ថៅកែផលិតកម្មមហាហង្ស លោក អ៊ិន សុភីន បានបញ្ជាក់ពីពេលវេលារៀបចំពិធីមង្គលការកូនស្រី គឺស្រីស្រស់ ភិន សុដាលីស បន្ទាប់ពីតារាសម្តែងស្រីរូបនេះ បានភ្ជាប់ពាក្យជាមួយអនាគតស្វាមីវ័យក្មេងមួយរូប
រាជធានីភ្នំពេញ ៖ ថៅកែផលិតកម្មមហាហង្ស លោក អ៊ិន សុភីន បានបញ្ជាក់ពីពេលវេលារៀបចំពិធីមង្គលការកូនស្រី គឺស្រីស្រស់ ភិន សុដាលីស បន្ទាប់ពីតារាសម្តែងស្រីរូបនេះ បានភ្ជាប់ពាក្យជាមួយអនាគតស្វាមីវ័យក្មេងមួយរូប កាលពីថ្ងៃទី១៤ ខែមករា ឆ្នាំ២០២៤កន្លងទៅ ។
លោក អ៊ិន សុភិន បានលើកឡើងប្រាប់កោះសន្តិភាពឱ្យដឹងថា តាមការគ្រងទុក ពិធីមង្គលការរបស់កូនស្រី ភិន សុដាលីស នឹងរៀបចំធ្វើឡើងអំឡុងពេល៣ខែទៀត ក្រោយពិធីភ្ជាប់ពាក្យ ក្នុងពេលដែលពិធីនេះ នឹងរៀបចំឡើងជាលក្ខណៈធំដុំផងដែរ។
លោកបញ្ជាក់ថា អនាគតស្វាមីរបស់ ភិន សុដាលីស មិនមែនស្ថិតក្នុងសង្គមសិល្បៈនោះឡើយ ពោលគឺជាអ្នករកស៊ីម្នាក់ ហើយមុនពិធីភ្ជាប់ពាក្យនេះធ្វើឡើងជាផ្លូវការនោះ គឺអ្នកទាំង២បានភ្ជាប់ទំនាក់ទំនង និងស្វែងយល់ចិត្តគ្នាទៅវិញទៅមកប្រហែលជា៤ឆ្នាំមកហើយ ។ យ៉ាងណា ក្នុងនាមជាឱពុក លោកពិតជាសប្បាយរីករាយ ដែលបានឃើញកូនអាចស្វែងរកបុរសជាដៃគូរជីវិតសម្រាប់រួមរស់កសាងគ្រួសារជាមួយគ្នាដោយភាពរីករាយ និងមានសុភមង្គលនាពេលនេះ» ។
ជាការកត់សម្គាល់ មហាជន ជាពិសេសបណ្តាអ្នកលេងបណ្តាញសង្គមបានសម្តែងការភ្ញាក់ផ្អើលយ៉ាងខ្លាំង បន្ទាប់ពីគេបានឃើញរូបភាពជាច្រើនសន្លឹក ត្រូវបានបង្ហោះ ដោយបង្ហាញពីពិធីភ្ជាប់ពាក្យរបស់តារាសម្តែងនាង ភិន សុដាលីស ជាមួយបុរសវ័យក្មេងរូបសង្ហាមួយរូប ។ ពិធីភ្ជាប់ពាក្យរបស់តារាសម្តែងស្រីរូបនេះ បានធ្វើឡើងយ៉ាងឱឡារឹក ក្រោមវត្តមានឪពុកម្តាយទាំងសងខាង សាច់ញាតិ ព្រមទាំងមានអ្នកសិល្បៈមួយចំនួនបានចូលរួមផងដែរ ។ ចំណែកអនាគតស្វាមីរបស់ស្រីស្អាត ភិន សុដាលីស មានឈ្មោះថា «ហ៊ីន លាងហេង» ដែលជាបុរសវ័យក្មេងរូបសង្ហាមួយរូប មិនស្ថិតក្នុងចង្កោមសិល្បៈនោះឡើយ ។
ក្រោយពេលពិធីភ្ជាប់ពាក្យបានបញ្ចប់នោះ ស្រីស្អាត ភិន សុដាលីស ក៏បានបង្ហោះរូបភាពនៃទិដ្ឋភាពពិធីភ្ជាប់ អមជាមួយសារលើបណ្តាញសង្គមថា «អរគុណញាតិមិត្ត និងភ្ញៀវកិត្តិយសទាំងអស់ដែលបានចំណាយពេលវេលាដ៏មានតម្លៃចូលរួម និងអោយពរជ័យដល់ពួកយើងទាំង២ យើងខ្ញុំសូមជូនពរអោយញាតិមិត្ត និងភ្ញៀវកិត្តិយសទាំងអស់ ជួបប្រទះតែសេចក្តីសុខគ្រប់ក្រុមគ្រួសារ និងសំរេចគ្រប់បំណងប្រាថ្នា អ្នកអត់ទាន់មានគូរ សូមអោយជួបគូរសមប្រកបឆាប់ៗណា»។
គួរបញ្ជាក់ផងដែរថា មុនរៀបចំពិធីភ្ជាប់ពាក្យនេះឡើង កាលពីកន្លងមក តារាសម្តែងនាង ភិន សុដាលី ក៏ធ្លាប់បញ្ចេញរូបភាពស្និទ្ធស្នាល និងផ្អែមល្ហែមជាមួយគូរស្នេហ៍នៅលើបណ្តាញសង្គមផងដែរ ។ ជាក់ស្តែង តារាស្រីរូបនេះបានបង្ហោះរូបថតជាច្រើនសន្លឹកជាមួយបុរសជាគូរស្នេហ៍នៅក្នុងអាងហែលទឹកនាទីកន្លែងកម្សាន្តមួយកន្លែង ហើយទឹកមុខអ្នកទាំង២ហាក់មានអារម្មណ៍ល្អជាមួយគ្នាយ៉ាងខ្លាំង។ រូបភាពផ្អែមល្ហែមនេះ មិនត្រឹមតែ ភិន សុដាលីស នោះទេដែលបើកចំហដាក់មហាជន សូម្បីតែខាងប្រុសក៏បង្ហោះរូបស្និទ្ធស្នាលជាហូរហែផងដែរ។ លើសពីនេះ អ្នកទាំង២ ក៏ធ្លាប់លេចមុខចូលរួមក្នុងកម្មវិធីរៀបអាពាហ៍ពិពាហ៍ជាមួយគ្នាទៀតផង។
គួរំលឹកថា ៖ ស្ងាត់ៗ! ស្រីស្អាត ភិន សុដាលីស ភ្ជាប់ពាក្យជាមួយបុរសសង្ហាវ័យក្មេង១រូប តើជានរណា? ៕
ចែករំលែកព័តមាននេះ