ខេត្តស្ទឹងត្រែង ៖ ឡានដឹកឈើចំនួន២គ្រឿង ត្រូវបានបង្ក្រាបដោយកម្លាំងសមត្ថកិច្ចស្នងការរដ្ឋាននគរបាលខេត្ត ក្រោយដឹកឈើគ្មានលិខិតអនុញ្ញាតកាលពីយប់ថ្ងៃទី២០ កុម្ភៈ ២០២៤ ស្ថិតនៅភូមិណាអូង ឃុំអូរស្វាយ ស្រុកបុរីអូរស្វាយសែនជ័យ ។
ប្រភពព័ត៌មានអោយដឹងថា រថយន្តសាំងយ៉ុងចំនួន២គ្រឿងបានដឹកឈើកកោះពេញៗចេញពីភូមិញឺន គោលដៅឆ្ពោះទៅព្រំដែនឡាវ ក៏ត្រូវបានកម្លាំងសមត្ថកិច្ចចាប់ជាប់ និងអូសទៅរក្សាទុកនៅក្បែព្រំដែននោះ ដោយមិនបានសហការកសាងកំណត់ហេតុប្រគល់អោយមេព្រៃនោះ ។
ប្រភពបន្តថា រថយន្តដឹកឈើទាំង២គ្រឿងនោះ ត្រូវបានរក្សាទុកយ៉ាងស្ងៀមស្ងាត់់រយៈពេល៤ថ្ងៃហើយ បើគិតពីថ្ងៃចាប់យប់ទី២០ រហូតដល់ថ្ងៃទី២៤ កុម្ភៈ ២០២៤ នេះ ដោយសង្ស័យរកមុខសញ្ញាចរចាទេដឹង?
អ្នកច្បាប់និយាយថា ការចាប់បង្ក្រាបត្រូវរាយការណ៍ជូនព្រះរាជអាជ្ញា និងត្រូវសហការប្រគល់ជូនទៅជំនាញ បើកាលណាចាប់ហើយមិនសហការប្រគល់អោយជំនាញ គឺខុសនីតិវិធី ព្រោះសមត្ថកិច្ចគាត់មិនមែនជាមន្ត្រីជំនាញឡើយ ។
ពាក់ព័ន្ធករណីចាប់រថយន្តដឹកឈើទាំង២គ្រឿងនោះ សារព័ត៌មានបានសាកសួរទៅខាងសមត្ថកិច្ចជំនាញ ខ្លះដឹង ខ្លះទៀតមិនដឹង រហូតដល់ព្រឹកថ្ងៃទី២៤ កុម្ភៈ ២០២៤ នេះ ជំនាញមិនទាន់ទទួលបានព័ត៌មានណាមួយពីសមត្ថកិច្ចចាប់បង្ក្រាបនោះឡើយ ។
មន្ត្រីរដ្ឋបាលព្រៃថា ការបង្ក្រាបបទល្មើសយ៉ាងយូរ២៤ម៉ោង ត្រូវប្រគល់អោយជំនាញ ដើម្បីកសាងសំណុំរឿងតាមនីតិវិធី តែករណីចាប់រថយន្តដឹកឈើ២គ្រឿងនោះរក្សាទុកច្រើនថ្ងៃដោយមិនឃើញផ្តល់ព័ត៌មានមិនដឹងថា គេធ្វើការបែបណាដែរ !!!
មានព័ត៌មានបន្ថែម កោះសន្តិភាពផ្សាយជូនបន្ត ។
ចែករំលែកព័តមាននេះ