ខេត្តពោធិ៍សាត់ ៖ ដូចពាក្យគេតែងតែនិយាយថា «មនុស្សស្គាល់មុខ តែមិនស្គាល់ចិត្ត» ពិតជាត្រឹមត្រូវណាស់ បើទោះបីមនុស្សម្នាក់នោះ យើងបានរាប់អានស្គាល់ជិតស្និទ្ធិគ្នាយូរយ៉ាងណាក៏ដោយ ក៏យើងនៅមិនដឹងថា តើចិត្តបានស្មោះត្រង់ជាមួយវិញដែរឬទេ…
ខេត្តពោធិ៍សាត់ ៖ ដូចពាក្យគេតែងតែនិយាយថា «មនុស្សស្គាល់មុខ តែមិនស្គាល់ចិត្ត» ពិតជាត្រឹមត្រូវណាស់ បើទោះបីមនុស្សម្នាក់នោះ យើងបានរាប់អានស្គាល់ជិតស្និទ្ធិគ្នាយូរយ៉ាងណាក៏ដោយ ក៏យើងនៅមិនដឹងថា តើចិត្តបានស្មោះត្រង់ជាមួយវិញដែរឬទេ ។ ដូច្នេះ គឺយើងមានតែការប្រុងប្រយ័ត្នឱ្យបានខ្ពស់ចំពោះខ្លួនឯង និងកូនចៅយើងតែប៉ុណ្ណោះ ពិសេសសម្រាប់បងប្អូនដែលមានកូនស្រីនៅតូចៗ កុំឱ្យកើតមានរឿងវិប្បដិសារីណាមួយឱ្យសោះ ។
ជាក់ស្តែង ដូចករណីខាងក្រោមនេះ គឺជនសង្ស័យម្នាក់ដែលមានវ័យចំណាស់ទៅហើយ តែតណ្ហានៅកើតមានយ៉ាងពុះកញ្ជ្រោលរហូតបានបំផ្លាញអនាគតរបស់ក្មេងស្រីម្នាក់ បន្សល់ទុកតែយ៉ាងឈឺចាប់ឱ្យនាងមួយជីវិត ខណៈជននេះក៏បានស្គាល់យ៉ាងជិតស្និទ្ធិជាមួយឪពុកម្តាយរបស់ក្មេងស្រីរងគ្រោះផងដែរ ។
យោងតាមផេកស្នងការនគរបាលខេត្តពោធិ៍សាត់បានឱ្យដឹងថា នៅថ្ងៃសៅរ៍ ទី០៣ ខែកុម្ភៈ ឆ្នាំ២០២៤ ម៉ោង១៣និង៣០នាទី ស្ថិតនៅចំណុចចម្ការស្វាយរំលេចក្នុងភូមិសាយ ឃុំព្រងិល ស្រុកភ្នំក្រវាញ មានករណីរំលោភសេពសន្ថវៈ បង្កឡើងដោយជនសង្ស័យឈ្មោះ អក បរន ភេទប្រុស អាយុ ៥៧ឆ្នាំ រស់នៅភូមិគល់ទទឹង ឃុំសខ្មែរ ស្រុកភ្នំក្រវាញ មុខរបរជាអ្នករត់ម៉ូតូឌុបបានធ្វើសកម្មភាព បើកបរម៉ូតូដឹកអីវ៉ាន់នៅតាមផ្លូវ ហើយបានឃើញកុមារីរងគ្រោះអាយុ១២ឆ្នាំម្នាក់ដែលកំពុងជិះកង់១គ្រឿងនៅតាមផ្លូវឌុបគ្នា៣នាក់ (ក្មេងៗដូចគ្នា) ។
ប្រភពបន្តថា ពេលនោះ ជនសង្ស័យក៏បានហៅក្មេងរងគ្រោះឱ្យជួយកាន់អីវ៉ាន់គាត់ ហើយកុមារីរងគ្រោះ ក៏បានឡើងជិះម៉ូតូទៅជាមួយជនសង្ស័យដោយសារជនសង្ស័យ និងឪពុក-ម្ដាយរបស់ក្មេងរងគ្រោះរាប់អានស្គាល់គ្នាដែរ ។
ខណៈដែលជនសង្ស័យបានឌុបកុមារីរងគ្រោះជិះទៅដល់កន្លែងកើតហេតុខាងលើ ស្រាប់តែជនសង្ស័យ បានធ្វើសកម្មភាពចាប់រំលោភសេពសន្ថវៈនាងរហូតបានសម្រេច ដោយបានគំរាមក្មេងស្រីរងគ្រោះថា មិនឱ្យនិយាយប្រាប់គេទេ ប្រយ័ត្នសម្លា.ប់ចោល រួចជនសង្ស័យក៏បានឌុបក្មេងស្រីរងគ្រោះត្រឡប់មកផ្ទះវិញ។
ប្រភពឱ្យដឹងទៀតថា ក្រោយទទួលពាក្យបណ្ដឹងពីម្តាយក្មេងស្រីរងគ្រោះហើយ កម្លាំងជំនាញនៃអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលបានធ្វើបង្ក្រាបឃាត់ខ្លួនជនសង្ស័យនៅថ្ងៃទី០៤.០២.២០២៤ វេលាម៉ោង០៩:០០នាទី បង្កសំណុំរឿងបញ្ជូនទៅសាលាដំបូងខេត្ត ។
ចែករំលែកព័តមាននេះ