ខេត្តកំពង់ឆ្នាំង ៖ មេពូជត្រីចំនួន៥តោន ត្រូវបានលែងចូលទន្លេ និងដែនធម្មជាតិវិញ ខណៈរដូវបិទនេសាទបានឈានចូលដល់ ។ មេពូជត្រីចំនួន៥តោននេះគឺត្រូវបានលែងចូលដែនឡូត៍នេសាទលេខ៤ និងដែនឡូត៍លេខ៦ ។ ពិធីលែងមេពូជត្រីនេះបានធ្វើឡើងកាលពីថ្ងៃទី៣០ ឧសភា ២០១១ ក្រោមអធិបតីភាពលោកបណ្ឌិត ទូច ម៉ារីម អភិបាលខេត្តកំពង់ឆ្នាំង លោកបណ្ឌិតណៅ ធួក ប្រតិភូរាជរដ្ឋាភិបាលកម្ពុជា និងជាប្រធានរដ្ឋបាលជលផល និងមានការចូលរួមពីមន្ត្រីអធិការដ្ឋានរដ្ឋបាលជលផលខាងត្បូងបឹងទន្លេសាប មន្ត្រីខណ្ឌ ផ្នែកសង្កាត់ជលផល កំពង់ឆ្នាំងជាច្រើនរូបទៀត ។
លោកកែវ ថាយ នាយខណ្ឌរដ្ឋបាលជលផលកំពង់ឆ្នាំង បាននិយាយឱ្យដឹងថា នេះគឺជាការអនុវត្តនូវស្មារតីសារាចរណ៍ណែនាំរបស់ក្រសួងកសិកម្ម រុក្ខាប្រមាញ់ និងនេសាទ ហើយមន្ត្រីជលផលបានបំពេញកាតព្វកិច្ចទៅតាមស្មារតីនៃ កិច្ចសន្យារបស់ម្ចាស់ឡូត៍នេសាទទាំងពីរ ។ ការលែងមេពូជត្រីគឺជាការបង្ហាញនូវការយកចិត្តទុកដាក់របស់មន្ត្រីជំនាញ ដើម្បីធ្វើឱ្យមានភាពប្រសើរឡើងវិញនូវធានធានជលផលប្រកបដោយនិរន្តរភាព ។
លោកសោម ភិរុណ នាយរងខណ្ឌរដ្ឋបាលជលផលបានបង្ហាញតួលេខថា គិតមកត្រឹមថ្ងៃទី៣០ ឧសភា នេះ ការលែងមេពូជត្រីចូលដែនធម្មជាតិមានចំនួន១១តោនហើយ គឺលែងក្នុងឡូត៍ចំនួន៥ និងដាំព្រៃលិចទឹកចំនួន២ហិកតា រៀបចំកន្លែងអភិរក្សមេពូជត្រីចំនួន៤កន្លែង និងបច្ចុប្បន្នកំពុងបន្តសកម្មភាពបែបនេះនៅតាមបណ្តាឡូត៍មួយចំនួនទៀតដែលមិនបានធ្វើ។
លោកក៏បានលើកឡើងថា ការលែងមេពូជត្រីចូលដែននេសាទនេះគឺមានសារសំខាន់ណាស់ សម្រាប់រដូវបិទនេសាទនេះ ត្រីវាបានចរាចរចូលកន្លែងសុវត្ថិភាពដើម្បីពងកូន ហើយការធ្វើបែបនេះរំពឹងថា ឆ្នាំក្រោយផលត្រីនឹងមានការកើនឡើងជាងឆ្នាំនេះទៀត មិនខាន។ លោកបានកត់សម្គាល់ថា ឆ្នាំនេះខេត្តកំពង់ឆ្នាំងទិន្នផលត្រីបានកើនឡើងដល់ទៅ៣០ភាគរយនៃឆ្នាំចាស់២០១០ ៕
ចែករំលែកព័តមាននេះ