ADផ្ទាំងផ្សព្វផ្សាយពាណិជ្ជកម្ម

Picture

រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ និង​អង្គការ​ LABS​ ជួប​ប្រជុំ​គ្នា​ ដើម្បី​ស្វែងរក​កិច្ចសហការ ​លើកកម្ពស់​ស្តង់ដារ​សុវត្ថិភាព ​និង​សុខភាព​ការងារ ​ឱ្យ​កាន់តែ​ប្រសើរ​បន្ថែម

1 ខែ មុន
  • ភ្នំពេញ

រាជធានីភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ នៅ​ថ្ងៃទី​២០ ខែកុម្ភៈ ឆ្នាំ​២០២៤​ នេះ…

រាជធានីភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ នៅ​ថ្ងៃទី​២០ ខែកុម្ភៈ ឆ្នាំ​២០២៤​ នេះ បាន​អនុញ្ញាត​ឱ្យ​លោក Emerald AM នាយក​ប្រចាំ​ប្រទេស​នៃ​អង្គការ​ The Life And Building Safety(LABS)​ ដែល​ជា​អង្គការ​ជំនាញ​លើ​ផ្នែក​សុវត្ថិភាព​ សម្រាប់​និយោជិត​ក្នុង​រោងចក្រ​សហគ្រាស​ ចូល​ជួប​សំដែង​ការ​គួរសម និង​ពិភាក្សា​ការងារ​នៅ​ទីស្តីការក្រសួង​ការងារ និង​បណ្តុះបណ្តាល​វិជ្ជាជីវៈ​ ។

ជាបឋម​នាយក​ប្រចាំ​ប្រទេស​កម្ពុជា​ នៃ​អង្គការ​ LABS លោក Emerald AM បាន​ជម្រាប​ឯកឧត្តម​រដ្ឋមន្ត្រី​អំពី​គោលបំណង និង​ទស្សនវិស័យ ​នៃ​អង្គការ​របស់​ខ្លួន​ដែល​ជំរុញ​ឱ្យ​កាន់តែ​ប្រសើរ និង​ស្តង់ដារ​នូវ​ប្រព័ន្ធ​សុវត្ថិភាព ការ​បណ្តុះបណ្តាល​ស្តី​ពី​សុវត្ថិភាព​ ដើម្បី​កាត់​បន្ថយ​គ្រោះថ្នាក់ និង​ហានិភ័យ​ជា​ពិសេស​គ្រោះថ្នាក់​អគ្គិភ័យ​ ក្នុង​រោងចក្រ​សហគ្រាស ​។

ទន្ទឹម​នឹង​នេះ ឯកឧត្តម​រដ្ឋមន្ត្រី ក៏​បាន​ជម្រាប​ជូន​ភ្ញៀវ​អំពី​ផែនការ​សកម្មភាព​របស់​ក្រសួង​ ក្នុង​អាណត្តិ​ទី​ ៧​ ដែល​បាន​ផ្តល់​សារសំខាន់ និង​យកចិត្តទុកដាក់​ជា​អាទិភាព​លើ​សុវត្ថិភាព​កម្មករនិយោជិត​ ដែល​ស្រប​ទៅ​តាម​យុទ្ធសាស្ត្រ​បញ្ច​កោណ​របស់​រាជរដ្ឋាភិបាល​ ដើម្បី​ធានា​ពី​សុវត្ថិភាព​និង​សុខភាព​ការងារ​នៅ​កន្លែងធ្វើការ​ ។

បន្ថែម​ពី​នេះ ឯកឧត្តម​រដ្ឋមន្ត្រី ក៏​បាន​ជម្រាប​អង្គការ ​LABS​ អំពី​តួនាទី និង​ភារកិច្ច​ដាច់​ដោយឡែក​ពី​គ្នា​ នៃ​ក្រសួង ស្ថាប័ន​ពាក់ព័ន្ធ​របស់​រាជរដ្ឋាភិបាល​កម្ពុជា​ ចំពោះ​ករណី​សុវត្ថិភាព​អគ្គិភ័យ ​ក្នុង​រោងចក្រ​សហគ្រាស​ផង​ដែរ ​។

ជាមួយ​គ្នា​នេះ ឯកឧត្តម​រដ្ឋមន្ត្រី បាន​ជំរុញ​ឱ្យ​អង្គការ​ LABS អាច​បន្ត​ធ្វើការ​យ៉ាង​ជិត​ស្និទ្ធ​ជាមួយនឹង​នាយកដ្ឋាន​ជំនាញ ​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​ ដើម្បី​ពិភាក្សា និង​សិក្សា​លម្អិត​មើល​ពី​លទ្ធភាព​ នៃ​កិច្ចសហការ​ក្នុង​គោលបំណង​ជំរុញ​លក្ខខណ្ឌ​សុវត្ថិភាព និង​សុខភាព​ការងារ​ ដល់​និយោជិត​ក្នុង​រោងចក្រ សហគ្រាស​ឱ្យ​កាន់តែ​ប្រសើរ​ឡើង​បន្ថែម​ទៀត​ ដែល​ស្រប​ទៅ​នឹង​បំណង​របស់​រាជរដ្ឋាភិបាល​កម្ពុជា​ ដែល​បាន​គិតគូរ​សម្រាប់​ឧត្តម​ប្រយោជន៍ ​ទៅ​ដល់​កម្មករនិយោជិត​គ្រប់​ៗ​រូប​ ៕ អត្ថបទសហការ