បុរសម្នាក់បើករថយន្តមួយគ្រឿង ម៉ាកឡិចស៊ីស RX-330 ក្នុងល្បឿនលឿន រួចបុ.កពីក្រោយមម៉ូតូ១គ្រឿង បណ្ដាលឱ្យស្ត្រីជាប្រពន្ធរងរបួសធ្ងន់ ចំណែកប្ដីរងរបួសស្រាល ។ ខណៈពេលនោះ អ្នកបើកបររថយន្តរូបនោះ ក៏ព្រមជួយដឹកជនរងគ្រោះទៅកាន់គ្លីនិក ដើម្បីសង្គ្រោះ ហើយក៏ប្រើល្បិ.ច
រាជធានីភ្នំពេញ ៖ បុរសម្នាក់បើករថយន្តមួយគ្រឿង ម៉ាកឡិចស៊ីស RX-330 ក្នុងល្បឿនលឿន រួចបុ.កពីក្រោយមម៉ូតូ១គ្រឿង បណ្ដាលឱ្យស្ត្រីជាប្រពន្ធរងរបួសធ្ងន់ ចំណែកប្ដីរងរបួសស្រាល ។ ខណៈពេលនោះ អ្នកបើកបររថយន្តរូបនោះ ក៏ព្រមជួយដឹកជនរងគ្រោះទៅកាន់គ្លីនិក ដើម្បីសង្គ្រោះ ហើយក៏ប្រើល្បិ.ចយកលុយ និងទូរសព្ទ ព្រមទាំងឯកសាររបស់ជនរងគ្រោះដាក់ក្នុងរថយន្តរបស់ខ្លួន ដោយធានាអះអាងថា «នឹងដោះស្រាយជូនជនរងគ្រោះ»។ ប៉ុន្តែបន្ទាប់ពីដឹកជនរងគ្រោះដល់មន្ទីរសម្ភព និងព្យាបាលជំងឺរួច ស្រាប់បុរសរូបនេះឆ្លៀតឱកាសបើករថយន្តរត់គេចខ្លួនបាត់ ដោយយកទាំងលុយ និងទូរស័ព្ទ ព្រមទាំងរបស់របរមួយចំនួនរបស់ជនរងគ្រោះទៅបាត់ លុះជនរងគ្រោះខលទៅ ដើម្បីឱ្យត្រឡប់មកវិញ ប៉ុន្តែខលចូលច្រើនដង បុរសរូបនោះមិនលើកទូរស័ព្ទឡើយ។
ហេតុការណ៍ខាងលើនេះ បានកើតឡើងកាលពីវេលាម៉ោង២រសៀល ថ្ងៃទី២៨ ខែមករា ឆ្នាំ២០២៤ នៅតាមផ្លូវក្រវាត់ក្រុងទី៣ ត្រង់ចំណុចភ្លើងស្តុបវត្តជន្លុងម្លូ ស្ថិតក្នុងភូមិព្រែរងៀង សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
ចំណែកជនរងគ្រោះជាប្រពន្ធខាងលើមានឈ្មោះ សួង សម្បូរ អាយុ៣៨ឆ្នាំ និងប្ដីឈ្មោះ ភឺន សុភន អាយុ៤២ឆ្នាំ បច្ចុប្បន្នមានទីលំនៅភូមិថ្មី ឃុំកណ្ដោលដុំ ក្រុងច្បារមន ខេត្តកំពង់ស្ពឺ ជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ កំពង់ស្ពឺ1I-7559។ ចំណែករថយន្តបង្កវិញ ម៉ាកឡិចស៊ីស RX-330 ពណ៌ខ្មៅ ពាក់ស្លាកលេខ ភ្នំពេញ2BC-5643 បើកបរដោយបុរសមិនស្គាល់អត្តសញ្ញាណម្នាក់ ។ ជនរូបនេះបានយកទ្រព្យសម្បត្តិរបស់ជនរងគ្រោះរួមមាន ៖ ទូរស័ព្ទដៃ១គ្រឿង, លុយចំនួន១៥០ដុល្លារ, ប្រាក់រៀលចំនួន១០ម៉ឺនរៀល, ឯកសារបង់ប្រាក់ធនាគារ, ថ្នាំពេទ្យ និងកាតការងាររោងចក្រ ព្រមទាំងមួកសុវត្ថិភាពផងដែរ។
បើតាមប្រភពពីជនរងគ្រោះ បានប្រាប់ឱ្យដឹងថា «នៅមុនពេលកើតហេតុ ជនរងគ្រោះទាំង២នាក់ប្ដីប្រពន្ធ បានជិះម៉ូតូឌុបគ្នាធ្វើដំណើរក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ស្រាប់តែមានរថយន្តម៉ាកឡិចស៊ីស RX-330 មួយគ្រឿង បើកបរក្នុងល្បឿនលឿន ទៅបុ.កចំពីក្រោយពេញទំហឹងតែម្ដង បណ្ដាលឱ្យដួលម៉ូតូ ហើយធ្វើឱ្យស្ត្រីជាប្រពន្ធរងរបួសធ្ងន់ ចំណែកប្ដីរងរបួសស្រាល រីឯម៉ូតូវិញ រងការខូចខាតខ្ទេច១កំណាត់ខាងក្រោយ»។
ប្រភពដដែល បានបញ្ជាក់ប្រាប់ឱ្យដឹងបន្តថា «ក្រោយពេលកើតហេតុ ជនបង្កជាម្ចាស់រថយន្តរូបនោះ បានធានាអះអាងថា «នឹងទទួលខុសត្រូវដោះស្រាយជាមួយជនរងគ្រោះ»។ បន្ទាប់មក ជនបង្កក៏ប្រមូលយកទ្រព្យសម្បត្តិរបស់ជនរងគ្រោះ ដាក់ក្នុងរថយន្តរបស់ខ្លួន រួចបានជួយលើកសែងស្ត្រីរងគ្រោះដាក់ក្នុងរថយន្ត ហើយដឹកទៅកាន់មន្ទីរពហុព្យាបាល និងសម្ភពវិសាល នៅម្ដុំជម្ពូវ័ន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ»។
ប្រភពដដែលបន្តទៀតថា «លុះពេលទៅដល់មន្ទីរពេទ្យ ឆ្លៀតពេលដែលជនរងគ្រោះភ្លេចខ្លួន បុរសរូបនោះក៏បានយកទ្រព្យសម្បត្តិរបស់ជនរងគ្រោះទាំងអស់ខាងលើ រួចបើករថយន្តរត់គេចខ្លួនបាត់ស្រមោលតែម្ដង»។
ចំណែកសាច់ញាតិជនរងគ្រោះ បានប្រាប់ឱ្យដឹងបន្ថែមទៀតថា «បន្ទាប់មក ជនរងគ្រោះជាប្ដី បានទូរស័ព្ទដើម្បីសួរនាំ និងហៅឱ្យបុរសរូបនោះឱ្យត្រឡប់មកវិញ ដើម្បីនិយាយគ្នា ប៉ុន្តែខលចូលច្រើនដងហើយ បុរសជាជនបង្ករូបនោះមិនទទួលសោះ។ ទើបពួកគាត់ដាក់ពាក្យប្ដឹងឱ្យនគរបាលប៉ុស្តិ៍ភ្លើងឆេះរទេះ ជួយធ្វើការស្រាវជ្រាវស្វែងរកជនបង្ក ឱ្យចូលខ្លួនមកដោះស្រាយគ្នាតាមផ្លូវច្បាប់៕
ចែករំលែកព័តមាននេះ