រាជធានីភ្នំពេញ ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានផ្ដាំផ្ញើទៅដល់អ្នកប្រឆាំងនឹងការឈប់សម្រាក ថ្ងៃទី៧ ខែមករា និងថ្ងៃទី២៩ ខែធ្នូ ឱ្យទៅសាកល្បងគ្រោះថ្នាក់នៅចំការមីន ដែលនៅសេសសល់ក្នុងប្រទេសកម្ពុជា។
ថ្លែងនាឱកាសអញ្ជើញប្រារព្ធពិធីអបអរសាទរខួប៤៥ឆ្នាំ នៃថ្ងៃជ័យជម្នះ «៧មករា» នាព្រឹកថ្ងៃទី៧ ខែមករា ឆ្នាំ២០២៤ សម្តេចតេជោ ហ៊ុន សែន បានឱ្យដឹងថា «ជោគជ័យ និងការសប្បាយរីករាយរបស់ប្រជាជនកម្ពុជានៅថ្ងៃនេះ គឺពិតជាផ្តើមចេញពីជ័យជម្នះ ៧មករា បើគ្មានជ័យជម្នះ៧មករា យើងពិតជាមិនអាចមានអ្វីៗដូចថ្ងៃនេះឡើយ នេះជាសច្ចធម៌ប្រវត្តិសាស្ត្រ។ ស្មារតី៧មករា ចារឹកជាប់ក្នុងមនសិការរបស់ប្រជាពលរដ្ឋកម្ពុជាគ្រប់រូប និងបានប្រែក្លាយទៅជាកម្លាំងមហាសាមគ្គីជាតិ ដើម្បីកសាង និងការពារមាតុភូមិប្រកបដោយវីរភាព ដែលធ្វើឱ្យប្រជាជាតិយើងបានឈានឡើងពីជ័យជម្នះមួយទៅកាន់ជ័យជម្នះមួយទៀតឥតឈប់ឈរ»។
ជាមួយគ្នានោះដែរ សម្ដេចតេជោ បន្ដថា «សន្តិភាព មានតម្លៃជាទីបំផុត ការបំផ្លាញសន្តិភាពមិនពិបាកទេ តែការបង្កើតសន្តិភាព គឺពិបាកណាស់ ពុំនោះសោតរាប់តំណមនុស្សក៏ពុំអាចបង្កើតសន្តិភាពបានដែរ។ អាស្រ័យហេតុនេះ យើងត្រូវសាមគ្គីគ្នា រួមចិត្ដតែមួយ ដើម្បីថែរក្សាសន្តិភាពដែលរកបានមកដោយលំបាកបំផុតនេះ ឱ្យគង់វង្សស្ថិតស្ថេរ មិនឱ្យអានុភាពណាមកបំផ្លាញបានឡើយ ទោះបីត្រូវបង់ដោយតម្លៃណាក្ដី»។
សម្ដេចតេជោ បន្ថែមថា «គណបក្សប្រជាជនកម្ពុជា បានគាំទ្រចំពោះសេចក្ដីសម្រេចរបស់រាជរដ្ឋាភិបាលកម្ពុជា ដែលបានកំណត់យកថ្ងៃទី២៩ ខែធ្នូ ជារៀងរាល់ឆ្នាំជា ទិវាសន្ដិភាព ដែលជាថ្ងៃបុណ្យផ្លូវការមួយនៅកម្ពុជា និងជាថ្ងៃឈប់សម្រាកជាសាធារណៈ»។
សម្ដេចតេជោ បានគូសបញ្ជាក់ថា ៖ «ខ្ញុំ ក៏សូមផ្ដាំផ្ញើទៅកាន់មនុស្សមួយចំនួន បើអស់លោកអ្នកមិនពេញចិត្តជាមួយនឹងការឈប់សម្រាក ថ្ងៃទី៧ ខែមករា និងមិនពេញចិត្តការឈប់សម្រាក នៅថ្ងៃទី២៩ ខែធ្នូ នោះទេ សូមអស់លោកអ្នកធ្វើដំណើរទៅកាន់ចំការមីន ដែលនៅសេសសល់ ដើម្បីសាកល្បងជាមួយនឹងគ្រោះថ្នាក់ ដែលពួកអ្នកគួរតែប្រថុយ។ ប្រសិនបើអ្នកពិតជាជើងឯក នៃការប្រឆាំង ថ្ងៃ៧មករា និងការប្រឆាំងជាមួយសន្ដិភាព សូមអស់លោកអ្នក សាកល្បងដោយខ្លួនឯង នៅចំការដែលនៅសេសសល់មិនទាន់អស់»៕
ចែករំលែកព័តមាននេះ