រាជធានីភ្នំពេញ ៖ កំពូលអ្នកប្រដាល់ប្រើស្នៀតកែង សេង មករា មកពីក្លឹបយុវកីឡាខេត្តកណ្តាល ចង់សាកកម្លាំងជាមួយមម៉ន គឹមឡុង មកពីក្លឹបព្រែកឯងកីឡា នៅសង្វៀនស្ថានីយទូរទស្សន៍ CTN នាថ្ងៃសៅរ៍ទី៤ ខែមិថុនាខាងមុខនេះ ដើម្បីចង់ដឹងថា តើអ្នកណាខ្លាំងជាងអ្នកណា។មិនមានអ្វីដែលចម្លែកឡើយសម្រាប់គូនេះ ព្រោះថាម្នាក់ជាអ្នកប្រដាល់ចាស់វស្សា និងម្នាក់ទៀតជាអ្នកប្រដាល់ស្រករក្រោយ ដូច្នេះទាំងសងខាងសុទ្ធតែចង់ដឹងពីល្បិចប្រកួតនៅលើសង្វៀនពីគ្នាទៅវិញទៅមកយ៉ាងនេះហើយ ។
សេង មករា អ្នកណាក៏គេទទួលស្គាល់ពីស្នៀតកែងនិងជង្គង់របស់គេដែរ ដែលអាចវាយចេញបានយ៉ាងមានប្រសិទ្ធភាពបំផុត គ្រាន់តែថាអ្នកប្រដាល់រូបនោះមានចរិតឆេវឆាវបន្តិចប៉ុណ្ណោះ ។ ស្នៀតកែងរបស់មករាល្អជាងស្នៀតជង្គង់ គឺរាល់ការវាយចេញមិនសូវឥតប្រយោជន៍ឡើយ គូប្រកួតរបស់គេភាគតិចណាស់ដែលថាមិនរងរបួសដោយសារតែស្នៀតកែង ហើយដេរអស់ជាច្រើនថ្នេរទៀតផង ។ ប៉ុន្តែលើកនេះមិនដឹងថា អាចទៅរួចនឹងស្នៀតកណ្តាប់ដៃរបស់គឹមឡុងឬយ៉ាងណានោះទេ ។ គឹមឡុង មានចរិតអត់ធ្មត់ ហើយថែមទាំងមានស្នៀតកណ្តាប់ដៃយ៉ាងល្អទៀតផង រីឯស្នៀតជើងក៏មិនអន់ដែរ។ គូនេះមានស្នៀតពិសេសម្យ៉ាងម្នាក់ ដូច្នេះគេអាចស៊ីសងគ្នាបាន តែត្រង់ថាអ្នកណាឈ្នះឬចាញ់មិនទាន់ដឹងឡើយ ។
នន់ ជំនិត មកពីក្លឹបមជ្ឈមណ្ឌលកំចាត់មីនកម្ពុជា ជួបប្រកួតជាមួយពុទ្ធ ឆាយរិទ្ធី មកពីក្លឹបពុទ្ធសេរីវង្សព្រែកតាទែន ។ រវាងគូនេះក៏មិនធ្លាប់ប៉ះគ្នាពីមុនមកដែរ ហើយបើប្រៀបធៀបទៅលើប្រវត្តិនៃការឡើងសង្វៀនវិញនោះជំនិតធ្លាប់មានមុខនៅលើសង្វៀនមុនឆាយរិទ្ធី ប៉ុន្តែបើធ្វើការប្រៀបធៀបពីល្បិចប្រយុទ្ធវិញគឺមិនលើសមិនខ្វះគ្នាឡើយ ។
ជំនិត មានល្បិចប្រយុទ្ធនៅលើសង្វៀនក្រាស់គួរសម ទាំងស្នៀតកែងនិងស្នៀតជង្គង់ក៏ល្អជាងឆាយរិទ្ធីដែរ តែគេអន់ខ្សោយខាងកម្លាំងបន្តិច ។ ចំណែកពុទ្ធ ឆាយរិទ្ធី មានកម្លាំងខ្លាំង មាឌនិងកម្ពស់ក៏មានប្រៀបជាងជំនិតបន្តិចដែរ ប៉ុន្តែចំណុចពិសេសនោះគឺពុទ្ធ ឆាយរិទ្ធី មិនអាចមើលស្រាលលើជំនិតបានឡើយ ព្រោះថាហ៊ានតែប្រហែសបន្តិចគឺវីវរធំជាមិនខាន ។
ឈិត ង៉ុយ មកពីសមាគមកីឡាប្រដាល់ក្រសួួងការពារជាតិ ជួប អាំង សំអាត មកពីក្លឹបតាព្រហ្មមានជ័យ ។ ថៃ ណារិន មកពីក្លឹបក្រុងប៉ោយប៉ែត ជួបសឿន សារ៉ាក់ មកពីក្លឹបវីអាយភីចំការមន ។ រីឯពេជ្រ សំរិទ្ធ មកពីក្លឹបអរុណរះកីឡា ប្រកួតជាលក្ខណៈសាកលអាជីព ជាមួយវ៉ែន ឌីយ៉ាម៉ង់ មកពីក្លឹបកងរាជអាវុធហត្ថរាជធានីភ្នំពេញ ៕
ចែករំលែកព័តមាននេះ