មន្ត្រីប្រឆាំងអំពើពុករលួយរបស់វៀតណាម ចាប់ខ្លួនចៅហ្វាយខេត្តម្នាក់ ពីបទទទួលសំណូក
វៀតណាម ៖ លោក Tran Van Hiep ជាប្រធានគណៈកម្មាធិការប្រជាជន (ចៅហ្វាយ) នៃខេត្ត Lam…
វៀតណាម ៖ លោក Tran Van Hiep ជាប្រធានគណៈកម្មាធិការប្រជាជន (ចៅហ្វាយ) នៃខេត្ត Lam Dong ប្រទេសវៀតណាម ត្រូវបានឃុំខ្លួន ពីបទទទួលសំណូក ពាក់ព័ន្ធអំពើពុករលួយ នៅតំបន់ទេសចរណ៍ធម្មជាតិមួយក្នុងទីក្រុង Da Lat នេះបើយោងតាមសារព័ត៌មានវៀតណាម tuoitre ។
អ្នកនាំពាក្យ ក្រសួងសន្តិសុខសាធារណៈវៀតណាម បានប្រកាសកាលពីថ្ងៃអង្គារ ទី០២ ខែមករា ឆ្នាំ២០២៤ថា លោក Tran Van Hiep អាយុ ៥៨ឆ្នាំ ត្រូវកងកម្លាំងប៉ូលិសប្រឆាំងអំពើពុករលួយ ចាប់ខ្លួនពីបទទទួលសំណូក ។
ប៉ូលិស រួមនឹងមន្ត្រីអយ្យការ នៃប្រទេសវៀតណាម បានឆ្មក់ចូលផ្ទះរបស់លោក Tran Van Hiep នៅក្នុងទីក្រុង Da Lat នៅម៉ោងប្រហែល៣រសៀលម្សិលមិញនេះ។ នៅថ្ងៃនោះ ប៉ូលិសបានចាប់លោក និងឆែកឆេរក្នុងផ្ទះ ។
ការចាប់ខ្លួននេះ ដោយសារ ពាក់ព័ន្ធករណីដ៏ល្បីមួយ នៃការសូកប៉ាន់ និងការបំពានអំណាច នៅឯរមណីយដ្ឋានអេកូឡូស៊ី Dai Ninh និងតំបន់ទីក្រុងពាណិជ្ជកម្ម។ ការស៊ើបអង្កេតលើសកម្មភាពខុសច្បាប់របស់ជនសង្ស័យ បាននិងកំពុងធ្វើបន្ត ។
ក្នុងឆ្នាំ២០២០ ក្រុមអធិការកិច្ច របស់រដ្ឋាភិបាលវៀតណាម បានស្នើឲ្យបញ្ចប់ប្រតិបត្តិការ និងរឹបអូសយកដី នៃគម្រោងចំនួន៣ ដែលបំពានច្បាប់ដីធ្លី និងការវិនិយោគ រួមទាំងគម្រោងរបស់ក្រុមហ៊ុនវិនិយោគទេសចរណ៍ Saigon-Dai Ninh ផងដែរ ។
រមណីយដ្ឋានអេកូឡូស៊ី Dai Ninh និងតំបន់ទីក្រុងពាណិជ្ជកម្ម ដែលមានផ្ទៃក្រឡាជាង ៣,៥៩៥ហិចតា រួមមានផ្ទៃដីជួល ចំនួន ១,០៥០ហិកតា។ វាមានតម្លៃវិនិយោគសរុប ប្រមាណ ១.០៤ពាន់លានដុល្លារអាមេរិក ។
គម្រោងនេះ ត្រូវបានអនុវត្តពីឆ្នាំ២០១០ ដល់ឆ្នាំ២០១៨ ប៉ុន្តែមកដល់ពេលនេះ នៅសល់តែសំណង់បណ្តោះអាសន្នមួយចំនួនប៉ុណ្ណោះ ហើយព្រៃឈើរាប់រយហិកតា ត្រូវបានបំផ្លាញ ឬទន្ទ្រានយក ៕
ចែករំលែកព័តមាននេះ