រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី១៦ ខែកុម្ភៈ ឆ្នាំ២០២៤នេះ បានបំភ្លឺ ករណីជនជាប់សង្ស័យម្នាក់ឈ្មោះ…
រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី១៦ ខែកុម្ភៈ ឆ្នាំ២០២៤នេះ បានបំភ្លឺ ករណីជនជាប់សង្ស័យម្នាក់ឈ្មោះ នួន រស្មី បានប្តឹងចោទប្រកាន់លើលោកវរសេនីយ៍ទោ ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល ពីបទ ចាប់ឃុំឃាំង និងបង្ខាំងដោយខុសច្បាប់ សម្លុតកុំឲ្យដាក់ពាក្យបណ្តឹង និងបទ ប៉ះពាល់ដល់សេរីភាពបុគ្គល កាលពីថ្ងៃទី០៨ ខែកុម្ភៈ ឆ្នាំ២០២៤នោះ នៅថ្ងៃទី១៦ ខែកុម្ភៈ ឆ្នាំ២០២៤នេះ ឈ្មោះ នួន រស្មី បានមកដក ពាក្យបណ្តឹងពីអយ្យការអមសាលាដំបូងរាជធានីភ្នំពេញវិញហើយ ដោយសុំធ្វើការសម្របសម្រួល ក្រៅប្រព័ន្ធតុលាការ ។
ក្រុមការងារព័ត៌មាន និងប្រតិកម្មរហ័ស បានអោយដឹងថា ចំពោះករណីនេះ បើយោងតាមរបាយការណ៍របស់ការិយាល័យនគរបាលព្រហ្មទណ្ឌកម្រិតស្រាល បានបញ្ជាក់ថា នៅថ្ងៃទី០៨ ខែមករា ឆ្នាំ២០២៤ វេលាម៉ោង០៨និង៣០នាទី មានករណីឆក់កាបូប (បណ្ដាលឱ្យជនរងគ្រោះ ដួលម៉ូតូ បោកក្បាល រងរបួសសន្លប់បាត់ស្មារតី ហើយស្លាប់ពេលសង្គ្រោះនៅមន្ទីរពេទ្យ) នៅចំណុចផ្លូវជាតិលេខ៦ ក្រុម២ ភូមិបាក់ខែង សង្កាត់ព្រែកលៀប ខណ្ឌជ្រោយចង្វារ។ បន្ទាប់ពីកើតហេតុ និងដោយមានការចង្អុលបង្ហាញពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកវរសេនីយ៍ឯក ប៊ុន សត្យា ស្នងការរង ផែនការងារនគរបាលព្រហ្មទណ្ឌ កម្លាំងការិយាល័យនគរបាលព្រហ្មទណ្ឌកម្រិតស្រាល បានចុះពិនិត្យស្រាវជ្រាវនៅកន្លែងកើតហេតុ ហើយក៏កំណត់បានមុខសញ្ញាសង្ស័យម្នាក់។
រហូតដល់ថ្ងៃទី០១ ខែកុម្ភៈ ឆ្នាំ២០២៤ កម្លាំងជំនាញ ដឹកនាំដោយលោកវរសេនីយ៍ទោ ឈាង សូសាម៉ឺឌី ចុះទៅនាំខ្លួនមុខសញ្ញាសង្ស័យឈ្មោះ នួន រស្មី និងមនុស្សចំនួន០៣នាក់ទៀត យកមកធ្វើការសាកសួរ ដោយមានការឯកភាពពីលោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ក្រោយពីធ្វើការសាកសួររួច មនុស្សចំនួន០៣នាក់ ដោយមិនមានការពាក់ព័ន្ធ កម្លាំងជំនាញក៏អនុញ្ញាតឱ្យត្រឡប់ទៅលំនៅដ្នានវិញ ដោយឡែកឈ្មោះ នួន រស្មី កម្លាំងជំនាញ សុំអនុញ្ញាតពីលោកវរសេនីយ៍ឯក ប៊ុន សត្យា ស្នងការរង និងលោកព្រះរាជអាជ្ញាររង សេង ហៀង ឃាត់ទុកមួយយប់សិន រង់ចាំព្រឹកស្អែកចាំធ្វើការសាកសួរបន្ត ដោយសារយប់ជ្រៅពេក មិនអាចសួរនាំបាន ។
លុះព្រឹកឡើងថ្ងៃទី០២ ខែកុម្ភៈ ឆ្នាំ២០២៤ កម្លាំងជំនាញ បានធ្វើការសាកសួរឈ្មោះ នួន រស្មី ករណីអំពើឆក់ខាងលើ ក្នុងខណ្ឌជ្រោយចង្វារ សមត្ថកិច្ចសួរនាំឈ្មោះ នួន រស្មី មិនមានការពាក់ព័ន្ធទេ ក៏សុំគោលការណ៍ពីលោកស្នងការ លោកស្នងការរងទទួលផែន និងលោកព្រះរាជ អាជ្ញាររង សេង ហៀង អនុញ្ញាតឱ្យឈ្មោះ នួន រស្មី ត្រឡប់ទៅលំនៅដ្ឋានវិញ ដោយមានឪពុកជាអ្នកធានា ។
ក្រុមការងារព័ត៌មាន និងប្រតិកម្មរហ័ស បញ្ជាក់ថា លោកវរសេនីយ៍ទោ ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល និងមន្ត្រីពាក់ព័ន្ធ សូមធ្វើការបដិសេធ មិនបានប្រើអំពើហិ.ង្សាលើឈ្មោះ នួន រស្មី អំឡុងពេលឃាត់ខ្លួនសាកសួរទេ និងមិនបានបង្ខំឱ្យដកពាក្យបណ្តឹងនោះដែរ និងនៅពេលសាកសួរ គឺសមត្ថកិច្ច សួរនាំតាមជំនាញធម្មតា ភ្ជាប់ជាមួយរូបភាពវីដេអូ ជាភស្តុតាង ៕
ចែករំលែកព័តមាននេះ