រឿងល្អ ឬអាក្រក់? ត្រីរាប់សិបតោនបោកបក់មកទើរនៅឆ្នេរប្រទេសហ្វីលីពីន
ហ្វីលីពីន ៖ ត្រីសាឌីន (Sardine) រាប់សិបតោនបានបោកបក់មកទើរនៅលើឆ្នេរសមុទ្រទីណូតូ
ហ្វីលីពីន ៖ ត្រីសាឌីន (Sardine) រាប់សិបតោនបានបោកបក់មកទើរនៅលើឆ្នេរសមុទ្រទីណូតូ
ហ្វីលីពីន ៖ ត្រីសាឌីន (Sardine) រាប់សិបតោនបានបោកបក់មកទើរនៅលើឆ្នេរសមុទ្រទីណូតូ (Tinoto) ខេត្តសារ៉ង់នី (Sarangani) ប្រទេសហ្វីលីពីន កាលពីព្រឹកថ្ងៃទី៧ ខែមករា ឆ្នាំ២០២៤ កន្លងទៅ បង្កការផ្អើលយ៉ាងខ្លាំង ខណៈដែលអ្នកស្រុក និងភ្ញៀវនៅរមណីយដ្ឋានឆ្នេរតំបន់នោះ បានប្រញាប់ប្រញាល់នាំគ្នាទៅចាប់ត្រីទាំងនោះដោយដៃទទេ ថង់ ឬ ធុង។
នៅក្នុងបទសម្ភាសន៍មួយដោយទីភ្នាក់ងារសារព័ត៌មានហ្វីលីពីន Rappler លោក Jenad Maulani អ្នកស្រុកទីណូតូបានប្រាប់ថា គ្រួសារគាត់ត្រូវបានជូនដំណឹងអំពីត្រីរាប់សិបតោនបោកបក់មកទើរលើឆ្នេរនៅម៉ោងប្រហែល៣ទៀបភ្លឺ ហើយបានប្រញាប់ប្រញាល់ទៅកន្លែងនោះភ្លាមៗតែម្តង។
ប្រភពពីសារព័ត៌មានហ្វីលីពីន Philstar បានលើកឡើងថា នេះគឺជាបាតុភូតដ៏ចម្លែកមួយ ប៉ុន្តែធម្មតាសម្រាប់អ្នកភូមិដែលមានជំនឿបានអះអាងថា គឺជាសញ្ញានៃដំណឹងល្អសម្រាប់ឆ្នាំនេះ។
អាជ្ញាធរនៅតំបន់ឆ្នេរទីណូតូនៅក្នុងទីប្រជុំជនម៉ាស៊ីម (Maasim) បានជួយត្រួតពិនិត្យការប្រមូលនូវអ្វីដែលអ្នកជំនាញជលផលហៅថា កូនត្រីសាឌីន ដើម្បីឱ្យទាំងអស់គ្នាទទួលបានចំណែកគ្រប់គ្រាន់។
យ៉ាងណាមិញ Rappler បានទាក់ទងទៅលោក Zenaida A. Dangkalan មន្ត្រីជលផលខេត្តសារ៉ង់នី ស្ថិតក្រោមការិយាល័យជលផល និងធនធានជលផលតំបន់ ១២ ដោយលោកបានផ្តល់ហេតុផល៣យ៉ាង ដើម្បីពន្យល់អំពីបាតុភូតនេះថា ទី១ អាចទាក់ទងទៅនឹងរដូវត្រីសាឌីននាពេលបច្ចុប្បន្ន។ ទី២ អាចមកពីហ្វូងត្រីធំជាងហ្វូងត្រីសាឌីនកំពុងដេញពួកវា ដែលបណ្តាលឱ្យពួកវាហែលឆ្ពោះទៅឆ្នេរ ដោយសារត្រីធំជាងមិនអាចចូលដល់កន្លែងរាក់បាន។ ទី៣ ដោយសារពន្លឺភ្លើងពីរមណីយដ្ឋានឆ្នេរអាចទាក់ទាញពួកវា។ លោក Dangkalan ថែមទាំងបានធានាថា បាតុភូតនេះពិតជារឿងធម្មតា ដូច្នេះមិនចាំបាច់មានការព្រួយបារម្ភឡើយ។
មិនខុសគ្នា ងាកទៅលោក Cirilo Aquadera Lagnason Jr. បុគ្គលិកការិយាល័យគ្រប់គ្រងតំបន់ការពារនៃឆ្នេរសមុទ្រ Sarangani Bay Protected Seascape ក្រោមនាយកដ្ឋានបរិស្ថាន និងធនធានធម្មជាតិហ្វីលីពីបានបកស្រាយជូនសាធារណជនថា បាតុភូតនេះមិនមែនជាការបង្ហាញពីសកម្មភាពរញ្ជួយណាមួយក្រោមទឹកនោះទេ។
ការបកស្រាយជាបន្តបន្ទាប់នេះ កើតឡើងបន្ទាប់ពីចាស់ទុំមួយចំនួនបានអះអាង ក៏ដូចជាព្រមានអំពីគ្រោះមហន្តរាយធម្មជាតិដែលនឹងកើតឡើង បន្ទាប់ពីមានបាតុភូតចម្លែកនៅឆ្នេរទីណូតូ ដែលខុសពីការពន្យល់តាមបែបវិទ្យាសាស្ត្រ៕ (ប្រភព ៖ Rappler និង Philstar)
ចែករំលែកព័តមាននេះ