រាជធានីភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃពុធ ទី២១ ខែកុម្ភៈ ឆ្នាំ២០២៤…
រាជធានីភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃពុធ ទី២១ ខែកុម្ភៈ ឆ្នាំ២០២៤ នេះ បានអនុញ្ញាតឱ្យគណៈគ្រប់គ្រង នៃមន្ទីរពេទ្យសាន់រ៉ាយ របស់ប្រទេសជប៉ុនប្រចាំនៅកម្ពុជា បានចូលជួបសំដែងការគួរសមនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ ដើម្បីស្វែងយល់ពីការបណ្តុះបណ្តាល និងការចុះកម្មសិក្សារបស់មន្ទីរពេទ្យ ដល់និស្សិតកម្ពុជា ។
ក្រោយការស្វាគមន៍របស់ឯកឧត្តមរដ្ឋមន្ត្រី លោក KAMATA Keiya ប្រធានក្រុមប្រឹក្សាភិបាល និងនាយកប្រតិបត្តិក្រុមហ៊ុនសាន់រាយ បានរាយការណ៍ពីសកម្មភាពរបស់ខ្លួន ដែលធ្វើសកម្មភាពរយៈពេល ៧ ឆ្នាំនៅកម្ពុជា លើសេវាកម្មសុខាភិបាល ។ នាយកប្រតិបត្តិរូបនេះ បានបន្តលើកឡើងពីការបណ្តុះបណ្តាលបុគ្គលិក និងសិក្ខាកាមកម្ពុជា ដែលមន្ទីរពេទ្យបានទទួលបណ្តុះបណ្តាល នៅក្នុងប្រទេស និងការបណ្តុះបណ្តាលនៅប្រទេសជប៉ុន តាំងពីឆ្នាំ២០១៧ រហូតដល់ឆ្នាំ២០២៤ នេះ ។
ជាមួយគ្នានេះ ឯកឧត្តមរដ្ឋមន្ត្រី បានវាយតម្លៃខ្ពស់ ចំពោះសកម្មភាពមនុស្សធម៌ ដែលមន្ទីរពេទ្យបានធ្វើសកម្មភាព តាមរូបភាពផ្សេងៗក្នុងសង្គម ជាពិសេសការបណ្តុះបណ្តាលជំនាញតាមរយៈកម្មសិក្សាដល់ និស្សិតកម្ពុជាឱ្យទទួលបានជំនាញ សីលធម៌ និងវប្បធម៌ធ្វើការបែបទំនើបរបស់ជប៉ុនផងដែរ ។
បន្ថែមពីនេះ ឯកឧត្តមរដ្ឋមន្ត្រី បានគូសបញ្ជាក់ ពីការអនុវត្តតាមកាតព្វកិច្ចរបស់មន្ទីរពេទ្យជប៉ុននៅកម្ពុជា ក្នុងនាមជាវិស័យឯកជន ដែលអនុឡោមទៅតាមច្បាប់ការងារ ដែលបានចែងស្តីពីកាតព្វកិច្ចហ្វឹកហ្វឺនកូនជាង ដែលជាកិច្ចការងារអាទិភាពមួយរបស់ក្រសួង និងរាជរដ្ឋាភិបាលកម្ពុជាក្នុងអាណត្តិទី៧ នេះ និងជាអនុសាសន៍មួយ ក្នុងចំណោមអនុសាសន៍របស់សម្តេចធិបតី មកកាន់ក្រសួងការងារ ដែលមានគោលបំណងផ្តល់ការហ្វឹកហ្វឺន និងបំពាក់បំប៉នជំនាញ ធ្វើដល់សិស្ស និស្សិតលើការងារជាក់ស្តែង និងឱកាសទទួលបានការងារធ្វើទៀតផង ៕ អត្ថបទសហការ
ចែករំលែកព័តមាននេះ