ADផ្ទាំងផ្សព្វផ្សាយពាណិជ្ជកម្ម

Picture

​ជប៉ុនផ្តល់ថវិកាប្រមាណ​​ជាង ​៨ ​សែន ដុល្លារ​អា​មេ​រិ​ក​ជួយដល់ វិស័យ ៣ នៅ​​ប្រទេស​កម្ពុជា

4 ខែ មុន
  • ភ្នំពេញ

រាជធានី​ភ្នំពេញ​៖ ថវិកាប្រមាណជាង ៨ សែនដុល្លារអាមេរិក នឹងត្រូវបានផ្តល់ដោយរដ្ឋាភិបាលជប៉ុនដល់កម្ពុជា​ដើម្បី ជួយដល់វិស័យ ៣ នៅកម្ពុជា។ ថ្លែងនៅ​ថ្ងៃ​ទី​១៥ ខែកុម្ភៈ…

រាជធានី​ភ្នំពេញ​៖ ថវិកាប្រមាណជាង ៨ សែនដុល្លារអាមេរិក នឹងត្រូវបានផ្តល់ដោយរដ្ឋាភិបាលជប៉ុនដល់កម្ពុជា​ដើម្បី ជួយដល់វិស័យ ៣ នៅកម្ពុជា។

ថ្លែងនៅ​ថ្ងៃ​ទី​១៥ ខែកុម្ភៈ ឆ្នាំ​២០២៤ ឯកឧត្តម អ៊ូ​អិ​ណុ អាត់​ស៊ូ​ស៊ី ឯកអគ្គរាជទូត​វិសាមញ្ញ និង​ពេញ​សមត្ថភាព​របស់​ប្រទេស​ជប៉ុន ប្រចាំ​ព្រះរាជាណាចក្រ​កម្ពុជា បានបញ្ជាក់ ជប៉ុន​នឹង​ផ្តល់​ថវិកា ៨២៨,៥៤៦ ដុល្លារ​អា​មេ​រិ​ក សម្រាប់​ការ​បោសសម្អាត​មីន ការ​សាងសង់​អគារ​បឋម​សិក្សា និង​ការ​កែ​លម្អ​ប្រតិបត្តិការ​កសិកម្ម នៅ​កម្ពុជា ​។

ថ្លែង​ក្នុង​ពិធី​ចុះហត្ថលេខា​លើ​កិច្ចសន្យា​ផ្តល់​ជំនួយ​ឥត​សំណង សម្រាប់​គម្រោង​ទ្រង់ទ្រាយ​តូច​សនិ្ត​សុខ​មនុស្សជាតិ ឯកឧត្តម អ៊ូ​អិ​ណុ អាត់​ស៊ូ​ស៊ី បន្ត​ថា​៖ «​ខ្ញុំ​សូម​ណែនាំ​គម្រោង​ដែល​យើង​កំពុង​ចុះហត្ថលេខា​នា​ថ្ងៃនេះ រួម​មាន គម្រោង​ទី​១ ដែល​អនុវត្ត​ដោយ​មជ្ឈមណ្ឌល​សកម្មភាព​កំចាត់​មីន​កម្ពុជា រដ្ឋាភិបាល​ជប៉ុន​ផ្តល់​ថវិកា​ចំនួន ៥១៥,០៦០ ដុល្លារ​អា​មេ​រិ​ក (​ប្រាំ​រយ​ដប់​ប្រាំ​ពាន់​ហុកសិប​ដុល្លារ​អា​មេ​រិ​ក​) សម្រាប់​ការ​ព​ន្លឿ​ន និង​ការ​បង្កើន​ប្រសិទ្ធភាព​នៃ​សកម្មភាព​បោសសម្អាត​មីន ដោយ​តម្លើង​កម្មវិធី​សម្រាប់​ប្រព័ន្ធ​សកម្មភាព​មីន ផ្អែក​លើ​បញ្ញា​សិប្បនិម្មិត (AI) ក្នុង​ខេត្តពោធិ៍សាត់ ខេត្តកំពង់ធំ និង​ខេត្តសៀមរាប​។ យើង​រំពឹង​ថា​គម្រោង​នេះ នឹង ផ្តល់​អត្ថប្រយោជន៍​ដល់​ប្រជាពលរដ្ឋ​ប្រមាណ ២០,០០០ (​ពីរ​ម៉ឺន​) នាក់​ក្នុង​ខេត្ត​ទាំង​បី​» ។

ឯកឧត្តម អ៊ូ​អិ​ណុ អាត់​ស៊ូ​ស៊ី បន្ត​ថា សម្រាប់​គម្រោង​ទី​២ ដែល​អនុវត្ត​ដោយ​មន្ទីរ​អប់រំ យុវជន និង​កីឡា​ខេត្តបាត់ដំបង រដ្ឋាភិបាល​ជប៉ុន​ផ្តល់​ថវិកា​ចំនួន ៨៨,៩០០ ដុល្លារ​អា​មេ​រិ​ក (​ប៉ែតសិប​ប្រាំបី​ពាន់​ប្រាំបួន​រយ​ដុល្លារ​អា​មេ​រិ​ក​) សម្រាប់​ការ​សាងសង់​អគារសិក្សា​១​ខ្នង ៥​បន្ទប់ ដោយ​បំពាក់គ្រឿងសង្ហារឹម​ដែល​ចាំបាច់ នៅ​សាលា​បឋម​សិក្សា​ពីងពង់ ក្នុង​ខេត្តបាត់ដំបង​។ យើង​រំពឹង​ថា​គម្រោង​នេះ នឹង​ផ្តល់​អត្ថប្រយោជន៍​ដល់​សិស្ស​ចំនួន ១៦៦​នាក់ តាម​រយៈ​ការ​កែ​លម្អ​អោយ​កាន់តែ​ប្រសើរ​ឡើង​នូវ​គុណភាព​អប់រំ​ ។

និងគម្រោង​ចុង​ក្រោយ​ ឯកឧត្តម​ថា នឹង​អនុវត្ត​ដោយ​មន្ទីរ​កសិកម្ម រុក្ខា​ប្រមាញ់ និង​នេសាទ​ខេត្តរតនគិរី រដ្ឋាភិបាល​ជប៉ុន នៃ​ថវិកា​ចំនួន ២២៤,៥៨៦ ដុល្លារ​អា​មេ​រិ​ក (​ពីរ​រយ​ម្ភៃ​បួន​ពាន់​ប្រាំ​រយ​ប៉ែតសិប​ប្រាំមួយ​ដុល្លារ​អា​មេ​រិ​ក​) សម្រាប់​ការ​សាងសង់​ឃ្លាំង និង​កន្លែង​ស​ម្ងួ​ត ក៏​ដូច​ជា តម្លើង​ឧបករណ៍​វាស់​សំណើម និង​ម៉ាស៊ីន​ចាត់​ថ្នាក់​សម្រាប់​សហគមន៍​កសិកម្ម ចំនួន​៤ ក្នុង​ខេត្តរតនគិរី​។ ជា​ការ​រំពឹង​ទុក​គម្រោង​នេះ​នឹង​ផ្តល់​អត្ថប្រយោជន៍​ដល់​កសិករ​ប្រមាណ ២០០​នាក់ ដោយ​ការ​ពង្រឹង​ខ្សែ​សង្វា​ក់​តម្លៃ​ក្នុង​ការ​ផលិត​គ្រាប់ស្វាយចន្ទី ក៏​ដូច​ជា​ការ​លើកកម្ពស់​ប្រាក់​ចំណូល​របស់​កសិករ​ ។

គួរ​បញ្ជាក់​ផង​ដែរ​ថា ជំនួយ​ឥត​សំណង​គូ​សាណូ​ណិ​របស់​ជប៉ុន បាន​ចាប់ផ្តើម​នៅ​ប្រទេស​កម្ពុជា​ក្នុង​ឆ្នាំ​១៩៩១ ដើម្បី​គាំទ្រ​ដល់​កិច្ច​ខិតខំ​ប្រឹងប្រែង​របស់​កម្ពុជា​ក្នុង​ការ​អភិវឌ្ឍ និង​ស្ថាបនា​ប្រទេស​ឡើង​វិញ នៅ​កម្រិត​មូលដ្ឋាន​។ ជំនួយ​ឥត​សំណង​នេះ មាន​ទិស​ដៅ​ការពារ​ជន​ងាយ​រង​គ្រោះ​ពី​កត្តា​មួយ​ចំនួន​ដូច​ជា ភាព​ក្រីក្រ និង​/​ឬ ភាព​អកុសល​នានា ដែល​អាច​គំរាមកំហែង​ដោយ​ផ្ទាល់​ដល់​អាយុជីវិត ជីវភាព​រស់នៅ និង​សេចក្តី​ថ្លៃថ្នូរ​របស់​ពួក​គេ ក៏​ដូច​ជា​ជួយ​ជំរុញ​នូវ​ភាព​ម្ចាស់​ការ​លើ​ខ្លួនឯង​របស់​ប្រជា​សហគមន៍​។ ចាប់តាំងពី​ឆ្នាំ​១៩៩១ រដ្ឋាភិបាល​ជប៉ុន​បាន​ផ្តល់​ថវិកា ជាង​៦៩​លាន​ដុល្លារ​អា​មេ​រិ​ក ដល់​អាជ្ញាធរ​មូលដ្ឋាន និង​អង្គការក្រៅរដ្ឋាភិបាល ដើម្បី​អនុវត្ត​គម្រោង​គូ​សាណូ​ណិ​ចំនួន ៦៩១​គម្រោង នៅ​ទូ​ទាំង​ប្រទេស​កម្ពុជា ​៕

អត្ថបទសរសេរ ដោយ