លទ្ធផលសម្រាប់ការប្រកួតនៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យទី២៩ ឧសភា ជ័យ វណ្ណៈ មកពីក្លឹបឃ្លាំមឿងកីឡា យកឈ្នះសូយ សីហា មកពីក្លឹបអូដឹមកីឡា…
លទ្ធផលសម្រាប់ការប្រកួតនៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យទី២៩ ឧសភា ជ័យ វណ្ណៈ មកពីក្លឹបឃ្លាំមឿងកីឡា យកឈ្នះសូយ សីហា មកពីក្លឹបអូដឹមកីឡា ដោយពិន្ទុ ខណៈពេលគូកម្តៅសាច់ដុំឡុង សុភី មកពីក្លឹបសាលវ័ន្តកីឡា និងពេជ្រ សីហា មកពីក្លឹបក្រសួងការពារជាតិ បានត្រឹមតែស្មើពិន្ទុគ្នា ។
រវាងជ័យ វណ្ណៈ និងសូយ សីហា មិនធ្លាប់ជួបគ្នាពីមុនមកទេ ដូច្នេះសម្រាប់ការប៉ះគ្នាពេល នេះទាំងសងខាងមានការញញើតគ្នាខ្លះៗ ជាពិសេសនៅទឹកទី១គេទាំង២មិនហ៊ានសំរុកដាក់គ្នាភ្លាមៗនោះទេ ។ វណ្ណៈបានប្រើស្នៀតជើងទាត់ជន្លទៅលើសីហាមុន សីហាបានត្រឹមគេចចេញ និងវាយតបមកវិញស្រាលៗ។ ការវាយទៅវាយមករវាងគូប្រកួតទាំង២នៅទឹកទី១ គឺមិនទាន់មានអ្វីដែលគួរឱ្យចាប់អារម្មណ៍ឡើយ។ លុះឈានចូលដល់ទឹកទី២ ដូចជាមានការកើនកម្តៅជាងមុនបន្តិច ព្រោះថាមានការប្រើកែងនិងជង្គង់ ។ វណ្ណៈ ស្នៀតជង្គង់របស់គេគឺជំនាញពេលចូលកៀកវាយសំដៅពោះទឹកសីហាមិនប្រណីឡើយ តែត្រូវសីហាបុកកែងសងវិញ។ ការបញ្ចេញផ្លែកែងនិងជង្គង់ដាក់គ្នា នៅទឹកទី៣នេះឃើញថាស្វិតស្វាញយ៉ាងខ្លាំង ប៉ុន្តែសីហានៅញញើតស្នៀតជង្គង់របស់វណ្ណៈជាង ដូច្នេះគេត្រូវបង្ខំចិត្តដកថយជាច្រើនលើក។ ក្នុងស្ថានភាពសីហាដុនដានជាងទៅហើយនោះ ធ្វើឱ្យវណ្ណៈមានឱកាសវាយសំរុកតាមអំពើចិត្តរហូតយកឈ្នះពិន្ទុបាន ។
ឡុង សុភី មកពីក្លឹបសាលវ័ន្តកីឡា ស្មើពិន្ទុពេជ្រ សីហា ។ រវាងគូនេះគឺសីហាអ្នកដែលត្រូវត្រៀមឡើងទៅប្រកួតជាលក្ខណៈអន្តរជាតិ ដែលរៀបចំធ្វើឡើងដោយស្ថានីយទូរទស្សន៍ CTN នៅក្នុងពេលឆាប់ៗខាងមុខនេះ ដូច្នេះការប្រកួតថ្ងៃនេះខាង CTN មានបំណងចង់ឱ្យសីហាមានការរីកចម្រើនខាងផ្នែកបច្ចេកទេស និងកម្លាំងកាយបន្ថែមទៀតប៉ុណ្ណោះ ។
ភេឌីស្បោង គឹមសាន មកពីក្លឹបយុវជនអង្គរ ប្រកួតជាលក្ខណៈសាកលអាជីពបានយកឈ្នះយ៉ាន់ កុយ មកពីក្លឹបតាឡីដំរីមានឫទ្ធិ នៅទឹកទី៥ ដោយបានវាយយ៉ាន់ កុយ ឱ្យដួលអុកគូទក្រោកលែងរួច ។
ផុន ផុល មកពីក្លឹបតាព្រហ្មមានជ័យ យកឈ្នះតក់ សោភ័ណ្ឌ មកពីក្លឹបអេភូថងកីឡា ដោយពិន្ទុ ។
អ៊ុង វីរៈ ចាញ់ពិន្ទុុឡុង សុវណ្ណឌឿន
អ៊ុង វីរៈ មកពីក្លឹបកងពលតូចឆត្រយោង៩១១ ប្រកួតចាញ់ពិន្ទុឡុង សុវណ្ណឌឿន មកពីក្លឹបសាលវ័ន្តកីឡា ទាំងមិនអស់ចិត្ត នៅលើសង្វៀនស្ថានីយទូរទស្សន៍ប៉ុស្តិ៍លេខ៥ កាលពីថ្ងៃទី២៩ ឧសភាកន្លងមក ។ គូនេះប្រកួតគ្នាក្នុងលក្ខណៈជាគូឯក ។ សុវណ្ណឌឿន ដែលល្បីខាងស្នៀតកែងនិងជង្គង់នោះនៅទឹកទី១ គេគ្រាន់តែធ្វើការស្ទាបស្ទង់កម្លាំងវីរៈសិន ដោយវាយទៅលើមុខវីរៈស្រាលៗប៉ុណ្ណោះ ចំណែកវីរៈក៏មិនច្រឡោតភ្លាមដែរ ។
ការស្ទង់សមត្ថភាពគ្នារវាងគូនេះបានអូសបន្លាយរហូតដល់ទឹកទី២ ។ លុះឈានដល់ទឹកទី៣ ខណៈពេលសុវណ្ណឌឿនបញ្ចេញស្នៀតកណ្តាប់ដៃវាយចូលមុខវីរៈច្រើនធ្វើឱ្យវីរៈក្តៅស្លឹកត្រចៀក សុ្ទុះទាំងកំរោលទៅវាយសងវិញ ។ ប៉ុន្តែសុវណ្ណឌឿន រក្សាជំហរបានល្អដោយគ្រាន់តែលោតគេចចេញ ហើយការពារមិនឱ្យវីរៈវាយត្រូវប៉ុណ្ណោះ ។ ទឹកទី៣និងទឹកទី៤ ទាំងកម្លាំងនិងបច្ចេកទេសគឺមានប្រៀបស្មើគ្នា ។ ចូលដល់ទឹកទី៥ សុវណ្ណឌឿនបើកការវាយសំរុក សាជាថ្មីបង្ខំឱ្យវីរៈដកថយទាំងភ្នែកនៅលើ កញ្ចឹងក។ ប៉ុន្តែវីរៈចិត្តរបស់គេសឿងគ្រាន់បើដែរ ទោះបីជាសុវណ្ណឌឿនវាយសង្គ្រប់យ៉ាងណាក៏ដោយក៏គេនៅតែតស៊ូទប់ទល់បានយ៉ាងល្អ មិនបណ្តោយឱ្យសុវណ្ណឌឿនធ្វើអ្វីស្រេចតែ ចិត្តនោះឡើយ ។
ការប្រកួតរវាងធិន សុវណ្ណ មកពីក្លឹបកងពលតូចលេខ៧០ និងណាំ នឿន មកពីក្លឹបសម្រែករាជសីហ៍បង្ក្រាបគ្រឿងញៀន ត្រូវអាជ្ញាកណ្តាលបណ្តេញចុះពីលើសង្វៀនទាំង២នាក់នៅក្នុងទឹកទី៣ ។ មន្ត្រីបច្ចេកទេសបានចោទប្រកាន់ទៅលើធិន សុវណ្ណថាបង្កបញ្ហា ព្រោះគេមើលឃើញសុវណ្ណវាយមិនអស់ពីសមត្ថភាពទាល់តែសោះ ដូច្នេះបើទុកនៅនាំឱ្យអ្នកលេងភ្នាល់ស៊ីលុយបានចិត្ត ដូច្នេះគណៈកម្មការសម្រេចមិនប្រកាសលទ្ធផល ឡើយ ។
សេង កំសត់ មកពីក្លឹបខេមរិន្ទមានឫទ្ធិ យកឈ្នះយិន បូរិន មកពីក្លឹបកងពលធំអន្តរាគមន៍លេខ៣ព្រះវិហារ ដោយពិន្ទុ ។ ម្ទេស ខ្មាំង មកពី ក្លឹបអរុណរះកីឡា វាយផ្តួលថន វាសនា មកពីក្លឹប នាគរាជមានជ័យឱ្យសន្លប់ក្នុងទឹកទី២៕
ចែករំលែកព័តមាននេះ