ប្រទេសស្រីលង្កា ៖ ក្រុមគ្រូពេទ្យនៅក្នុងប្រទេសស្រីលង្កាបានវះកាត់យកគ្រួសក្នុងប្លោកនោមទម្ងន់ ៣,១ គីឡូក្រាមចេញពីខ្លួនបុរសម្នាក់ ដែលពួកគេជឿថាគឺជាគ្រួសធំបំផុតមិនធ្លាប់មានក្នុងប្រវត្តិសាស្ត្រ។ នេះបើតាមប្រភពពី BBC ចេញផ្សាយកាលពីថ្ងៃទី១៨ ខែសីហា ឆ្នាំ២០២៦។
ការវះកាត់ត្រូវបានធ្វើឡើងកាលពីសប្តាហ៍មុន នៅមន្ទីរពេទ្យមួយក្នុងទីក្រុង ទ្រីនកូម៉ាលី (Trincomalee) ភាគខាងកើតប្រទេសស្រីលង្កា។ ដើមឡើយ អ្នកជំងឺអាយុ៥៥ឆ្នាំរូបនេះ ត្រូវបានបញ្ជូនទៅកាន់មន្ទីរពេទ្យបន្ទាប់ពីមានអាការៈដាច់សរសៃឈាមខួរក្បាល។ ប៉ុន្តែអំឡុងពេលសម្រាកព្យាបាល គ្រូពេទ្យបានរកឃើញគ្រួសក្នុងប្លោកនោមរបស់គាត់ បន្ទាប់ពីកត់សម្គាល់ឃើញថា ពិបាកបត់ជើងតូច។
នៅក្នុងការវះកាត់ ក្រុមគ្រូពេទ្យបានយកគ្រួសនោះចេញ ដោយមានទម្ងន់ស្មើនឹងទារកទើបនឹងកើតគ្រប់ខែម្នាក់ និងមានទំហំប៉ុនពងសត្វអូទ្រីស។ យោងតាមលោកវេជ្ជបណ្ឌិត Pragalathan Balakrishnan ដែលដឹកនាំការវះកាត់បានប្រាប់ BBC Sinhala ថា តាមកំណត់ត្រាដែលមាន នេះគឺជាគ្រួសក្នុងប្លោកនោមដ៏ធំបំផុតមិនធ្លាប់មានកត់ត្រាទុក និងត្រូវបានយកចេញតាមរយៈការវះកាត់។ ស្របពេលអ្នកជំងឺមានសុខភាពល្អប្រសើរ។ លោកវេជ្ជបណ្ឌិតបានបន្ថែមថា គ្រួសនេះប្រហែលជាបានកកើតក្នុងប្លោកនោមអ្នកជំងឺអស់រយៈពេលពី ៥ ទៅ ១០ ឆ្នាំមកហើយ។ តាមការបញ្ជាក់ពីគ្រូពេទ្យ បច្ចុប្បន្នអ្នកជំងឺនៅតែបន្តសម្រាកនៅមន្ទីរពេទ្យ ដើម្បីទទួលការព្យាបាលជំងឺប្រចាំកាយផ្សេងទៀត។
គួរបញ្ជាក់ថា គ្រួសក្នុងប្លោកនោម កើតឡើងនៅពេលសារធាតុរ៉ែក្នុងទឹកនោមចាប់ផ្តើមឡើងក្រាម រួចក្លាយទៅជាដុំរឹង ហើយច្រើនតែកើតឡើងនៅពេលប្លោកនោមមិនអាចបញ្ចេញទឹកនោមអស់ពីខ្លួន ដែលបន្សល់ទុកទឹកនោមខាប់ខ្លាំង រហូតអាចប្រែក្លាយទៅជាក្រាមគ្រួសបាន។ គ្រួសក្នុងប្លោកនោមតូចៗមានទំហំប៉ុនគ្រាប់ខ្សាច់ អាចធ្លាក់មកក្រៅវិញដោយខ្លួនឯង ប៉ុន្តែគ្រួសមានទំហំធំជាង ១ សង់ទីម៉ែត្រ ជាញឹកញាប់តែងស្ទះលំហូរទឹកនោម និងទាមទារឱ្យមានការព្យាបាលពីគ្រូពេទ្យ ខណៈគ្រួសក្នុងប្លោកនោមមានទំហំធំជាង ៤ សង់ទីម៉ែត្រ ត្រូវបានចាត់ទុកថាជាគ្រួសយក្សហើយ។
បើយោងតាមសៀវភៅកំណត់ត្រាពិភពលោកហ្គីណេស (Guinness World Records) គ្រួសក្នុងប្លោកនោមដែលធំបំផុតត្រូវបានវះកាត់យកចេញពីអ្នកជំងឺម្នាក់នៅក្នុងប្រទេសប្រេស៊ីល កាលពីឆ្នាំ ២០០៣ ដោយមានទម្ងន់ ១,៩ គីឡូក្រាម និងមានប្រវែង ១៧,៩ សង់ទីម៉ែត្រ។ ចំណែកឯគ្រួសក្នុងប្លោកនោមដែលត្រូវបានវះកាត់យកចេញក្នុងប្រទេសស្រីលង្កា កាលពីសប្តាហ៍មុន មានប្រវែងប្រហែល ១៧ សង់ទីម៉ែត្រ៕
ចែករំលែកព័តមាននេះ