រាជធានីភ្នំពេញ ៖ រថយន្តធុនធំម៉ាក FUSO ១គ្រឿង បើកបរដោយបុរសម្នាក់ បានរេចង្កូតជ្រុលទៅបុកឡើងលើសួនច្បារ ពុះចែកទ្រូងផ្លូវ កិនដើមផ្កាបាក់អស់៣គុម្ព និងបុកផ្ទប់បង្គោលភ្លើងបំភ្លឺផ្លូវ…
រាជធានីភ្នំពេញ ៖ រថយន្តធុនធំម៉ាក FUSO ១គ្រឿង បើកបរដោយបុរសម្នាក់ បានរេចង្កូតជ្រុលទៅបុកឡើងលើសួនច្បារ ពុះចែកទ្រូងផ្លូវ កិនដើមផ្កាបាក់អស់៣គុម្ព និងបុកផ្ទប់បង្គោលភ្លើងបំភ្លឺផ្លូវ រងការខូចខាតយ៉ាងដំណំ ទៅមុខលែងរួច ។
ហេតុការណ៍នេះ បានកើតឡើង កាលពីវេលាម៉ោង០១និង៣៥នាទីរសៀលថ្ងៃទី១៦ ខែកុម្ភៈ ឆ្នាំ២០២៤ នៅតាមបណ្ដោយផ្លូវ៥០ម៉ែត្រ ស្ថិតក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
បើតាមប្រភពព័ត៌មាន បានឲ្យដឹងថា នៅមុនពេលកើតហេតុ បានឃើញរថយន្ត១គ្រឿង ម៉ាក FUSO ពណ៌ស ពាក់ស្លាកលេខ កំពង់ស្ពឺ 3A-7796 សណ្ដោងកន្ទុយរ៉ឺម៉ក បើកបរដោយបុរសម្នាក់ ធ្វើដំណើរតាមបណ្ដោយផ្លូវ៥០ម៉ែត្រ ទិសដៅពីលិចទៅកើត ក្នុងល្បឿនលឿន លុះពេលទៅដល់ត្រង់ចំណុចកើតហេតុ បានរេចង្កូតបុកឡើងលើសួនច្បារ ពុះចែកទ្រូងផ្លូវទាំងកំរោល និងកិនដើមផ្កាបាកខ្ទេចអស់ចំនួន៣គុម្ព ព្រមទាំងបុកផ្ទប់បង្គោលភ្លើងបំភ្លឺផ្លូវ១ដើម ទៅមុខលែងរួច និងរងការខូចខាត ប៉ុន្តែមិនបណ្ដាលឲ្យមនុស្សណាម្នាក់រងរបួសនោះទេ ។
ប្រភពខាងលើបាននិយាយបន្តទៀតថា សំណាងល្អណាស់ ដែលពុំបានបណ្ដាលឲ្យគ្រោះថ្នាក់ដល់អ្នកដទៃឡើយ ដែលឧប្បត្តិហេតុនេះសង្ស័យបណ្ដាលមកពីអ្នកបើកបរ ងងុយដេក ហើយងោក១ភាំង។ ប៉ុន្តែបុរសអ្នកបើកបរបាននិយាយថា គ្រោះថ្នាក់នេះ កើតឡើង ព្រោះតែផ្លូវរអិល ដោយសារតែរថយន្តស្រោចទឹកផ្កា ហូរហៀទឹកលើផ្លូវជោគជាំពេក។
ទោះជាបែបណាការ លើកឡើងរបស់អ្នកបើកបររថយន្តនេះ ត្រូវបានទទួលរងការរិះគន់ពីមតិជាច្រើន ព្រោះផ្លូវនេះ មានរថយន្តតូចនិងធំច្រើនណាស់ បើកបរឆ្លងកាត់ ហើយពុំមានរថយន្តណារអិលគ្រោះថ្នាក់សោះឡើយ ហេតុអ្វីបានជារអិលតែរថយន្ត១គ្រឿងនេះ ទៅវិញលោក ? ម្យ៉ាងទៀត ក្រុមអ្នកថែសួនច្បារនោះបានស្រោចទឹករាល់ថ្ងៃ ថែមទៀតផង ពុំមែនទើបស្រោច ១ថ្ងៃនេះឡើយ ។
ក្រោយពេលកើតហេតុ មន្ត្រីនគរបាលចរាចរណ៍ខណ្ឌដង្កោ បានចុះទៅពិនិត្យជាក់ស្ដែង រួចរាយការណ៍ទៅកាន់នគរបាលការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ ចុះទៅធ្វើការវាស់វែង និងនាំយកទៅរក្សាទុករង់ចាំការដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ