រាជាធានីភ្នំពេញ ៖ សិស្សសាលាដែលគេចសាលា មិនចូលរៀន ប្រមូលផ្ដុំគ្នាតាមហាងកាហ្វេ និងកញ្ចុះលេងហ្គេមតាមទូរសព្ទ និងជក់បារី កំពុងក្លាយជាក្តីព្រួយបារម្ភ ដែលអាជ្ញាធរមានសមត្ថកិច្ចគួរតែមានវិធានការដោះស្រាយជាបន្ទាន់ ។
ជាក់ស្ដែងរូបភាពប៉ុន្មានសន្លឹកថតដោយប្រជាពលរដ្ឋម្នាក់ ដែលបង្ហាញពីសកម្មភាពក្រុមសិស្សសាលា មិនចូលរៀនសូត្រ បែរជាប្រមូលផ្ដុំគ្នា នៅហាងកាហ្វេទៅវិញ ត្រូវបានចែករំលែកពាស់ពេញបណ្ដាញសង្គម ដោយគណនីហ្វេសប៊ុកឈ្មោះថា Chin Mony នៅព្រឹកថ្ងៃ២៣ ខែមករា ឆ្នាំ២០២៤នេះថា «គួរឲ្យរន្ធត់ ខ្ញុំមកទិញកាហ្វេនៅតាមផ្លូវថៃហ្គ័រ ឃើញក្មេងបឋមសិក្សាព្រែកថ្មី និងច្បារអំពៅ ប្រហែល១០នាក់ ម៉ោង៨:៤០ព្រឹក កំពុងហូបមីកំប៉ុង ជក់បារី បុកប៊ីយ៉ា(ស្នូកឃ័រ) មួយកំប្លេ ។ ខ្ញុំគិតថា ឪពុកម្តាយមិនដឹងទេ!» ។
ជុំវិញបញ្ហាខាងលើនេះ មានមហាជនជាច្រើន បានសំណូមពរទៅដល់គណៈគ្រប់គ្រងតាមគ្រិះស្ថានអប់រំ លោកគ្រូ អ្នកគ្រូ អាណាព្យាបាល ឪពុកម្តាយ ប្រជាពលរដ្ឋ ឬកម្លាំងសមត្ថកិច្ច ព្រមទាំងអាជ្ញាធរដែនដី មេត្តាមានវិធានការទៅលើបញ្ហានេះ ដើម្បីលុបបំបាត់រូបភាពមិនល្អនៅក្នុងសង្គម បើសិនមិនចូលរួមកែតម្រូវបញ្ហានេះទេ អនាគតក្មេងៗទាំងនោះ អាចក្លាយទៅជាជំងឺសង្គម។ ម្យ៉ាងការអភិវឌ្ឍប្រទេសជាតិ ក៏នឹងជួបការលំបាក ដោយសារតែក្មេងៗសិស្សសាលាមួយចំនួនតូចនេះ ។
កន្លងមក មានមន្ត្រី នៃមន្ទីរអប់រំយុវជន និងកីឡា រាជធានីភ្នំពេញ មួយរូបធ្លាប់បានថ្លែងប្រាប់អ្នកសារព័ត៌មានអោយដឹងថា ផ្នែកអប់រំ កំពុងតែផ្សព្វផ្សាយជារៀងរាល់ថ្ងៃ អំឡុងពេលគោរពទង់ជាតិ អំពីគុណវិបត្តិប្រើប្រាស់គ្រឿងញៀន គ្រឿងស្រវឹង និងល្បែងស៊ីសងផ្សេងៗ ទន្ទឹមនឹងនេះ ក៏បានហាមឃាត់សិស្សានុសិស្ស កុំឱ្យគេចសាលា និងដើរលេងក្នុងម៉ោងរៀនជាដើម។ ប៉ុន្តែសិស្សានុសិស្ស ដែលបានគេចសាលា ទៅដើរលេង និងពពាក់ពពូនគ្នានៅកន្លែងកម្សាន្តនានា វាហួសពីសមត្ថកិច្ចរបស់លោកគ្រូ អ្នកគ្រូ និងផ្នែកអប់រំ ដែលនេះ ទាមទារឱ្យអាជ្ញាធរ និងអាណាព្យាបាល ជួយដោះស្រាយវិញ ។
មន្ត្រីដដែលរូបនេះ បានអោយដឹងទៀតថា មន្ទីរអប់រំ គ្មាន(សមត្ថកិច្ច)អីទេ មានតែលទ្ធភាពផ្សព្វផ្សាយ វាអត់មានដាវអាជ្ញាសឹកណា ដែលទៅបង្ក្រាប ឬឃាត់ទេ។ ឧទារហណ៍ ឃាត់បានតែ(សិស្សទំនើង) គ្រាន់តែបញ្ចូនទៅសមត្ថកិច្ច ដើម្បីកិច្ចការអនុវត្តផ្លូវច្បាប់ ។ បញ្ហានេះ លោកស្នើសុំឱ្យសមត្ថកិច្ចចូលរួមជួយប្រមូលសិស្សដែលគេចសាលា ឬផ្តុំគ្នានៅកន្លែងកម្សាន្តនានា មកសួរនាំ ហើយបញ្ចូនទៅនាយកសាលា ឬអាណាព្យាបាល ដើម្បីធ្វើកិច្ចសន្យា អោយសិស្សទាំងនោះ ភ្ញាក់រលឹក និងភ័យខ្លាចខ្លះដែរ ៕
ចែករំលែកព័តមាននេះ