ម៉ាស៊ីនខ្សែ ឬហៅថា «ម៉ាស៊ីនរ៉ៃ» បានធ្វើសកម្មភាពអារច្រៀកជារៀងរាល់យប់ថ្ងៃ ដោយគេសង្ស័យថា គ្មានច្បាប់អនុញ្ញាត កំពុងតែសម្ងំធ្វើសកម្មភាពបំផ្លិចបំផ្លាញសម្បតិ្តធនធានធម្មជាតិ ដែលដឹកជញ្ជូនពីទីជិតឆ្ងាយ ខណៈមន្ត្រីជំនាញពាក់ព័ន្ធ មិនទាន់ជ្រាបជាព័ត៌មាន
ខេត្តកំពង់ស្ពឺ ៖ ម៉ាស៊ីនខ្សែ ឬហៅថា «ម៉ាស៊ីនរ៉ៃ» បានធ្វើសកម្មភាពអារច្រៀកជារៀងរាល់យប់ថ្ងៃ ដោយគេសង្ស័យថា គ្មានច្បាប់អនុញ្ញាត កំពុងតែសម្ងំធ្វើសកម្មភាពបំផ្លិចបំផ្លាញសម្បតិ្តធនធានធម្មជាតិ ដែលដឹកជញ្ជូនពីទីជិតឆ្ងាយ ខណៈមន្ត្រីជំនាញពាក់ព័ន្ធ មិនទាន់ជ្រាបជាព័ត៌មាន ដោយជ្រកក្រោមលេស ក្នុងរោងចិញ្ចឹមមាន់ ស្ថិតនៅក្នុងភូមិស្មៀត ឃុំមនោរម្យ ស្រុកថ្ពង ខេត្តកំពង់ស្ពឺ យ៉ាងត្រជាក់មេជើង។
ជាក់ស្តែង កាលពីថ្ងៃទី០៤ ខែមករា ឆ្នាំ២០២៤ អ្នកយកព័ត៌មានយើង បានចុះទៅយកព័ត៌មាននៅក្នុងស្រុកថ្ពង នៃខេត្តកំពង់ស្ពឺ ហើយក៏បានឃើញរោងម៉ាស៊ីនខ្សែ ឬហៅថា «ម៉ាស៊ីនរ៉ៃខ្នាតធំ» លួ.ចលា.ក់ធ្វើសកម្មភាពយ៉ាងកក្រើកជាច្រើនខែមកហើយ ដោយម្ចាស់រោងម៉ាស៊ីន ត្រូវគេស្គាល់ឈ្មោះថា «នៅ» អាយុជិត៤០ឆ្នាំ និងមានប្រពន្ធឈ្មោះ «ណា» កំពុងតែសម្ងំធ្វើសកម្មភាពបំផ្លិចបំផ្លាញព្រៃឈើយ៉ាងសុខស្រួល ដែលជាធនធានធម្មជាតិ។
ម្ចាស់រោងម៉ាស៊ីនអារឈើ បានធ្វើសកម្មភាពអារច្រៀកឈើមូល (ដុល) ជាច្រើនប្រភេទ ហើយជារៀងរាល់យប់ថ្ងៃ ដែលមានមេឈ្មួញដឹកចេញពីខេត្តកំពង់ឆ្នាំង និងខេត្តពោធិ៍សាត់ ឆ្លងកាត់ស្រុកឱរ៉ាល់ រួចដឹកចូលមកក្នុងរោងចិញ្ចឹមមាន់របស់ថៅកែ ដែលមានឈ្មោះខាងលើ រួចធ្វើសកម្មភាពអារច្រៀកទៅតាមតម្រូវការរបស់មេឈ្មួញកុម្ម៉ង់ រួចក៏បន្តដឹកចេញទៅតាមរថយន្ត និងគោយន្តកន្ត្រៃជាដើម ខណៈមន្ត្រីជំនាញមិនទាន់ជ្រាបជាព័ត៌មាន ឬបានដឹង តែធ្វើមិនដឹង?។ ចាំមើល! តើបង្ក្រាបដែរឬអត់?
ចំណុចត្រង់នេះដែរ មតិមហាជនបានរិះគន់ចំៗទៅលើអាជ្ញាធរក្នុងមូលដ្ឋាន ស្ថិតនៅភូមិស្មៀត ឃុំមនោរម្យ ស្រុកថ្ពង ខេត្តកំពង់ស្ពឺ ជាពិសេសលោកនាយ នាយរងផ្នែករដ្ឋបាលព្រៃឈើឱរ៉ាល់ និងលោក តេង សុវណ្ណារ័ត្ន នាយសង្កាត់រដ្ឋបាលព្រៃឈើថ្ពង ស្នាក់នៅថ្នាលបណ្តុះកូនឈើសង្កាត់ថ្ពងតែម្តង ដែលគ្រប់គ្រងតំបន់ខ្លាញ់ទាំងនោះ។
ការដឹកជញ្ជូនឈើមូល ឈើដុលនោះ តាមគោយន្តកន្ត្រៃ ចូលទៅក្នុងរោងចិញ្ចឹមមាន់ខាងលើ ធ្វើសកម្មភាពអារច្រៀកទាំងយប់ ទាំងថ្ងៃ ឮសំលេងរំខានដល់ប្រជាពលរដ្ឋទាំងយប់ទាំងថ្ងៃ អ្នកស្រុកទីនោះដឹងឮគ្រប់គ្នា ។
តាមប្រភពព័ត៌មាន បានបង្ហើបឲ្យដឹងថា ម្ចាស់ចិញ្ចឹមរោងមាន់ ដាក់ម៉ាស៊ីនខ្សែ ឬម៉ាស៊ីនរ៉ៃខ្នាតធំ ដែលមានទីតាំងខាងលើនោះ មានប្តីឈ្មោះ «នៅ» និងប្រពន្ធឈ្មោះ «ណា» ហៅថា ចែកប៉ាល់ភ្លើង ដែលបានដាក់ទីតាំងធ្វើសកម្មភាពមកជាយូរខែឆ្នាំមកហើយ។ ខណៈបែកធ្លាយព័ត៌មានមកថា មន្ត្រីជំនាញបានធ្វើការទប់ស្កាត់ និងបង្ក្រាបម្តងជាពីរដងកន្លងមកយ៉ាងណាក៏ដោយ នៅតែមានសកម្មភាព និងលើសដើម… សង្ស័យបានភ្លើងខៀវហើយមើលទៅ?។
មហាជនដាក់ការសង្ស័យថា ម្ចាស់រោងម៉ាស៊ីនខាងលើ ដែលមានប្តីឈ្មោះ «នៅ» និងប្រពន្ធឈ្មោះ «ណា» ហៅចែកប៉ាល់ភ្លើងនេះ ចេះប្រើសិល្ប៍មន្តអាគម បំបាំងភ្នែក ធ្វើឱ្យអស់លោកមន្ត្រីជំនាញពាក់ព័ន្ធទាំងអស់នោះ ដេកលង់លក់ ដែលមិនអាចប្រកែកបាន។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ