រាជធានីភ្នំពេញ ៖ ក្រោយពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យសមត្ថកិច្ចទាំង១៤ខណ្ឌ ឃាត់ពិនិត្យរថយន្តបំពាក់អំពូលភ្លើងខុសបច្ចេកទេស រួចមក…
រាជធានីភ្នំពេញ ៖ ក្រោយពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យសមត្ថកិច្ចទាំង១៤ខណ្ឌ ឃាត់ពិនិត្យរថយន្តបំពាក់អំពូលភ្លើងខុសបច្ចេកទេស រួចមក ម្ចាស់រថយន្ត FORD មួយគ្រឿងពាក់ស្លាកលេខ ភ្នំពេញ 2BY-8286 បានចូលខ្លួនមកធ្វើកិច្ចសន្យា និងដោះចេញអំពូលភ្លើងចេញដោយខ្លួនឯង នៅព្រឹកថ្ងៃទី៣១ ខែមករា ឆ្នាំ២០២៤នេះ ។
ម្ចាស់រថយន្ត(ដែលសមត្ថកិច្ចមិនបង្ហាញអត្តសញ្ញាណ) បានចូលខ្លួនមកប៉ុស្តិ៍នគរបាលរដ្ឋបាលទួលសង្កែ២ ខណ្ឌប្ញស្សីកែវ ដើម្បីដោះអំពូលភ្លើងកែច្នៃខុសលក្ខណៈបច្ចេកទេស ចេញនៅចំពោះមុខសមត្ថកិច្ច និងធ្វើការអប់រំ ហើយឲ្យធ្វើកិច្ចសន្យាបញ្ឈប់បំពាក់អំពូលភ្លើងដោយខុសច្បាប់ តទៅទៀត ។
សូមរម្លឹកថា កាលពីថ្ងៃទី២៩ ខែមករា ឆ្នាំ២០២៤ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាដល់កម្លាំងសមត្ថកិច្ច ចុះអនុវត្តរឹតបន្តឹងច្បាប់ចរាចរណ៍ផ្លូវគោក ទាំង១៤ខណ្ឌ និងកម្លាំងជំនាញការិយាល័យនគរបាលចរាចរណ៍ផ្លូវគោក ធ្វើការត្រួតពិនិត្យអំពូលភ្លើង ឧបករណ៍ កែច្នៃខុសលក្ខណៈបច្ចេកទេស បង្កឱ្យប៉ះពាល់ដល់សណ្តាប់ធ្នាប់សាធារណៈ ជាពិសេសប៉ះពាល់ដល់ការធ្វើដំណើររបស់អ្នកដទៃ ។
លោកស្នងការ បានបញ្ជាក់ច្បាស់ៗថា ក្នុងករណីម្ចាស់យានយន្តមានការបំពាក់ និងកែច្នៃអំពូលភ្លើង ឧបករណ៍ ខុសលក្ខណៈបច្ចេកទេសបែបនេះ សូមធ្វើការដកចេញជាបន្ទាន់ បើមិនដូច្នោះនោះទេ សមត្ថកិច្ចនឹងចាត់វិធានការដ៏តឹងរឹងដល់ម្ចាស់រថយន្តកែច្នៃ និងជាពិសេសរាល់ម្ចាស់យានយន្តទាំងអស់ ក៏ត្រូវនាំគ្នាពិនិត្យយានយន្តផ្ទាល់ខ្លួន ដែលបំពាក់ឧបករណ៌ខុសបច្ចេកទេសខុសច្បាប់ ដែលបង្កផលប៉ះពាល់ដល់អ្នកដទៃ និងបាត់បង់សណ្ដាប់ធ្នាប់សាធារណៈ គឺត្រូវដោះចេញឲ្យបានមុនពេល ដែលកម្លាំងសមត្ថកិច្ចអនុវត្តចាត់វិធានការចំពោះការកែច្នៃបំពាក់ខុសបច្ចេកទេសនេះ ។
ពាក់ព័ន្ធបញ្ហានេះប្រជាពលរដ្ឋខ្មែរ កំពុងមានការព្រួយបារម្ភចំពោះរថយន្ត ដែលមិនបានគោរពច្បាប់ចរាចរណ៍ ដោយបំពាក់ភ្លើងបំភ្លឺ កែច្នៃបន្ថែមអំពូលឡាស៊ែរ ឫ LED ប្រើមិនត្រឹមត្រូវ ខុសលក្ខណៈបច្ចេកទេស បញ្ហានេះក៏ជាផ្នែកមួយដែលរួមចំណែកធ្វើឲ្យមានករណីគ្រោះថ្នាក់ចរាចរណ៍ជាបន្តបន្ទាប់ផងដែរ ខណៈប្រជាពលរដ្ឋធ្វើដំណើរលើដងផ្លូវជាមួយគ្នាជួបការប្រឈម និងចង់ឲ្យសមត្ថកិច្ចមានចំណាត់ការលើបញ្ហានេះឲ្យមានប្រសិទ្ធភាព ៕
ចែករំលែកព័តមាននេះ