កន្លងមក បងប្អូនប្រជាពលរដ្ឋខ្មែរយើងតែងមានការលើកឡើងថា មិនដឹងត្រូវត្រៀមឯកសារអ្វីខ្លះនោះទេ នៅពេលត្រូវការបន្ថែមសមាជិកក្នុងសៀវភៅគ្រួសារ ខណៈបងប្អូនខ្លះក៏ត្រូវការលុបសមាជិកក្នុងសៀវភៅគ្រួសារផងដែរ ។ តែពេលនេះ គឺអស់បារម្ភទៀតហើយ ចំពោះបងប្អូនប្រជាពលរដ្ឋដែលមានបំណងចង់ធ្វើការបន្ថែមសមាជិក ឬលុបចេញក្នុងសៀវភៅស្នាក់នៅ…
កន្លងមក បងប្អូនប្រជាពលរដ្ឋខ្មែរយើងតែងមានការលើកឡើងថា មិនដឹងត្រូវត្រៀមឯកសារអ្វីខ្លះនោះទេ នៅពេលត្រូវការបន្ថែមសមាជិកក្នុងសៀវភៅគ្រួសារ ខណៈបងប្អូនខ្លះក៏ត្រូវការលុបសមាជិកក្នុងសៀវភៅគ្រួសារផងដែរ ។
តែពេលនេះ គឺអស់បារម្ភទៀតហើយ ចំពោះបងប្អូនប្រជាពលរដ្ឋដែលមានបំណងចង់ធ្វើការបន្ថែមសមាជិក ឬលុបចេញក្នុងសៀវភៅស្នាក់នៅ ដោយបងប្អូនគ្រាន់តែមានឯកសារចាំបាច់មួយចំនួនដែលសមត្ថកិច្ចតម្រូវ ។
បើតាមការចែករំលែករបស់ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករងនៃអគ្គនាយកដ្ឋានអត្តសញ្ញាណកម្មបានឱ្យដឹងថា ដើម្បីបន្ថែម ឬលុបសមាជិកក្នុងសៀវភៅគ្រួសារ បងប្អូនត្រូវប្រាកដថា មានឯកសារចាំបាច់ទាំងអស់នេះ ។
១-សម្រាប់ការបន្ថែមសមាជិកក្នុងសៀវភៅស្នាក់នៅ៖
សហព័ន្ធ ដែលយើងស្គាល់ជាទូទៅថា ប្តីឬប្រពន្ធ ត្រូវស្នើសុំបន្ថែមសមាជិកមកមន្ត្រីប៉ុស្តិ៍នគរបាលរដ្ឋបាលឃុំ សង្កាត់ ដោយមានការបញ្ជាក់អំពីមូលហេតុនៃការស្នើសុំ និងភ្ជាប់ឯកសារណាមួយមានដូចខាងក្រោម៖
• កូនទើបកើតត្រូវមានសេចក្តីចម្លងសំបុត្រកំណើត ឬសំបុត្របញ្ជាក់កំណើត
• ក្នុងករណីអ្នកទើបរៀបអាពាហ៍ពិពាហ៍ត្រូវភ្ជាប់ជាមួយសេចក្តីចម្លងសំបុត្រអាពាហ៍ពិពាហ៍ ឬសំបុត្របញ្ជាក់អាពាហ៍ពិពាហ៍
• កូនស្មុំ ត្រូវមានសាលក្រមតុលាការ
បន្ថែមពីករណីទាំង ៣ ខាងលើ សម្រាប់ការបន្ថែមសមាជិកក្នុងសៀវភៅស្នាក់នៅ ក្នុងករណី៖
• ផ្លាស់ចូលត្រូវមានលិខិតអនុញ្ញាតផ្លាស់ប្តូរលំនៅឋាន
• ចេញពីពន្ធនាគារត្រូវមានសាលក្រមដោះលែងពីតុលាការ និងដីកាដោះលែងពីពន្ធនាគារ
• សមាជិកគ្រួសារខ្មែរដែលវិលត្រឡប់មកពីក្រៅប្រទេសត្រូវមានលិខិតបញ្ជាក់អំពីការធានាអះអាងពីមេគ្រួសារ ឬសាក្សី។
មន្ត្រីប៉ុស្តិ៍នគរបាលរដ្ឋបាល ត្រូវសរសេរចូលក្នុងបញ្ជីគ្រួសារនិងសៀវភៅគ្រួសារនគរបាលរដ្ឋបាល ពិនិត្យ និងចុះហត្ថលេខាលើពាក្យស្នើសុំ រួចបញ្ចូនទៅអធិការនគរបាលក្រុង ស្រុក ខណ្ឌ ដើម្បីពិនិត្យ ចុះហត្ថលេខា និងបោះត្រាឈ្មោះនៅត្រង់ទម្រង់នៃទំព័រសៀវភៅ «ទទួលស្គាល់របស់សមត្ថកិច្ចមូលដ្ឋាន”ព្រមទាំងបោះត្រា “បានចុះស្ថិតិ” លើសៀវភៅគ្រួសារត្រង់ទម្រង់នៃទំព័រសៀវភៅ “ទំនាក់ទំនងជាមួយមេគ្រួសារ» រួចបញ្ជូនត្រឡប់ទៅប៉ុស្តិ៍នគរបាលរដ្ឋបាលតាមកាលកំណត់។
២.២- ការលុបឈ្មោះចេញពីសៀវភៅគ្រួសារ៖
សហព័ទ្ធ (ប្តីឬប្រពន្ធ) នៃគ្រួសារណាមួយ ត្រូវស្នើសុំលុបឈ្មោះសមាជិកមកមន្ត្រីប៉ុស្តិ៍នគរបាលរដ្ឋបាលឃុំ សង្កាត់ ដោយមានការបញ្ជាក់អំពីមូលហេតុនៃការស្នើសុំ និងភ្ជាប់ឯកសារណាមួយមានដូចខាងក្រោម៖
• ផ្តាច់សមគ្គសង្វាស់ ត្រូវមានសាលក្រមលែងលះ
• កូនដែលត្រូវឪពុក ម្ដាយកាត់កាល់ ត្រូវមានសាលក្រមកាត់កាល់
• ពលរដ្ឋខ្មែរលះបង់សញ្ជាតិ ត្រូវមានព្រះរាជក្រឹត្យលះបង់សញ្ជាតិខ្មែរ។
មន្ត្រីប៉ុស្តិ៍នគរបាលរដ្ឋបាល ត្រូវបោះត្រា “បានលុបឈ្មោះ ឬលះបង់សញ្ញាតិខ្មែរ សមាជិកក្នុងបញ្ជីគ្រួសារត្រង់ទម្រង់នៃទំព័របញ្ជី “ទំនាក់ទំនងជាមួយមេគ្រួសារ” ហើយដាក់ជូននាយប៉ុស្តិ៍នគរបាលរដ្ឋបាល ពិនិត្យនិងចុះហត្ថលេខាលើពាក្យស្នើសុំ រួចបញ្ជូនទៅអធិការនគរបាលក្រុង ស្រុក ខណ្ឌ ដើម្បីពិនិត្យ ចុះហត្ថលេខា និងបោះត្រាឈ្មោះនៅត្រង់ទម្រង់នៃទំព័រសៀវភៅគ្រួសារ “ទទួលស្គាល់របស់សមត្ថកិច្ចមូលដ្ឋាន ព្រមទាំងបោះត”បានលុបឈ្មោះ ឬលះបង់សញ្ជាតិខ្មែរ” លើសៀវភៅគ្រួសារត្រង់ទម្រង់នៃទំព័រសៀវភៅ “ទំនាក់ទំនងជាមួយ មគ្រួសារ” រួចបញ្ជូនត្រឡប់ទៅប៉ុស្តិ៍នគរបាលរដ្ឋបាលតាមកាលកំណត់។
យ៉ាងណាមិញសម្រាប់ករណីផ្សេងទៀតនៃការ លុបឈ្មោះចេញពីសៀវភៅស្នាក់នៅ គឺក្នុងករណី
• ស្លាប់ត្រូវមានសេចក្តីចម្លងសំបុត្រមរណភាព ឬសំបុត្របញ្ជាក់មរណភាព
• ផ្លាស់ចេញត្រូវមានលិខិតអនុញ្ញាតផ្លាស់ប្តូរលំនៅឋាន
• ជាប់ពន្ធនាគារ ត្រូវមានសាលក្រមផ្តន្ទាទោស
ហេតុនេះ បើបងប្អូនប្រជាពលរដ្ខមានបំណងចង់បន្ថែម ឬលុបសមាជិកក្នុងសៀវភៅគ្រួសារបងប្អូនត្រូវមានភ្ជាប់ឯកសារដូចបានជំរាបជូនខាងលើផងដែរ។ (ដោយ៖ ខឿន មរកត)
ចែករំលែកព័តមាននេះ