តារាចម្រៀងអ្នកនាង ស៊ុន ស្រីពេជ្រ បានបង្ហោះសារដាស់តឿនចំពោះអ្នកដែលត្រូវជ្រើសរើសដៃគូជីវិតគួរគិតគូរឱ្យបានច្បាស់លាស់មុនធ្វើការសម្រេចចិត្ត ខណៈពេលដែលអ្នកនាងជាស្ត្រីមួយរូប ជួបរឿងខកបំណងក្នុងរឿងខាងលើ ក្លាយជា
រាជធានីភ្នំពេញ ៖ តារាចម្រៀងអ្នកនាង ស៊ុន ស្រីពេជ្រ បានបង្ហោះសារដាស់តឿនចំពោះអ្នកដែលត្រូវជ្រើសរើសដៃគូជីវិតគួរគិតគូរឱ្យបានច្បាស់លាស់មុនធ្វើការសម្រេចចិត្ត ខណៈពេលដែលអ្នកនាងជាស្ត្រីមួយរូប ជួបរឿងខកបំណងក្នុងរឿងខាងលើ ក្លាយជាស្ត្រីមេម៉ាយរហូតមកទល់នាពេលនេះ។
តារាចម្រៀងរូបនេះ បានចាត់ទុកការជ្រើសរើសដៃគូជីវិត គឺជារឿងសំខាន់ក្នុងការកសាងជីវិតគ្រួសារនាពេលអនាគត ដោយមិនមែនចេះតែយកៗឱ្យបាននោះឡើយ ។
អ្នកនាង ស៊ុន ស្រីពេជ្រ បានលើកឡើងតាមបណ្តាញសង្គមថា «ដៃគូជីវិត គឺសំខាន់ខ្លាំងណាស់ មិនមែនចេះតែយកឱ្យបានៗនោះទេ បើរើសត្រូវ ជីវិតអ្នកនឹងមានសំណាងដល់ចាស់កោងខ្នង ព្រោះអាចរស់នៅជាមួយមនុស្សល្អ ចេះយល់ចិត្ត ដឹងទុក្ខធុរៈ និងមានគោលដៅរួមគ្នាក្នុងការកសាងគ្រួសារមួយ ដែលមានតែស្នាមញញឹម និងសុភមង្គល។ តែបើអ្នករើសដៃគូជីវិតខុស នោះអ្នកនឹងស្ដាយក្រោយអស់មួយជីវិត ស្ដាយដែលមិនបានមើលចិត្តគ្នាឱ្យច្បាស់លាស់មុនពេលរៀបការ!» ។
នាងបញ្ជាក់ថា «ពេលស្រឡាញ់គ្នាដំបូងល្អ យូរទៅចេញចរិតអាត្មានិយម មួយថ្ងៃៗគិតតែធ្វើរឿងអត់ប្រយោជន៍ ជាពិសេសចូលចិត្តនាំបញ្ហាដាក់ផ្ទះ»។
អ្នកនាង ស៊ុន ស្រីពេជ្រ បានលើកឡើងបន្ថែមថា «ស្រមៃទៅមើលថា បើអ្នកត្រូវរស់នៅជាមួយមនុស្សបែបនេះ តើវាពិបាកប៉ុណ្ណា? នេះហើយដែលចាស់ៗតែងតែផ្តាំថា មុនជ្រើសរើសអ្នកណាស៊ើបឱ្យដឹងពីប្រវត្តិ ឬមើលចិត្តគ្នាសិនទៅ បើថាត្រូវចិត្ត ចាំរៀបការតាមក្រោយ ទើបវាមិនសូវខុស»។
គួរបញ្ជាក់ផងដែរថា តារាចម្រៀងអ្នកនាង ស៊ុន ស្រីពេជ្រ បានជួបរឿងបែកបាក់គ្រួសារ បន្ទាប់ពីនាងបានរៀបការជាមួយបុរសម្នាក់កាលពីអំឡុងឆ្នាំ២០២០ ខណៈពេលបច្ចុប្បន្ន នាងកំពុងរ៉ាប់រងចិញ្ចឹមបីបាច់ថែរក្សាកូនចំនួន២នាក់នៅក្នុងបន្ទុក ។
បើទោះបីជា នាងបានចែកផ្លូវគ្នាជាមួយអតីតស្វាមីអស់រយៈពេលប៉ុន្មានឆ្នាំនេះក៏ដោយ ប៉ុន្តែនាងមិនដែលបញ្ចេញរឿងរ៉ាវដែលស្ថិតនៅពីក្រោយនៃការបែកបាក់គ្រួសារឱ្យមហាជនបានដឹងនោះឡើយ។ កន្លងមក តារាចម្រៀងស្រីរូបនេះ បានប្រកាន់ជំហរនឹងមិនបញ្ចេញរឿងរ៉ាវបែបបាក់គ្រួសារឱ្យគេដឹងជាទូលំទូលាយនោះឡើយ ដោយសារតែនាងគិតថា មិនចង់ឱ្យកូនៗរបស់នាងដឹងរឿងនេះ ហើយមានអារម្មណ៍មិនល្អនៅពេលពួកគេធំដឹងក្តី ។
ទោះបីជាយ៉ាងណាក៏ដោយ បើទោះបីជា រស់មានឈ្មោះជាស្ត្រីមេម៉ាយកូន២ក៏ដោយ ប៉ុន្តែជាធម្មតា អ្នកនាង ស៊ុន ស្រីពេជ្រ តែងតែប្រឹងប្រែងតស៊ូក្រោកឈរយ៉ាងរឹងមាំ ដើម្បីអនាគតកូនទាំង២របស់នាង។ អ្នកនាង ស៊ុន ស្រីពេជ្រ បញ្ជាក់ថា «ក្រោយលែងលះស្វាមី ទ្រព្យជីវិតចុងក្រោយរបស់នាងនោះ គឺមានតែកូនប្រុសស្រី២នាក់នេះប៉ុណ្ណោះ» ៕
ចែករំលែកព័តមាននេះ