តាមប្រភពពី AFP ផ្សាយថា ក្រុមហ៊ុនអាកាសចរណ៍ឥណ្ឌាដែលកំពុងមានបញ្ហាផ្នែកហិរញ្ញវត្ថុចាំបាច់ត្រូវលុបចោលជើងហោះហើរមួយចំនួន កាលពីថ្ងៃទី២៧ ឧសភា កន្លងមក ក្រោយពីក្រុមហ៊ុនថាមពលផ្សេងៗបដិសេធការចាក់ប្រេងដល់ក្រុមហ៊ុនអាកាចរណ៍របស់រដ្ឋខាងលើ ព្រោះនៅមានប្រាក់បំណុលដ៏លើសលប់ ។
ក្រុមហ៊ុនអាកាសចរណ៍ឥណ្ឌាត្រូវលុបចោលជើងហោះហើរយ៉ាងតិច៤លើក នៅភាគខាងត្បូងប្រទេស ក្រោយពីក្រុមហ៊ុនសហគ្រាសថាមពលជាច្រើនកន្លែងបញ្ជាក់ថា នឹងមិនចាក់ប្រេងដល់យន្តហោះរបស់ក្រុមហ៊ុនអាកាសចរណ៍នេះ ព្រោះនៅមិនទាន់បានជម្រះបំណុលចាស់ដែលនៅជំពាក់ ។ ទោះជាយ៉ាងណា អ្នកនាំពាក្យរបស់ក្រុមហ៊ុនអាកាសចរណ៍ដែលសុំមិនបញ្ចេញឈ្មោះបានផ្តល់អំណះអំណាងថា «នេះមិនមែនជាបញ្ហាធំ» និងជើងហោះហើរផ្សេងៗបានវិលទៅរកស្ថានភាពប្រក្រតី។
បញ្ហានេះមានលក្ខណៈធូរស្រាល ហើយយើងរំពឹងទុកថា អាចចំណាយថ្លៃប្រេងបាន និងបានទទួលជំនួយមួយផ្នែកពីក្រសួងអាកាសចរណ៍។
បញ្ហាប្រេងរបស់ក្រុមហ៊ុនអាកាសចរណ៍ឥណ្ឌា (Air India) លើកនេះ បានបំផ្លាញនិមិត្តរូបរបស់ក្រុមហ៊ុនបន្តទៀត ដោយកាលពីគ្រាមុនក្រុមហ៊ុនអាកាសចរណ៍ឥណ្ឌាធ្លាប់ក្លាយជាអ្នកមានកម្មសិទ្ធិនៅលើដែនអាកាសឥណ្ឌា ប៉ុន្តែបច្ចុប្បន្នត្រូវក្រុមហ៊ុនអាកាចរណ៍ឯកជនជាច្រើនប្រជែងមុខ ។
ក្រុមហ៊ុនអាកាសចរណ៍ឥណ្ឌាមានបញ្ហាផ្នែកហិរញ្ញវត្ថុ និងផ្នែកថាមពលជំពាក់បំណុលដល់ក្រុមហ៊ុនប្រេងឥន្ធនៈចាប់តាំងពីចុងឆ្នាំមុន និងកាលពីសប្តាហ៍កន្លងទៅ ខាងផ្នែកក្រុមហ៊ុនប្រេងឥន្ធនៈបានផ្ញើសារលិខិតក្រើនរំឭកថា នឹងឈប់ចាក់ប្រេងដល់ពួកគេ នៅឯអាកាសយានដ្ឋានមួយចំនួន ដរាបណាមានការជម្រះបំណុល ឱ្យរួចជាមុនសិន។
កាលពីមុននេះ នៅដើមខែមេសា ក្រុមហ៊ុនអាកាចរណ៍ឥណ្ឌា ទើបនឹងជួបបញ្ហាផ្ទៃក្នុងដោយអាកាសយានិកក្រុមហ៊ុនជិត៨០០នាក់ ធ្វើបាតុកម្មបញ្ឈប់ការងារសុំដំឡើងប្រាក់ខែ ធ្វើឱ្យក្រុមហ៊ុនអាកាសចរណ៍ដែលមានកម្លាំងផុយស្រួយមួយនេះ ត្រូវបាត់បង់ប្រាក់ចំណូលជាច្រើនលានដុល្លារ ខណៈពេលក្រុមហ៊ុនជួបប្រទះនឹងបញ្ហាខាតដើមទុនក្នុងអំឡុងឆ្នាំកន្លងមក ៕
ចែករំលែកព័តមាននេះ