នាយកដ្ឋានឧតុនិយមថៃ បានប្រកាសឱ្យដឹងថា រដូវប្រាំងឆ្នាំ២០២៤នេះ ត្រូវបានព្យាករណ៍ថា នឹងមានសភាពធ្ងន់ធ្ងរខុសពីធម្មតា ដោយសារតែការកើនឡើងនៃសីតុណ្ហភាពលើសពីមធ្យមភាគរាល់ឆ្នាំ ខណៈដែលបរិមាណនៃភ្លៀងកក់ខែ នឹងមាន
ប្រទេសថៃ ៖ នាយកដ្ឋានឧតុនិយមថៃ បានប្រកាសឱ្យដឹងថា រដូវប្រាំងឆ្នាំ២០២៤នេះ ត្រូវបានព្យាករណ៍ថា នឹងមានសភាពធ្ងន់ធ្ងរខុសពីធម្មតា ដោយសារតែការកើនឡើងនៃសីតុណ្ហភាពលើសពីមធ្យមភាគរាល់ឆ្នាំ ខណៈដែលបរិមាណនៃភ្លៀងកក់ខែ នឹងមានតិចជាងធម្មតា ៣០% ដែលអាចធ្វើឱ្យស្ថានភាពប្រឈមកាន់តែធ្ងន់ធ្ងរ។
ហើយរដូវប្រាំងឆ្នាំ២០២៤ នឹងចាប់ផ្តើមនៅចុងខែកុម្ភៈ រួចអូសបន្លាយរហូតដល់ចុងខែឧសភា ក្នុងអំឡុងពេលនេះ ប្រទេសថៃ បានត្រៀមខ្លួនរួចជាស្រេច ក្នុងការជួបប្រទះនូវរលកកំដៅដែលនឹងដុតកម្លោចតំបន់ជាច្រើន ជាមួយសីតុណ្ហភាពខ្ពស់បំផុត ត្រូវបានគេព្យាករណ៍ថា នឹងមានចន្លោះចាប់ពី ៤៣អង្សាសេ ទៅ ៤៤,៥អង្សាសេ ជាពិសេសចាប់ពីពាក់កណ្តាលខែមីនា ដល់ដើមខែឧសភា។
គួរកត់សម្គាល់ថា រៀងរាល់រដូវក្ដៅ ប្រទេសថៃតែងតែជួបប្រទះនឹងព្យុះតាមរដូវ ជាហេតុនាំឱ្យកើតមានខ្យល់កន្ត្រាក់ រន្ទះបា.ញ់ខែប្រាំង ហើយនឹងភ្លៀងកក់ខែ ដែលបាតុភូតធម្មជាតិទាំងនេះ តែងតែបង្កឱ្យមានការខូចខាតយ៉ាងដំណំ ដោយបំផ្លិចបំផ្លាញទ្រព្យសម្បត្តិ ផលដំណាំ ភ្លើងឆេះព្រៃ និងបង្កគ្រោះថ្នាក់ដល់អាយុជីវិ.តមនុស្ស ព្រមទាំងសត្វ។
អ្វីដែលនាយកដ្ឋានឧតុនិយម និងអាជ្ញាធរថៃ ជំរុញឱ្យពលរដ្ឋមានការប្រុងប្រយ័ត្ននោះ គឺហេតុការណ៍អគ្គិភ័យ និងភ្លើងឆេះព្រៃ ដែលមានហានិភ័យខ្ពស់នារដូវប្រាំងឆ្នាំនេះ។ ហើយហានិភ័យសុខភាព ដែលអាចកើតចេញពីរលកកំដៅ ក៏ត្រូវបានព្រមា.ន ជាពិសេសចំពោះក្រុមជនងាយរងគ្រោះដូចជា ៖ មនុស្សចាស់ កុមារ និងអ្នកដែលមានស្ថានភាពសុខភាពជំងឺរ៉ាំរ៉ៃ ។ ដូច្នេះប្រជាពលរដ្ឋ ត្រូវបានណែនាំឱ្យចៀសវាងការស្ថិតនៅក្នុងបរិយាកាសក្ដៅខ្លាំងក្នុងរយៈពេលយូរ ព្រោះថា អាចប្រឈមនឹងជំងឺដាច់សរសៃឈា.មខួរក្បាលជាដើម។
កាសែត Bangkok Post បានផ្សាយថា សីតុណ្ហភាពខ្ពស់បំផុត នឹងគ្របដណ្តប់បណ្តាខេត្តភាគខាងជើង និងភាគឦសាន ក្នុងនោះរួមមាន ៖ ខេត្តឈៀងរ៉ៃ, ម៉ែហុងសុន, ណងខៃ, សាខុន, ណាខន និងខេត្តខនខេន។ ខេត្តវាលទំនាបកណ្តាល ដូចជា ៖ ណាខនសុវណ្ណ, ឧទៃថានី និង ខេត្តឆៃណាត ដែលស៊ីតណ្ណភាពនឹងឡើងដល់ ៤៤អង្សាសេ ។ ខណៈពេលដែលខេត្តភាគខាងត្បូង ចាប់ពីខេត្តប្រាចួបគិរីខណ្ឌ ដល់ខេត្តយ៉ាឡា នឹងឡើងដល់កម្រិត ៤១អង្សាសេ ប្រហាក់ប្រហែលនឹងទីក្រុងបាងកក និងខេត្តជុំវិញផងដែរ។
បើតាមសារព័ត៌មាន The Nation បានអះអាងថា ស្ថានភាពក្ដៅខ្លាំងខុសពីរាល់ឆ្នាំនេះ ដោយសារតែប្រទេសថៃ នៅតែស្ថិតក្រោមឥទ្ធិពលនៃបាតុភូតអែលនីណូ បូករួមជាមួយឥទ្ធិពលនៃប្រព័ន្ធសម្ពាធខ្ពស់ពីប្រទេសចិន ដែលនឹងគ្របដណ្តប់ទៅលើប្រទេសថៃផ្នែកខាងលើ។
ក្រៅពីរលកកំដៅ គ្រោះរាំងស្ងួត គឺជារឿងប្រឈម ដោយសារបរិមាណភ្លៀងធ្លាក់តិច និងបណ្តាលឱ្យខ្វះខាតទឹក សម្រាប់ផ្គត់ផ្គង់លើតម្រូវការប្រើប្រាស់ប្រចាំថ្ងៃ ជាពិសេសសម្រាប់កសិកម្ម ខណៈប្រជាពលរដ្ឋរស់នៅក្នុងតំបន់ឆ្ងាយពីប្រភពទឹក ត្រូវបានជំរុញឱ្យប្រើប្រាស់ទឹកដោយសន្សំសំចៃ និងត្រៀមលក្ខណៈទប់ទល់ជាមួយស្ថានភាពដ៏លំបាកនេះ៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ