ទីក្រុងកូឡុំបូ៖ រដ្ឋមន្ត្រីម្នាក់របស់ប្រទេសស្រីលង្កាលាលែងពីតំណែងក្រោយចាប់ខ្លួនពីបទសង្ស័យទិញថ្នាំពេទ្យក្លែងក្លាយនៅពេលប្រទេសជាតិជួបវិបត្តិសេដ្ឋកិច្ច។ រដ្ឋាភិបាលស្រីលង្កាបញ្ជាក់ថារដ្ឋមន្ត្រីក្រសួងបរិស្ថាន (កាលពីមុនកាន់តំណែងជារដ្ឋមន្ត្រីសុខាភិបាល) បានលាលែងពីតំណែងពិតមែន។ លោកត្រូវចាប់ខ្លួនកាលពីថ្ងៃសុក្រសប្ដាហ៍មុនពីបទទិញថ្នាំពេទ្យក្លែងក្លាយយកមកព្យាបាលជំងឺឆ្លង និងជំងឺមហារីក។ លោកត្រូវស្ថិតនៅក្រោមការស៊ើបអង្កេតរហូតដល់ថ្ងៃទី១៥ ខែកុម្ភៈ។
ការចុះពីតំណែងនេះបន្ទាប់ពីមានសម្ពាធកាន់តែខ្លាំងពីក្រុមអ្នកតំណាងរាស្ត្រគណបក្សប្រឆាំង, ពីក្រុមសកម្មជន និងពីក្រុមអ្នកធ្វើការផ្នែកសុខាភិបាលដែលទាមទារថាត្រូវតែដកគាត់ពីតំណែង ហើយត្រូវតែស៊ើបអង្កេតឱ្យដឹងស-ខ្មៅ។ មន្ត្រីជាន់ខ្ពស់៥នាក់ទៀតនៅក្រសួងសុខាភិបាល និងអ្នកផ្គត់ផ្គង់ថ្នាំពេទ្យក្លែងក្លាយក៏ត្រូវចាប់ខ្លួនផងដែរ។ រដ្ឋមន្ត្រីរូបនេះត្រូវបានចោទប្រកាន់ថាឆ្លៀតពេលប្រទេសជាតិមានវិបត្តិសេដ្ឋកិច្ច គាត់យកបញ្ហានេះធ្វើជាលេសដើម្បីទិញថ្នាំជាលក្ខណៈឆក់កណ្ដៀតបែបលោតឆ័ត្រ។ គាត់មិនទិញតាមនីតិវិធីជាផ្លូវការទេ។ គាត់ប្រគល់កិច្ចការដេញថ្លៃផ្គត់ផ្គង់ថ្នាំពេទ្យឱ្យតែគ្នារបស់គាត់។
គាត់ធ្លាប់កាន់តំណែងជារដ្ឋមន្ត្រីសុខាភិបាលរហូតដល់ខែតុលា ឆ្នាំ២០២៣ក៏ត្រូវថ្នាក់លើផ្លាស់ប្ដូរមុខតំណែង និងតួនាទីទៅកាន់ក្រសួងបរិស្ថានវិញម្ដង។ កាលពីខែកញ្ញា រដ្ឋសភាធ្លាប់បោះឆ្នោតដកសេចក្ដីទុកចិត្តពីលោកម្ដងហើយ។ ប៉ុន្តែលោកអាចទទួលបានសំឡេងគាំទ្រគ្រប់គ្រាន់។ អ្នកសារព័ត៌មានព្យាយាមទាក់ទងទៅគាត់ដើម្បីស្នើសុំការធ្វើអត្ថាធិប្បាយ ឬឆ្លើយបំភ្លឺដើម្បីកុំឱ្យថាព័ត៌មានផ្សាយលម្អៀង ឬផ្សាយតែមួយចំហៀង អត់មានប៊ែលេន (balance)។ ប៉ុន្តែមិនអាចទាក់ទងបាន។
នៅប្រទេសស្រីលង្កា អ្នកជំងឺអាចទទួលបានសេវាព្យាបាលដោយឥតគិតលុយនៅតាមមន្ទីរពេទ្យរបស់រដ្ឋ។ ប៉ុន្តែពេទ្យរដ្ឋខ្វះខាតថ្នាំពេទ្យ និងបុគ្គលិកសម្រាប់ផ្ដល់សេវាឱ្យបានគ្រប់គ្រាន់។ ជាពិសេស គ្រូពេទ្យកម្រិតដុកទ័រមានមិនគ្រប់គ្រាន់ទេ។ អ្នកជំងឺខ្លះស្លាប់, ខ្លះរងគ្រោះប៉ះពាល់ភ្នែក និងខ្លះទៀតដល់ថ្នាក់ងងឹតភ្នែកឈឹងតែម្ដងនៅពេលពួកគេទៅរកសេវាព្យាបាលរយៈពេល២ឆ្នាំចុងក្រោយនេះ។ គេយល់ថាដោយសារថ្នាំពេទ្យគុណភាពអន់ពេកទើបបានជាការព្យាបាលមិនសូវកាក់កប។
ប្រទេសស្រីលង្កាឥឡូវនេះមិនទាន់រួចផុតពីវិបត្តិទេ។ គ្រាន់តែបានធូរស្បើយជាងមុន, មានបាយហូបគ្រប់គ្រាន់, មានសាំងចាក់ឡាន ចាក់ម៉ូតូគ្រប់ និងមានថ្នាំពេទ្យផ្គត់ផ្គង់ជាបណ្ដើរៗទាន់តម្រូវការ។ ប្រទេសនេះប្រកាសក្ស័យធនកាលពីខែមេសា ឆ្នាំ២០២២ នៅពេលបំណុលសរុបទាំងបំណុលក្នុងស្រុក និងបំណុលបរទេសកើនឡើងដល់លើសពី៨៣ពាន់លានដុល្លារ។
ដោយសារវិបត្តិនេះ ជនជាតិស្រីលង្កាដែលមានចំណេះដឹងគ្រាន់បើ ឬល្មមៗ សម្រុកចាកចោលជាតិមាតុភូមិរបស់ខ្លួនទៅស្វះស្វែងរកការងារធ្វើនៅប្រទេសដទៃទៀតដើម្បីបានលុយផ្ញើត្រឡប់ទៅឱ្យក្រុមគ្រួសារ ឬសាច់ញាតិរបស់ខ្លួន។ នៅក្នុងចំណោមអ្នកចេះដឹងទាំងនោះក៏មានគ្រូពេទ្យកម្រិតដុកទ័រមិនតិចនាក់ឡើយដែលត្រូវតែបង្ខំចិត្តចេញទៅរកការងារនៅស្រុកគេក្រែងលោបានចំណូលគ្រាន់បើ។ មូលហេតុនេះធ្វើឱ្យវិស័យសុខាភិបាលរឹតតែចុះដុនដាបថែមមួយកម្រិតទៀត៕
ប្រភព៖ Associated Press
https://apnews.com/article/sri-lanka-cabinet-minister-resign-drug-scandal-9239fa84e922a04cd553396aa643d586
ចែករំលែកព័តមាននេះ