទីក្រុងញូដេលី៖ សេដ្ឋីលេខមួយនៅឥណ្ឌាការកូនលើកនេះលេងដៃធំតែម្ដង, អញ្ជើញភ្ញៀវ១២០០នាក់ រួមទាំងតារាចម្រៀងពិភពលោកចូលរួមពិធីលៀងសាយភោជន៍មុនរៀបការ ឬព្រីវេតឌីង (pre-wedding)។ សេដ្ឋីប្រាក់ពាន់លានដុល្លាររបស់ឥណ្ឌា លោកមូកខេស អាំបានី (Mukesh…

ទីក្រុងញូដេលី៖ សេដ្ឋីលេខមួយនៅឥណ្ឌាការកូនលើកនេះលេងដៃធំតែម្ដង, អញ្ជើញភ្ញៀវ១២០០នាក់ រួមទាំងតារាចម្រៀងពិភពលោកចូលរួមពិធីលៀងសាយភោជន៍មុនរៀបការ ឬព្រីវេតឌីង (pre-wedding)។ សេដ្ឋីប្រាក់ពាន់លានដុល្លាររបស់ឥណ្ឌា លោកមូកខេស អាំបានី (Mukesh Ambani) ត្រៀមរៀបចំពិធីមង្គលការដ៏អធិកអធមរបស់កូនប្រុសគាត់នារដូវក្ដៅឆ្នាំនេះ។ គាត់បានអញ្ជើញសេដ្ឋីលំដាប់ពាន់លានដុល្លារមកពីគ្រប់ទិសទីជុំវិញពិភពលោកមកចូលរួម។

តាមមើលទៅ, រៀបការកូនប្រុសសេដ្ឋីឥណ្ឌាលើកនេះប្រហែលជាមិនចាញ់រៀបការកូនស្ដេចប្រ៊ុយណេប៉ុន្មានទេ។ គ្រាន់តែការកូនសេដ្ឋីឥណ្ឌារៀបចំធ្វើបីថ្ងៃ។ មានន័យថាខ្លីជាងការកូនស្ដេចប្រ៊ុយណេ។ គេរំពឹងថាភ្ញៀវដែលអញ្ជើញចូលរួមលើកនេះជាសេដ្ឋីប្រាក់ពាន់លានដុល្លារ, ប្រមុខរដ្ឋ, ប្រមុខរដ្ឋាភិបាល, តារាហូលីវូតរបស់អាមេរិក និងបូលីវូតរបស់ឥណ្ឌា។

លោកប៊ីលហ្គេតល្បីថាជាអ្នកដែលចាប់ចិត្តនឹងចរិតលក្ខណៈរបស់ជនជាតិឥណ្ឌា។ អ្នកធ្វើការធំៗ និងក្រុមអ្នកបច្ចេកទេសនៅក្រុមហ៊ុនម៉ៃក្រូសូហ្វភាគច្រើនជាជនជាតិឥណ្ឌាដែលត្រូវគេប្រសិទ្ធនាមថា «ស្ដេចអាយធី (IT)»

ពិធីនេះចាប់ផ្ដើមពីថ្ងៃសុក្រម្សិលមិញ ហើយនឹងបន្តរហូតថ្ងៃអាទិត្យស្អែក។ គេដឹងថានៅក្នុងបញ្ជីឈ្មោះភ្ញៀវដែលទទួលបានសំបុត្រអញ្ជើញក៏មានប្រធានក្រុមហ៊ុនម៉ៃក្រូសូហ្វ លោកប៊ីលហ្គេត, ប្រធានហ្វេសប៊ុក លោកម៉ាកហ្សាក់ខឺបឺក (Mark Zuckerberg) , លោកស្រីអ៊ីវ៉ាន់កា ត្រាំ (Ivanka Trump) ដែលត្រូវជាកូនស្រីលោកត្រាំ, នាយករដ្ឋមន្ត្រីប្រទេសកាតា, ព្រះមហាក្សត្រប្រទេសប៊ូតាន និងព្រះជាយា។

លោកស្រីអ៊ីវ៉ាន់ការ ត្រាំ (Ivanka Trump) កូនស្រីលោកដូណាល់ត្រាំ (រូបនារីដែលខ្ពស់រាប់ពីស្ដាំទៅឆ្វេងរូបទីបី)

រឹតតែពិសេសទៅទៀតនោះគឺកម្មវិធីកម្សាន្តដែលសម្ដែងដោយតារាចម្រៀងលំដាប់កំពូលពិភពលោក អ្នកនាងរីហាណា (Rihanna), អ្នកលេងសៀករហស្សកម្ម លោកដេវីដ ប្លេន (David Blaine) និងតារាចម្រៀងបូលីវូតល្បីៗជាច្រើនរូប។

សេដ្ឋីឥណ្ឌាអញ្ជើញតារាចម្រៀងលំដាប់ពិភពលោក អ្នកនាងរីហាណា មកចូលរួមសម្ដែង

ពិធីនេះរៀបចំនៅទីក្រុងចាំណាហ្កា (Jamnagar) មានមនុស្សរស់នៅ៦សែននាក់។ ទីនេះជាស្រុកកំណើតរបស់សេដ្ឋីឥណ្ឌា និងជាទឹកដីចម្រុងចម្រើននៃមុខរបររកស៊ីរបស់គាត់។ និយាយទៅ, គាត់ប្រៀបដូចជាស្ដេចក្រាញ់នៅតំបន់ហ្នឹងតែម្ដង។

គូស្វាមីភរិយានាយកក្រុមហ៊ុនហ្វេសប៊ុក លោកម៉ាកហ្សាក់ខឺបឺក និងភរិយា

កាលពីថ្ងៃពុធសប្ដាហ៍នេះ, ក្រុមគ្រួសារសេដ្ឋីឥណ្ឌាត្រកូលអាំបានីបានរៀបចំពិធីពិសាភោជនាហារជូនជាង៥ម៉ឺននាក់ដែលជាអ្នកស្រុកអ្នកភូមិរស់នៅតំបន់នេះ។ ដូច្នេះ ថ្វីដ្បិតគាត់ក្លាយជាអ្នកមានកំពូល ប៉ុន្តែគាត់មិនភ្លេចកំណើតខ្លួនឯងដែលធ្លាប់រួមសុខរួមទុក្ខជាមួយអ្នកនៅទីនេះរហូតដល់គាត់មានថ្ងៃនេះ។ កូនប្រុសរបស់គាត់ អនន្ទ អាំបានី (Anant Ambani) អាយុ២៨ឆ្នាំជាគូនឹងនាងរ៉ាធីកា មើឆេន (Radhika Merchant) ដែលនឹងដឹកគ្នាចូលរោងការនាខែកក្កដា ឆ្នាំ២០២៤។

អ្នកទាំង២ស្រឡាញ់គ្នាយូរហើយ ហើយបានស្គាល់ចិត្តថ្លើមគ្នាក៏គ្រប់គ្រាន់ហើយដែរ។ គ្រួសារខាងកូនក្រមុំក៏ជាសេដ្ឋីឥណ្ឌាផងដែរ។ ដូច្នេះ គេរៀបការកូនប្រុស កូនស្រី និងចងដន្លងនឹងគ្នាសុទ្ធតែសេដ្ឋីដូចគ្នា។ គេរំពឹងថាភ្ញៀវដែលអញ្ជើញចូលរួមព្រីវេតឌីងលើកនេះមុខជាសប្បាយមួយអស់ដៃជាមិនខាន។

ពួកគេនឹងស្លៀកពាក់ប៉ឹងស្លឹកឈើរបៀបដូចជាពួកកុលសម្ព័ន្ធ។ ប៉ុន្តែស្លៀកស្លឹកឈើពីសម្បកក្រៅ និងស្លៀកធម្មតាពីខាងក្នុង។ បន្ទាប់មក ពួកគេនឹងអញ្ជើញទៅទស្សនាមជ្ឈមណ្ឌលជួយសង្គ្រោះសត្វព្រៃដែលគ្រប់គ្រងដោយកូនកំលោះអនន្ទ អាំបានីផ្ទាល់តែម្ដង។

តំបន់អភិរក្សសត្វព្រៃនេះមានទំហំ១២០០ហិកតារជាទីជម្រកនៃពួកសត្វព្រៃដែលត្រូវការពារ និងថែរក្សា។ ពួកវាជាសត្វដែលត្រូវរបួស, សត្វដែលជិតផុតពូជ ឬសត្វដែលត្រូវគេធ្វើបាប។ ជាពិសេសសត្វដំរីសម្បូរជាងគេនៅក្នុងតំបន់អភិរក្សនេះ។ តើសេដ្ឋីឥណ្ឌារូបនេះមានទ្រព្យសម្បត្តិប៉ុន្មាន?

បើតាមការចុះផ្សាយរបស់ទស្សនាវដ្ដីហ្វប (Forbes) លោកមូខេស អាំបានីមិនត្រឹមតែជាសេដ្ឋីលេខ១នៅឥណ្ឌាទេ ប៉ុន្តែជាសេដ្ឋីកំពូលប្រចាំទ្វីបអាស៊ីតែម្ដង។ ប្រាក់ចំណូលសរុបពីសាជីវកម្មរបស់គាត់ក្នុងមួយឆ្នាំៗមួយរយពាន់លានដុល្លារ។ ប្រភពចំណូលធំបានមកពីប្រេង, ឧស្ម័ន, ទូរគមនាគមន៍ និងការលក់រាយ៕

ប្រភព៖ Associated Press
https://apnews.com/article/india-tycoon-mukesh-ambani-sons-prewedding-bash-5a3900a0fe8604c9a16186ccfa9fec3f