បរទេស ៖ នៅថ្ងៃទី០៩ ខែមករា ឆ្នាំ២០២៤ គេហទំព័រ «The New York Times» បានចេញផ្សាយបញ្ជី៥២គោលដៅ ដែលត្រូវទៅទស្សានាក្នុងឆ្នាំ២០២៤ ក្រោមពាក្យស្លោកថា «មិនថាលោកអ្នកធ្វើដំណើរក្រោមហេតុផលអ្វី បញ្ជីរបស់យើងផ្តល់នូវការបំផុសគំនិត» ក្នុងចំណោមទីតាំងទេសចរណ៍ល្បីៗនៅទូទាំងពិភពលោក។
ហើយប្រាសាទកោះកេរ្តិ៍ ដែលត្រូវគេហៅថា «ប្រាសាទពីរ៉ាមីតនៃទ្វីបអាស៊ី» ក៏ត្រូវបាន nytimes.com ដាក់នៅលេខរៀងទី៣៤ ផងដែរ ដោយភ្ជាប់ជាមួយចំណងជើង «កោះកែរ កម្ពុជា ប្រាសាទដ៏ធំស្កឹមស្កៃនៃសតវត្សរ៍ទី១០ ដែលចុះក្នុងបញ្ចីអង្គការយូណេស្កូ»។
អ្នកសរសេរ Seth Sherwood របស់ Nytimes បានរៀបរាប់អំពីប្រាសាទកោះកេរ្តិ៍ យ៉ាងដូច្នេះថា ៖ «ក្រៅពីប្រាសាទអង្គរវត្តដ៏ល្បីល្បាញនៅកម្ពុជា យើងសូមណែនាំគោលដៅថ្មីសម្រាប់មនុស្សទាំងអស់នៅលើផែនដី នោះគឺជាប្រាសាទបុរាណមួយទៀត ដែលមានអាយុកាលចំណាស់រាប់សហស្សវត្សរ៍ នៅក្នុងតំបន់ក្បែរនោះ ហើយផ្តល់នូវជម្រើសដំណើរផ្សងព្រេងនៅតំបន់ដាច់ស្រាយាលជាងមុន»។
អ្នកសរសេរ Seth Sherwood របស់ Nytimes រៀបរាប់បន្តថា «ប្រាសាទកោះកេរ ត្រូវបានសាងសង់ឡើងក្នុងសតវត្សទី១០ ប្រហែល២សតវត្សមុនប្រាសាទអង្គរវត្ត។ ទីក្រុងដ៏ពិសិដ្ឋនៃកោះកេរ ត្រូវបានទទួលស្គាល់ដោយអង្គការយូណេស្កូជាបេតិកភណ្ឌពិភពលោក នៅក្នុងរដូវស្លឹកឈើជ្រុះ ឆ្នាំ២០២៣ ។ បេះដូងនៃទីតាំងនេះ គឺជាចង្កោមនៃប្រាសាទរាងរ៉ាមីតប្រាំពីរជាន់ មានទំហំ៤.៥ម៉ាយការ៉េ រួមមានប្រាសាទដ៏ធំខ្ពស់ អមដោយរូបសំណាក ចម្លាក់ថ្ម ស្រះសិប្បនិម្មិត និងដើមឈើដ៏ធំត្រឈឹងត្រឈៃ»។
អ្នកសរសេរ Seth Sherwood របស់ Nytimes រៀបរាប់បន្តថា «ខេត្តសៀមរាប ដែលជាទីក្រុងធំទី២ របស់ប្រទេសកម្ពុជា គឺជាមូលដ្ឋានដ៏ល្អបំផុតសម្រាប់អ្នកធ្វើដំណើរ។ កោះកេរ មានចម្ងាយប្រហែល៧០ម៉ាយពី ឬធ្វើដំណើរប្រហែល២ម៉ោង ដោយតាក់ស៊ីពីទីរួមខេត្តសៀមរាប ដែលទីក្រុងនេះទើបតែមានអាកាសយានដ្ឋានអន្តរជាតិដ៏ថ្មីស្រឡាង និងជាកន្លែងស្នាក់នៅដ៏ប្រណីតដូចជា សណ្ឋាគារ Babel Boutique Hotel ជាដើម»។
សូមបញ្ជាក់ថា រមណីយដ្ឋានបុរាណវិទ្យាកោះកេរ នៃអតីតរាជធានីលិង្គបុរ ឬឆោកគគ៌្យរ របស់ព្រះរាជាណាចក្រកម្ពុជា ត្រូវបានចុះក្នុងបញ្ជីសម្បត្តិបេតិកភណ្ឌរូបិយនៃមនុស្សជាតិរបស់អង្គការយូណេស្កូ នាថ្ងៃទី១៧ ខែកញ្ញា ឆ្នាំ២០២៣។
គណៈកម្មាធិការបេតិកភណ្ឌពិភពលោក សម្រេចដាក់បញ្ចូល ប្រាសាទកោះកេរ គឺជាសម្បត្តិបេតិកភណ្ឌពិភពលោក របស់អង្គការយូណេស្កូ នាកិច្ចប្រជុំគណៈកម្មាធិការបេតិកភណ្ឌពិភពលោកលើកទី៤៥ ឆ្នាំ២០២៣ នៅទីក្រុងរីយ៉ាត ប្រទេសអារ៉ាប៊ីសាអូឌីត។ យើងចងចាំជានិច្ចចំពោះព្រះរាជកិច្ចដ៏ខ្ពស់ខ្ពស់ និងស្វិតស្វាញបំផុត នៃព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ជម្រុញឲ្យជោគជ័យដ៏ត្រចះត្រចង់នេះ កើតមានឡើង។
ប្រជាជនខ្មែរបានសម្តែងនូវការអបអរសាទរជាអនេក ដែលរមណីយដ្ឋានបុរាណវិទ្យាកោះកេរ នៃអតីតរាជធានីលិង្គបុរ ឬ ឆោកគគ៌្យរ របស់ព្រះរាជាណាចក្រកម្ពុជា ត្រូវបានចុះក្នុងបញ្ជីសម្បត្តិបេតិកភណ្ឌរូបិយនៃមនុស្សជាតិរបស់អង្គការយូណេស្កូ។ UNESCO ទទួលស្គាល់ពីសារៈសំខាន់ផ្នែកប្រវត្តិសាស្ត្រ និងស្ថាបត្យកម្មពិសេសនៃរមណីយដ្ឋានបុរាណវិទ្យាកោះកេរ និងតម្លៃជាសាកលដ៏លេចធ្លោរបស់ខ្លួន ដែលជាកិត្តិយសដល់កេរដំណែលដ៏យូរអង្វែងនៃអរិយធម៌ខ្មែរ និងការខិតខំប្រឹងប្រែងរបស់ប្រទេសកម្ពុជា ដើម្បីការពាររតនសម្បត្តិរបស់ខ្លួនសម្រាប់មនុស្សជាតិជំនាន់ក្រោយ។
គូសបញ្ជាក់ថា ប្រាសាទកោះកេរ ត្រូវបានក្រសួងវប្បធម៌ និងវិចិត្រសិល្បៈ បានបញ្ជូនឯកសារស្នើសុំចុះបញ្ជីនៅតំបន់ប្រាសាទកោះកេរ ទៅអង្គការយូណេស្កូ តាំងពីខែមករា ឆ្នាំ២០២១។ ប្រាសាទកោះកេរ មានទំហីដីជាង ៨,៧០០ហិកតា ស្ថិតនៅក្នុងស្រុកគូលែន ឃុំស្រយង់ ខេត្តព្រះវិហារ។ ប្រាសាទប្រាសាទកោះកេរ មានលក្ខណៈជាប្រាសាទភ្នំ កម្ពស់ប្រមាណ៣៥ម៉ែត្រ ចែកចេញជា៧ថ្នាក់ បីដូចជាមហាចេតិយ៍ បែរមុខទៅរករាជធានីអង្គរ នៅឯទិសខាងលិច ដោយមានកាំជណ្តើរប្រមាណ៥៥កាំ។ តាមថ្នាក់ពីមួយទៅមួយ មានកម្ពស់៥ម៉ែត្រ មានផ្ទៃរាបប្រមាណ២ម៉ែត្រ តាមចន្លោះថ្នាក់នីមួយៗ។ នៅលើកំពូលប្រាសាទនេះ មានរូបចម្លាក់គ្រុឌធំៗជាច្រើន កំពុងសម្ដែងរិទ្ធិ ទ្រនូវសិវលឹ.ង្គ ត្រីភូវនេស្វរៈ នៅក្បែរគ្នានេះដែរ មានមាត់រន្ធអណ្តូង មួយទំហំ ៤x៤ម៉ែត្រ។
ប្រាសាទកោះកេរ្តិ៍ បានកសាងឡើងក្នុងរជ្ជកាលព្រះបាទជ័យវរ្ម័នទី៤ ឧទ្ទិសដល់អាទិទេពមួយអង្គឈ្មោះ ត្រីភូវនេស្វរៈ ក្នុងព្រហ្មញ្ញសាសនា។ ប្រាសាទកោះកេរ មានរូបរាងជាពីរ៉ាមីត ដោយមាន៧ជាន់ និងមានកម្ពស់៣៥ម៉ែត្រ។ សព្វថ្ងៃនៅរមណីយដ្ឋានប្រាសាទកោះកេរ មានសំណង់ប្រាសាទ សំណង់សាសនា ប្រព័ន្ធធារាសាស្ត្រចំនួន១២៧ ក្នុងនោះមានប្រាសាទដែលនៅមានរូបរាងចំនួន៥៦។ ចុះ! តើលោកអ្នកបានទៅដល់ប្រាសាទកោះកេរហើយឬនៅ?
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ