រាជធានីភ្នំពេញ ៖ សាកលវិទ្យាល័យអន្តរជាតិនៃកម្ពុជាបានសហការជាមួយអង្គការចលនាដើម្បីសុខភាពកម្ពុជា និងអង្គការអាដ្រា រៀបចំទិវាពិភពលោកគ្មានថ្នាំជក់ ៣១ ឧសភា ។ ពិធីនេះបានធ្វើឡើងនៅសាកលវិទ្យាល័យអន្តរជាតិនៃកម្ពុជាកាលពីថ្ងៃទី៣០ ឧសភា ក្រោមអធិបតីភាពលោកជំទាវហូ ណូន ប្រធានគណៈកម្មការសុខាភិបាល
រាជធានីភ្នំពេញ ៖ សាកលវិទ្យាល័យអន្តរជាតិនៃកម្ពុជាបានសហការជាមួយអង្គការចលនាដើម្បីសុខភាពកម្ពុជា និងអង្គការអាដ្រា រៀបចំទិវាពិភពលោកគ្មានថ្នាំជក់ ៣១ ឧសភា ។ ពិធីនេះបានធ្វើឡើងនៅសាកលវិទ្យាល័យអន្តរជាតិនៃកម្ពុជាកាលពីថ្ងៃទី៣០ ឧសភា ក្រោមអធិបតីភាពលោកជំទាវហូ ណូន ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា ។
លោកជំទាវ ហូ ណូន បានថ្លែងថា ជាការពិតណាស់ រដ្ឋាភិបាលនៃប្រទេសនីមួយៗ តែងតែធ្វើអ្វីៗគ្រប់បែបយ៉ាង ដើម្បីលើកកម្ពស់សុខុមាលភាព និងកាត់បន្ថយភាពក្រីក្រ ប៉ុន្តែឧស្សាហកម្មថ្នាំជក់នីមួយៗ ជាក្រឹត្យក្រមគឺធ្វើយ៉ាងណាឱ្យផលិតផលរបស់ខ្លួនលក់កាន់តែដាច់ ហើយបើផលិតផលថ្នាំជក់លក់កាន់តែដាច់មានន័យថា មានមនុស្សកាន់តែច្រើន ដែលធ្លាក់ខ្លួនឈឺ ពិការ ឬស្លាប់ ។ ដូចនេះ រដ្ឋាភិបាល និងឧស្សាហកម្មថ្នាំជក់ មានទំនាស់ផលប្រយោជន៍ជាមូលដ្ឋាន ដែលមិនអាចផ្សះផ្សាបាន ហើយក៏សូមអំពាវនាវដល់ស្ថាប័នពាក់ព័ន្ធទាំងអស់ធ្វើយ៉ាងណា កុំឱ្យមានការជ្រៀតជ្រែកពីឧស្សាហកម្មថ្នាំជក់ ក្នុងពេលបង្កើត និងអនុវត្តគោលនយោបាយត្រួតពិនិត្យ ។
ម្យ៉ាងវិញទៀត ក៏សូមគាំទ្រចំពោះវិធានការដែលបានលើកឡើងក្នុងប្រធានបទសំដៅកាត់បន្ថយការប្រើប្រាស់ថ្នាំជក់ ដូចជាវិធានការ ដំឡើងពន្ធលើផលិតផលថ្នាំជក់ ដែលធ្វើឱ្យរដ្ឋាភិបាលបានទទួលចំណូលពន្ធបន្ថែមផង និងអាចកាត់បន្ថយការប្រើប្រាស់ថ្នាំជក់ផង ។ នេះជាវិធានការឈ្នះ=ឈ្នះដែលយើងមិនគួរមើលរំលង ។
រដ្ឋសភានៃព្រះរាជាណាចក្រកម្ពុជា មានមោទនភាពណាស់ដែលបានផ្តល់សច្ចាប័នចូលជាសមាជិកនៃអនុសញ្ញាស្តីពីការត្រួតពិនិត្យថ្នាំជក់ នៅថ្ងៃទី១១ វិច្ឆិកា ឆ្នាំ២០០៥ ហើយប្រទេសកម្ពុជាបានក្លាយជាសមាជិកពេញសិទ្ធិនៃអនុសញ្ញានេះ នៅថ្ងៃទី១៥ វិច្ឆិកា ឆ្នាំ២០១១ ។ ដោយការចូលជាសមាជិកនៃអនុសញ្ញានេះ ព្រះរាជាណាចក្រកម្ពុជាបានប្តេជ្ញាចិត្តដាក់ចេញជាវិធានការផ្សេងៗ ដើម្បីកាត់បន្ថយការប្រើប្រាស់ថ្នាំជក់ មានជាអាទិ៍ ការអនុម័តនូវអនុក្រឹត្យស្តីពីការបោះពុម្ពបម្រាមសុខភាពនៅលើកញ្ចប់បារី និងថ្មីៗនេះបានអនុម័តនូវអនុក្រឹត្យមួយទៀត គឺអនុក្រឹត្យស្តីពីវិធានការហាមឃាត់ចំពោះការផ្សាយពាណិជ្ជកម្មផលិតផលថ្នាំជក់ ។ អនុក្រឹត្យនេះ នឹងចូលជាធរមាននៅចុងខែកក្កដា ឆ្នាំ២០១១ ដែលហាមឃាត់រាល់ទម្រង់នៃការផ្សាយពាណិជ្ជកម្ម ការផ្សព្វផ្សាយលក់ផលិតផលថ្នាំជក់ និងការឧបត្ថម្ភកម្មវិធីរបស់ក្រុមហ៊ុនថ្នាំជក់ ។ ទាំងនេះ គឺជាសមិទ្ធផលធំៗដែលព្រះរាជាណាចក្រកម្ពុជាបានបំពេញឆ្លើយតបទៅនឹងកាតព្វកិច្ចក្រោមមាត្រា១១ និងមាត្រា១៣ នៃអនុសញ្ញា៕
ចែករំលែកព័តមាននេះ