រាជធានីភ្នំពេញ ៖ អ្នកគាំទ្រចំពោះវិស័យបវរកញ្ញា បានសម្តែងការភ្ញាក់ផ្អើលជាខ្លាំង ក្រោយស្ងាត់ៗនៅគេហទំព័រផ្លូវការបវរកញ្ញាមួយបានប្រកាសពីការលាលែងតំណែងរបស់កញ្ញា ព្រះកាយចន្ទនោះ ។
មែនហើយ កាលពីកន្លងទៅ កញ្ញា ព្រះកាយចន្ទ ធ្លាប់បានប្រាប់ថា កញ្ញាចង់តំណាងអោយកម្ពុជាទៅប្រកួតនៅលើឆាកអន្តរ បង្ហាញសមត្ថភាព ទេពកោសល្យអ្វីដែលកញ្ញាមាន អោយបរទេសបានឃើញនោះ ហើយជាពិសេសទៀតកញ្ញាចង់បានបទពិសោធន៍ ក៏ដូចជា តាក់ទិចដែលកញ្ញាបានជួបទៅបង្ហាញកូនសិស្សរបស់កញ្ញាបានដឹងនៅមេរៀនទាំងនោះ ។
តាមរយៈគណនីមួយដែលបងប្អូនអាចស្គាល់ហើយ នោះគឺ Miss Grand Phnom Penh បានបង្ហោះដោយលើកឡើងថា « សេចក្តីប្រកាសស្ថាប័ន Miss Grand Phnom Penh សូមប្រកាសជាផ្លូវការកញ្ញា ព្រះកាយច័ន្ទ សូមលាលែងពីតំណែងពី Miss Grand Phnom Penh ដោយហេតុ ខណៈពេលនេះកញ្ញាមិនទាន់មានពេលវេលាគ្រប់គ្រាន់ ព្រោះមានភារកិច្ចផ្ទាល់ខ្លួនត្រូវបំពេញចាំបាច់ » ។
ក្រោយមានការប្រកាសថា ស្រីស្រស់ ព្រះកាយចន្ទបានលាលែងនោះ មហាជនអ្នកគាំទ្របានសម្តែងការសោកស្តាយ ខណៈពេលវេលាជាច្រើនដែលកញ្ញាបានតស៊ូ ជាមួយការប្រកួតមួយនេះ ដោយមហាជនខ្លះបានសម្តែងការសោកស្តាយដោយលើកឡើងថា « ខំថា Miss grandឆ្នាំនេះ តាមដានដាច់បាយដាច់ទឹកហើយ ដល់ពេលចឹងអស់អារម្មណ៍ »។ និងខ្លះទៀតបានលើកឡើងថា « ចប់បាត់ហើយខំដាក់ចិត្តដាក់កាយគាំទ្រពេញទំហឹង ព្រោះភ្នែកនេះសម្លឹងឃើញតែគាត់ម្នាក់ហេតុអីក៏បែបនេះ កុំអីកុំធ្វើឲ្យហ្វេនខកបំណងអីសុំចិត្តផងចុះ»។ និងខ្លះទៀតបានលើកឡើងថា « លែងគួរឲតាមដានបាត់ហើយជើងខ្លាំងទៅបាត់ហើយ»។
ក្រោយពីការខកចិត្តរបស់អ្នកគាំទ្រជាច្រើននោះ ស្រីស្រស់ព្រះកាយចន្ទ បានប្រាប់ថា កញ្ញាពិតមិនទាន់អាចធ្វើការបកស្រាយលំអិតបាននៅឡើយ ដោយមូលហេតុកញ្ញាជាប់កម្មវិធី តែអ្វីដែលកញ្ញាអាចជម្រាបបាន គឺពិតជាលាលែងពីតំណែងមួយនេះពិតមែន ដោយមូលហេតុអាចនឹងមិនទាន់មានពេលវេលាគ្រប់គ្រាន់ ព្រោះមានភារកិច្ចផ្ទាល់ខ្លួនត្រូវបំពេញចាំបាច់នោះ ដូច្នេះបន្តិចទៀតទើបកញ្ញានឹងលំអិតបន្ថែមជូន ។
គួរបញ្ជាក់ដែរថា កញ្ញា ព្រះកាយជាបេក្ខភាពដែលមានភាពលេចធ្លោ មានទាំងសមត្ថភាព ភាសា រូបសម្រស់ ក៏ដូចជាទេពកោសល្យសម្តែង និងការបង្ហាត់បង្រៀនកូនសិស្សអោយមានសមត្ថភាពដូចជារូបកញ្ញានោះ ។ ដូច្នេះសម្រាប់ព័ត៌មានបន្ថែម កោះសន្តិភាពនឹងធ្វើការលំអិតជូនបន្ត៕ ដោយ៖លីហួ គីមឆាយ និងសុខ វាសនា
ចែករំលែកព័តមាននេះ