រាជធានីភ្នំពេញ ៖ អគ្គលេខាធិការអាជ្ញាធរជាតិ ប្រយុទ្ធនឹងជំងឺអេដស៍ បានអះអាងថា ស្រោមអនាម័យ គឺជាកំផែងដ៏រឹងមាំ ដែលអាចការពារមិនឱ្យមេរោគអេដស៍ ឆ្លងចូលក្នុងខ្លួនបាន ។…
រាជធានីភ្នំពេញ ៖ អគ្គលេខាធិការអាជ្ញាធរជាតិ ប្រយុទ្ធនឹងជំងឺអេដស៍ បានអះអាងថា ស្រោមអនាម័យ គឺជាកំផែងដ៏រឹងមាំ ដែលអាចការពារមិនឱ្យមេរោគអេដស៍ ឆ្លងចូលក្នុងខ្លួនបាន ។
លើកឡើងក្នុងទិវាស្រោមអនាម័យ អន្តរជាតិ ឆ្នាំ២០២៤ ដែលរៀបចំដោយអង្គការមូលនិធិ ថែទាំសុខភាពអ្នកជំងឺអេដស៍កម្ពុជា នៅថ្ងៃទី១៦ ខែកុម្ភ: ឆ្នាំ២០២៤នេះ លោកបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធ និងជំងឺអេដស៍ បានថ្លែងបញ្ជាក់ថា ស្រោមអនាម័យ គឺជាកំផែងដ៏រឹងមាំ ដែលអាចការពារមិនឱ្យមេរោគអេដស៍ ឆ្លងចូលក្នុងខ្លួនបាន ។
ទិវាស្រោមអនាម័យអន្តរជាតិ ឆ្នាំ២០២៤នេះ បានធ្វើឡើងនៅសាកលវិទ្យាល័យបៀលប្រាយ ខេត្តបាត់ដំបង ដោយមានការចូលរួមពីលោកស្រី សឿ សុជាតា អនុរដ្ឋលេខាធិការក្រសួងអប់រំយុវជន និងកីឡា លោក ទីន សារ៉ាវុធ អភិបាលរងខេត្តបាត់ដំបង និងជាប្រធានគណៈកម្មាធិការអេដស៍ខេត្តបាត់ដំបង លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍ រួមទាំងមានអ្នកចូលរួមប្រមាណ ៤០០នាក់ទៀតផងដែរ ។
លោកបណ្ឌិត ឈឹម ឃិនដារ៉េត បានបន្ថែមទៀតថា រាជរដ្ឋាភិបាលតែងតែគិតគួរជាចម្បងលើសុខភាពរបស់ប្រជាពលរដ្ឋ និងការអប់រំ នៅក្នុងគ្រប់វិស័យទាំងអស់ ហើយរហូតមកដល់ពេលនេះ រាជរដ្ឋាភិបាលបានដាក់បញ្ចូលនៅក្នុងយុទ្ធសាស្ត្របញ្ចកោណ ដែលជាអាទិភាពធំជាងគេមួយទៀត ដែលស្ថិតនៅក្នុងមុំទីមួយ គឺការអភិវឌ្ឍន៍ធនធានមនុស្ស ដើម្បីសម្រេចចក្ខុវិស័យរបស់យើង ២០៣០, ២០៥០ ។
លោកបណ្ឌិត ឈឹម ឃិនដារ៉េត ក៏បានចាត់ទុកទិវាមួយនេះ ដើម្បីរម្លឹកដល់អ្នកដែលប្រឈមជាមួយនឹងមេរោគអេដស៍ និងសម្រាប់បម្រើឱ្យសុខភាពសាធារណៈទូទៅ ក៏ដូចជាការពារជំងឺឆ្លង និងជាទិវាមួយដែលមានសារសំខាន់បំផុត នៅក្នុងការប្រយុទ្ធប្រឆាំងជំងឺអេដស៍ មេរោគអេដស៍នៅក្នុងប្រទេសកម្ពុជា ក៏ដូចជាសកលលោកផងដែរ ។
លោកវេជ្ជបណ្ឌិត ឈឹម សារ៉ាត់ បានឱ្យដឹងទៀតថា យោងតាមអង្គការសុខភាពពិភពលោក មនុស្សជាង១ លាននាក់ នៅទូទាំងពិភពលោកបានឆ្លងជំងឺកាមរោគជារៀងរាល់ថ្ងៃ ហើយការឆ្លងមេរោគអេដស៍ថ្មីចំនួន ១១៧លាននាក់ ចាប់តាំងពីឆ្នាំ១៩៩០ ដោយសារតែស្រោមអនាម័យដែលអាចជួយឲ្យចៀសផុតពីការឆ្លងជំងឺកាមរោគ និងមេរោគអេដស៍។ នេះជាមូលហេតុដែលត្រូវរៀបចំក្នុងទិវាស្រោមអនាម័យអន្តរជាតិ និងលើសពីនេះពិភពលោកត្រូវតែចងចាំថា ស្រោមអនាម័យមានសុវត្ថិភាព និងសិចស៊ី និងចាំបាច់ក្នុងការបញ្ចប់មេរោគអេដស៍/ជំងឺអេដស៍។
លោកវេជ្ជបណ្ឌិត បានឱ្យដឹងទៀតថា ទិវាស្រោមអនាម័យអន្តរជាតិឆ្នាំ២០២៤នេះ យើងជំរុញឱ្យមនុស្សគ្រប់គ្នានៅទូទាំងពិភពលោកចងចាំថាស្រោមអនាម័យជួយសង្គ្រោះជីវិតមនុស្ស ហើយនៅតែជាជម្រើសដ៏ល្អបំផុតសម្រាប់ការពារមេរោគអេដស៍ ជំងឺឆ្លងតាមការរួមភេទផ្សេងទៀត និងការមានផ្ទៃពោះដោយមិនបានគ្រោងទុក។
សូមបញ្ជាក់ដែរថា អង្គការមូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាននិងកំពុងផ្តល់សេវាថែទាំព្យាបាលដោយមិនគិតពីលទ្ធភាពនៃការបង់ប្រាក់ ដល់អតិថិជនជាង ១.៩លាននាក់ក្នុង ៤៦ប្រទេសជុំវិញពិភពលោក មានដូចជា នៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប ៕
ចែករំលែកព័តមាននេះ