កម្មករអូសរទេះប្រមាណជាង៥០នាក់ផ្ទុះការតវ៉ានៅលើស្ពានមិត្តភាពកម្ពុជា-ថៃ ក្រោយពីមន្ត្រីគយ និងរដ្ឋាករ រឹតបន្ដឹងការត្រួតពិនិត្យទំនិញតម្រូវឱ្យបង់ពន្ធ
ខេត្តបន្ទាយមានជ័យ ៖ កម្មករអូសរទេះប្រមាណជាង៥០នាក់ផ្ទុះការតវ៉ានៅលើស្ពានមិត្តភាពកម្ពុជា-ថៃ ក្រោយពីមន្ត្រីគយ និងរដ្ឋាករ រឹតបន្ដឹងការត្រួតពិនិត្យទំនិញតម្រូវឱ្យបង់ពន្ធ ដែលការតវ៉ានេះ កើតឡើងកាលពីល្ងាចថ្ងៃទី៣០ ខែមករា ឆ្នាំ២០២៤ នៅច្រកទ្វារអន្តរជាតិប៉ោយប៉ែត ក្រុងប៉ោយប៉ែត។
បើតាមកម្មករអូសរទេះ បានប្រាប់ឱ្យដឹងថា «មូលហេតុដែលពួកគាត់ធ្វើការតវ៉ានៅលើស្ពានមិត្តភាពកម្ពុជា-ថៃ ច្រកទ្វារអន្តរជាតិប៉ោយប៉ែតកម្ពុជា ឈមច្រកខ្លងលឹក ប្រទេសថៃនោះ គឺតវ៉ាសុំឱ្យមន្ត្រីគយ និងរដ្ឋាករច្រកទ្វារអន្តរជាតិប៉ោយប៉ែត មានការលើកលែងដូចកាលពីមុន ក្រោយពីមានការរឹតបន្ដឹងនិងត្រួតពិនិត្យការដឹកទំនិញចូលមកកម្ពុជា ហើយតម្រូវឱ្យបង់ពន្ធ ដោយមិនលើកលែងឡើយ មិនថា តិចតួចយ៉ាងណាក៏ដោយ»។
កម្មករអូសរទេះ បានបញ្ជាក់ថា «ការតវ៉ាខាងលើនេះ គឺដើម្បីឱ្យមន្ត្រីគយ និងរដ្ឋាករច្រកទ្វារអន្តរជាតិប៉ោយប៉ែត មានការលើកលែងដូចកាលពីមុន។ ដោយសារការដឹកតាមរទេះតិចតួចចេញពីផ្សាររ៉ុងក្លឿ ប្រទេសថៃ ចូលមកក្រុងប៉ោយប៉ែតនោះ មិនតម្រូវឱ្យបង់ពន្ធនោះទេ និងឱ្យពួកគាត់ដឹកតាមរទេះជាធម្មតាវិញ ព្រោះថា នេះគឺជាមុខរបរពួកគាត់សម្រាប់ជីវភាពគ្រួសារ នៅពេលពួកគាត់ស៊ីឈ្នួលដឹកបានបន្តិចបន្តួច ដូច្នេះសុំឱ្យមានការលើកលែងដូចកាលពីមុន»។
មន្ត្រីគយ និងរដ្ឋាករ ច្រកទ្វារអន្តរជាតិប៉ោយប៉ែត ក៏បានប្រាប់ឱ្យដឹងដែរថា «នេះជាការណែនាំពីអគ្គនាយកដ្ឋានគយ និងរដ្ឋាករកម្ពុជា ដើម្បីរកចំណូលជូនរដ្ឋ។ ហើយការអនុវត្តនេះ តាមច្បាប់គយ និងរដ្ឋាករច្រកទ្វារអន្តរជាតិប៉ោយប៉ែត ដោយសហការជាមួយមន្ត្រីចម្រុះ ស្នាក់ការត្រួតពិនិត្យច្រកទ្វារអន្តរជាតិប៉ោយប៉ែត ដើម្បីរឹតបន្ដឹងការត្រួតពិនិត្យទំនិញនាំចូលកម្ពុជា ដឹកតាមរទេះ និងរថយន្តដែលអាជីវករចេញ-ចូល ហើយលួ.ចលា.ក់បង្ក.ប់ទំនិញ បណ្តាលឱ្យបាត់ចំណូលរបស់រដ្ឋ»។
មន្ត្រីគយ និងរដ្ឋាករ បានបញ្ជាក់ថា «ការអនុវត្តន៍កន្លងមក គឺមានការអនុគ្រោះ និងលើកលែងច្រើន ហើយនឹងមនោសញ្ចេតនាច្រើនសម្រាប់កម្មករអូសរទេះ ដែលមានច្រើនក្រុម ដោយក្នុង១ក្រុម មានប្រមាណ៤ទៅ៥រទេះក្នុង១ថ្ងៃ ហើយរទេះ១គ្រឿងដឹកជញ្ជូនមិនតិចជាង១០ជើងនោះទេ ដូចជាកណ្តៀរ ទើបបណ្តាលឱ្យបាត់បង់ចំណូលរដ្ឋ។ ហើយនេះ ជាការណែនាំពីអគ្គនាយកដ្ឋានគយ និងរដ្ឋាករកម្ពុជា ត្រូវតែរឹតបន្ដឹងការត្រួតពិនិត្យទំនិញគេចពន្ធ ដើម្បីរកចំណូលពន្ធជូនរដ្ឋវិញ»។
លោក វ៉ាន់ ដារ៉ាន់ ប្រធានស្នាក់ការត្រួតពិនិត្យច្រកទ្វារអន្តរជាតិប៉ោយប៉ែត បានបញ្ជាក់ដែរថា «ក្រោយពេលសមត្ថកិច្ចចម្រុះ ចុះរឹតបន្ដឹងការត្រួតពិនិត្យទំនិញគេចពន្ធ ដែលដឹកតាមរថយន្តអាជីវករចេញ-ចូល និងតាមរទេះនាំចូលពីប្រទេសថៃ ដើម្បីរកចំណូលជូនរដ្ឋនោះ ស្រាប់តែកម្មករអូសរទេះប្រមាណជាង៥០នាក់ នាំគ្នាផ្ទុះការតវ៉ានៅលើស្ពានមិត្តភាពកម្ពុជា.ថៃ ដើម្បីសុំឱ្យមន្ត្រីគយ និងរដ្ឋាករ លើកលែងដូចកាលពីមុន ប៉ុន្តែមិនអាចលើកលែងបានឡើយ ព្រោះធ្វើឱ្យប៉ះពាល់ដល់ចំណូលរដ្ឋ»៕
ចែករំលែកព័តមាននេះ