អតីតតារាភាពយន្តលោក យស បូវណ្ណៈ បានស្នើដល់មហាជនឱ្យរួមគ្នាចូលរួមលើតម្លៃនៃការសម្តែងសិល្បៈបុរាណខ្មែរ ក្នុងពេលដែលបច្ចុប្បន្ននេះ សិល្បៈបុរាណខ្មែរហាក់នៅមានគម្លាតឆ្ងាយខ្លាំងពីសិល្បៈសម័យ ពាក់ព័ន្ធទៅ
រាជធានីភ្នំពេញ ៖ អតីតតារាភាពយន្តលោក យស បូវណ្ណៈ បានស្នើដល់មហាជនឱ្យរួមគ្នាចូលរួមលើតម្លៃនៃការសម្តែងសិល្បៈបុរាណខ្មែរ ក្នុងពេលដែលបច្ចុប្បន្ននេះ សិល្បៈបុរាណខ្មែរហាក់នៅមានគម្លាតឆ្ងាយខ្លាំងពីសិល្បៈសម័យ ពាក់ព័ន្ធទៅនឹងតម្លៃនាពេលបច្ចុប្បន្ននេះ ។
ការលើកឡើងពីអតីតតារាភាពយន្តរូបនេះ បានធ្វើឡើង បន្ទាប់ពីលោកបានឃើញនូវព័ត៌មានដែលចុះផ្សាយជុំវិញទុក្ខកង្វល់ និងការមិនសប្បាយចិត្តចំពោះសិល្បករបុរាណ ចំពោះការមិនសូវឱ្យតម្លៃសម្រាប់ការសម្តែងម្ដងៗ បើប្រៀបធៀបការសម្តែងសិល្បៈសម័យ គឺមានភាពខុសគ្នាខ្លាំង ។
លោក យស បូវណ្ណៈ បានលើកឡើងតាមរយៈសំណេរដែលបានបង្ហោះនៅលើបណ្តាញសង្គមថា «វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន ! នេះជាពាក្យពេចន៍ដូនតាខ្មែរយើងផ្តែផ្តាំ ! ខ្ញុំបាទ យស បូវណ្ណៈ ជាទីប្រឹក្សារបស់ក្រសួងវប្បធម៌ និងវិចិត្រសិល្បៈមួយរូប ទទួលបន្ទុកក្រៅប្រទេស ក្នុងរដ្ឋកាលីហ្វ័រញ៉ា សហរដ្ឋអាមេរិក សូមកូនខ្មែរជួយពិចារណា និងចូលរួមថែរក្សា ការពារ អភិរក្សទាំងអស់គ្នា និងជួយលើកតម្លៃសិល្បៈវប្បធម៌ជាតិខ្មែរយើងផង កុំត.ថ្លៃអី»។
លោកបញ្ជាក់ថា «ថ្វីដ្បិតសម្ដែងត្រឹម៣០នាទី ឬ១០នាទីក្តី តែត្រូវរៀបចំខ្លួន និងសម្លៀកបំពាក់អស់រយៈពេលពេញមួយថ្ងៃ ដើម្បីគ្រងគ្រឿង និងមកុដដ៏ធ្ងន់នេះ»។ លោកថា «ខ្ញុំបាទ យស បូវណ្ណៈបម្រើលើវិស័យសិល្បៈ វប្បធម៌ខ្មែរ តាំងពីឆ្នាំ១៩៨០ រហូតមកដល់បច្ចុប្បន្នកាលនេះ រួមទាំងវិស័យភាពយន្តខ្មែរយើងផងដែរ ហើយក៏បន្តបណ្តុះបណ្តាលសិល្បៈវប្បធម៌ខ្មែរដល់កូនៗខ្ញុំទាំង៣នាក់ ក្លាយជានាដការិនី និងឧត្តមភរិយាខ្ញុំ និងកូនខ្មែរយើងនៅឯនាយសមុទ្រ ក្នុងរដ្ឋកាលីហ្វ័រញ៉ា សហរដ្ឋអាមេរិក ដើម្បីចូលរួមបម្រើក្នុងសង្គម និងបង្ហាញអំពីអត្តសញ្ញាណខ្មែរយើងពិតប្រាកដ ដល់ជនបរទេសឱ្យគេបានស្គាល់ យល់ គោរពស្រឡាញ់ នូវឃឿនសិល្បៈវប្បធម៌ខ្មែរ ដែលសម្បូរបែបរបស់ដូនតាខ្មែរ ដែលលោកបានបន្សល់ទុកមកឱ្យយើងកូនខ្មែរគ្រប់ៗគ្នា»។
ជាការកត់សម្គាល់ ជុំវិញបញ្ហានេះដែរ កន្លងមក ព្រឹទ្ធាចារ្យសិល្បៈ លោក ព្រឿង ឈាង ទីប្រឹក្សាក្រសួងវប្បធម៌ និងវិចិត្រសិល្បៈ បានអះអាងប្រាប់បណ្តាញសារព័ត៌មានក្នុងស្រុកមួយថា «លោកមិនច្រណែន ឬអន់ចិត្តអ្វីចំពោះការឱ្យតម្លៃជួលពេលទៅសម្តែងម្ដងនោះទេ។ ប៉ុន្តែលោកសូមឱ្យអ្នកគ្រប់គ្នាពិចារណា នៅពេលដែលជួលក្រុមបុរាណសម្ដែងម្ដងៗ ដែលគ្នាជាង១០០នាក់ក្នុងកម្មវិធីធំមួយ ឱ្យតម្លៃមិនស្មើអ្នកសិល្បៈសម័យល្បីមួយរូបផង»។
លោកបញ្ជាក់ថា «ការពិត យើងក៏មានការរង្កៀសចិត្តដែរ! ឧទាហរណ៍ ៖ យើងចេញទៅសម្ដែងម្ដងមានគ្នា១៥០នាក់ ទាំងអ្នកតែងខ្លួន អ្នកភ្លេង និងអ្នកសម្ដែង ហើយខាងក្រុមសម័យ មាន១៥នាក់ គេទួលបានម្នាក់៣០០០ដុល្លារ ចំពោះអ្នកល្បីខ្លាំង ។ ចំណែកពួកខ្ញុំ ទៅមួយក្រុមជាង១០០នាក់ សុំតែ១០០០ដុល្លារ នៅត.ថ្លៃទៀត សូមពិចារណាមើល តើយុត្តិធម៌ ឬអត់0x017d7 យើងមិនចង់បានដល់ស្មើគេ ឬសុំ៥០% នៃគេនោះទេ តែយើងសុំត្រឹមតម្លៃអ្នកល្បីម្នាក់ ចែកឱ្យយើងមួយក្រុមក៏បានដែរ តែសូមកុំត.ថ្លៃទៀត»៕
ចែករំលែកព័តមាននេះ