ភរិយាលោកគ្រូសាំង សារឿន តួឯកល្ខោនបាក់សាក់ដ៏ឆ្នើម បញ្ជាក់ពីស្ថានភាពជំងឺស្វាមី
- ភ្នំពេញ
រាជធានីភ្នំពេញ ៖ រហូតមកដល់ពេលនេះ ស្ថានភាពជំងឺរបស់តួល្ខោនជើងចាស់ លោកគ្រូ សាំង សារឿ
0:00
0:00
រាជធានីភ្នំពេញ ៖ រហូតមកដល់ពេលនេះ ស្ថានភាពជំងឺរបស់តួល្ខោនជើងចាស់ លោកគ្រូ សាំង សារឿន បានធូរស្បើយតិចតួចប៉ុណ្ណោះ បន្ទាប់ពីរូបលោកត្រូវបានក្រុមគ្រួសារបញ្ជូនយកទៅសង្គ្រោះបន្ទាន់នៅក្នុងមន្ទីរពេទ្យមួយនាប្រទេសវៀតណាម កាលពីថ្ងៃទី១៧ ខែកុម្ភៈ ឆ្នាំ២០២៤ កន្លងទៅនេះ ។ គួររំលឹកថា លោកគ្រូសាំង សារឿន តួឯកល្ខោនបាសាក់ដ៏ឆ្នើម កំពុងសង្គ្រោះបន្ទាន់នៅមន្ទីរពេទ្យ
តាមការបញ្ជាក់របស់ក្រុមគ្រូពេទ្យពីជំងឺរបស់លោកគ្រូ សាំង សារឿន គឺទាមទារឱ្យមាន ការព្យាបាលនៅក្នុងរយៈពេលមួយយូរ ក្នុងពេលស្ថានភាពជំងឺកំពុងស្ថិតនៅក្នុងការតាមដានជាប្រចាំនៅឡើយ ។
ភរិយារបស់លោកគ្រូ សាំង សារឿន គឺអ្នកស្រី សួន ចន្ថា បានប្រាប់កោះសន្តិភាពតាមសារអេឡិចត្រូនិចថា បន្ទាប់ពីស្វាមីអ្នកស្រីបានមកសម្រាកព្យាបាលនៅក្នុងមន្ទីរពេទ្យនៃប្រទេសវៀតណាមនោះ រហូតមកទល់នាពេលនេះ ស្ថានភាពជំងឺគឺបានធូរស្បើយតិចតួចប៉ុណ្ណោះ ក្នុងពេលដែលស្វាមីអ្នកស្រីកំពុងបន្តសម្រាកព្យាបាលនៅក្នុងបន្ទប់សង្គ្រោះបន្ទាន់នៅឡើយ ។
អ្នកស្រីបន្ថែមថា ស្ថានភាពជំងឺរបស់ស្វាមីអ្នកស្រីនៅបន្តធ្វើទុក្ខ គឺមានអាការៈក្ដៅខ្លួន ចុកពោះ និងឈាមស្ទះម្ដងម្កាល ហើយជំងឺស្វាមីអ្នកស្រីដែលខ្លាំងជាងគេនោះគឺស្ទះសរសៃឈាមបេះដូង និងរលាកសួតធ្ងន់ធ្ងរ ។
អ្នកស្រីបញ្ជាក់ថា តាមការឱ្យដឹងពីក្រុមគ្រូពេទ្យតាមរយៈជំងឺរបស់ស្វាមីអ្នកស្រីនាពេលនេះគឺទាមទារការព្យាបាលរយៈពេលយូរ អាចរាប់ខែទើបអាចជាសះស្បើយ ។
ទោះបីយ៉ាងណា បើតាមអ្នកស្រី សួន ចន្ថា បានបញ្ជាក់ថា ប្រសិនបើការព្យាបាលមានរយៈពេលយូរបែបនេះ អ្នកស្រីនឹងសម្រេចយកស្វាមីទៅស្រុកខ្មែរវិញ ដោយសារអ្នកស្រីពុំមានលទ្ធភាពចំណាយលើការព្យាបាលនោះឡើយ ។
អ្នកស្រីបញ្ជាក់ថា រហូតមកទល់ពេលនេះ ការចំណាយលើការព្យាបាលជំងឺស្វាមីក្នុងរយៈពេលប៉ុន្មានថ្ងៃនេះគឺអស់ចំនួន៣ពាន់ដុល្លារហើយ ដែលនោះគឺជាថ្លៃចំណាយថវិកាផ្ទាល់ខ្លួន ។
ជាការកត់សម្គាល់ ក្នុងវ័យ៥៦ឆ្នាំ លោកគ្រូ សាំង សារឿន បានចាប់អាជីពជាតួសម្ដែងល្ខោនបាសាក់អស់ជាច្រើនឆ្នាំ និងជាតួសម្តែងល្ខោនបាសាក់ ក្នុងក្រុមល្ខោនបាសាក់ខេត្តកំពង់ចាម វង់ទី២ ដោយទស្សនិកជនជាច្រើនបានស្គាល់ និងដឹងពីទេពកោសល្យក្នុងការសម្ដែងរបស់លោក ហើយលោកក៏ជាគ្រូដែលបានបង្ហាត់បង្ហាញបង្រៀនសិល្បៈល្ខោនបាសាក់ផងដែរ ។
លោកគ្រូសាំង សារឿន មានស្រុកកំណើតនៅភូមិព្រែកព្នៅ ឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង ហើយលោកបានរៀបការជាមួយអ្នកស្រី សួន ចន្ថា នៅថ្ងៃទី១៩ ខែកុម្ភៈ ឆ្នាំ២០០០ ដែលមកដល់បច្ចុប្បន្ននេះ លោកគ្រូ និងភរិយាមានកូនប្រុសចំនួន៣នាក់ ៕
ចែករំលែកព័តមាននេះ