គ្រោះធម្មជាតិ ក្រោយពីទឹកទន្លេមេគង្គបានឡើងមកដល់ច្រាំង លុះស្របពេលទឹកស្រកទៅវិញនោះ ជាហេតុធ្វើឲ្យច្រាំងទន្លេ នៅចំណុចក្រោយភូមិព្រែកស្ដី ឃុំព្រះអណ្ដូង ស្រុកស្ទឹងត្រង់ បានបា.ក់ស្រុត ដែលមានបណ្ដោយប្រវែងប្រមាណជាង
ខេត្តកំពង់ចាម ៖ គ្រោះធម្មជាតិ ក្រោយពីទឹកទន្លេមេគង្គបានឡើងមកដល់ច្រាំង លុះស្របពេលទឹកស្រកទៅវិញនោះ ជាហេតុធ្វើឲ្យច្រាំងទន្លេ នៅចំណុចក្រោយភូមិព្រែកស្ដី ឃុំព្រះអណ្ដូង ស្រុកស្ទឹងត្រង់ បានបា.ក់ស្រុត ដែលមានបណ្ដោយប្រវែងប្រមាណជាង៧០ម៉ែត្រ និងបាក់ឡយចូលមកក្នុងជម្រៅប្រមាណ៧ម៉ែត្រទៅ៨ម៉ែត្រទៀត។ ដោយនៅសល់ចម្ងាយប្រមាណជិត១០ម៉ែត្រទៀតប៉ុណ្ណោះ នឹងប៉ះពាល់ដល់ផ្ទះរបស់ប្រជាពលរដ្ឋហើយ។
លោក ស៊ឹម ត្រង ជំទប់ទី១ នៅឃុំព្រះអណ្ដូង បានប្រាប់ឲ្យដឹងនៅព្រឹកថ្ងៃទី១៩ ខែធ្នូ ឆ្នាំ២០២៣នេះថា លោក ទុន ណេត អភិបាលស្រុកស្ទឹងត្រង់ រួមនឹងសហការីបានចុះមកពិនិត្យដោយផ្ទាល់នៅព្រឹកថ្ងៃទី១៩ ខែធ្នូនេះ រួចរាយការណ៍ជូនទៅឯកឧត្តមអភិបាលខេត្ត ដើម្បីមានវិធានការធ្វើយ៉ាងណាទប់ស្កាត់កុំឲ្យច្រាំងបា.ក់បន្តទៀត នាំឱ្យប៉ះពាល់ដល់លំនៅដ្ឋានរបស់បងប្អូនប្រជាពលរដ្ឋរស់នៅក្នុងមូលដ្ឋាន។
លោកជំទប់ទី១ ឃុំព្រះអណ្ដូង បានរំលឹកថា នៅថ្ងៃទី១៨ ខែធ្នូ ឆ្នាំ២០២៣ វេលាម៉ោង២និង៣០នាទីរសៀល មេភូមិព្រែកស្ដី បានរាយការណ៍មកឃុំថា មានច្រាំងទន្លេបា.ក់ស្រុតប្រវែងបណ្ដោយប្រហែលជាង៧០ម៉ែត្រ ទទឹងប្រហែលប្រវែង៨ម៉ែត្រ ខាងក្រោយផ្ទះប្រជាពលរដ្ឋ។បន្ទាប់ពីទទួលបានព័ត៌មាននេះភ្លាម អាជ្ញាធរបានរាយការណ៍បន្តទៅដល់មន្ត្រីជំនាញ ក្នុងនោះគេឃើញក្រុមបច្ចេកទេស និងមន្ត្រីធនធានទឹក និងឧតុនិយមខេត្ត បានចុះមកពិនិត្យដោយផ្ទាល់តែម្ដង ដើម្បីរកវិធានការទប់ស្កាត់ធ្វើយ៉ាងណាកុំឲ្យច្រាំងបា.ក់បន្តទៀត។
សូមបញ្ជាក់ថា នៅចំណុចដែលច្រាំងទន្លេបា.ក់នេះ ធ្លាប់ត្រូវបានក្រសួងធនធានទឹក ប្រើបាវខ្សាច់យក្សដាក់ទប់តាមច្រាំងទន្លេ ដើម្បីកុំឱ្យបា.ក់ច្រាំងបង្កផលប៉ះពាល់ដល់លំនៅដ្ឋានរបស់បងប្អូនប្រជាពលរដ្ឋ។ កន្លងមក ការបា.ក់ច្រាំងនេះ គឺមានរាងផតចូលមកក្នុង ហើយរូបលោកក៏មានការងឿងឆ្ងល់ ដោយមិនដឹងថា តើមកពីមូលហេតុអ្វីច្បាស់លាស់បានជាច្រាំងបា.ក់យ៉ាងដូច្នេះ?។ ព្រោះថា ក្នុងរដូវទឹកទន្លេសម្រកបានឃើញបាវខ្សាច់ទប់នៅខាងក្រោម ហើយការបា.ក់នេះ គឺនៅផ្នែកខាងលើបាវខ្សាច់។
អាជ្ញាធរមូលដ្ឋាន បានលើកឡើងថា ប្រសិនបើច្រាំងទន្លេចេះតែបន្តបា.ក់ចូលមកក្នុងទៀតនោះ និងបង្កផលប៉ះពាល់ដល់លំនៅដ្ឋានប្រជាពលរដ្ឋដែលមានចំនួន៥ខ្នង ហើយត្រូវប្រឈមនឹងការរុះរើចេញ។ ប៉ុន្តែតាមរយៈការចុះពិនិត្យដោយផ្ទាល់របស់លោកអភិបាលស្រុកនាព្រឹកថ្ងៃទី១៩ ខែធ្នូនេះ ឃើញថា ច្រាំងទន្លេដែលបា.ក់នៅក្រោយភូមិព្រែកស្ដីនោះ គឺមិនបានបា.ក់បន្តទៀតនោះទេ។
សូមបញ្ជាក់ផងដែរថា កន្លងមក មាត់ទន្លេមុខសាលាបឋមសិក្សាកម្ពុជា-ចិនព្រះអណ្ដូង គឺបានបា.ក់ស្រុតស្ទើរតែកៀកផ្លូវថ្នល់ទៅហើយកាលពីប៉ុន្មានឆ្នាំមុន ហើយក៏ត្រូវបានក្រុមការងារកាសែតកោះសន្តិភាពថតចុះផ្សាយ បន្ទាប់មកដំណឹងនេះក៏បានលេចឮដល់មន្ត្រីជំនាញ ក៏ដូចជាអាជ្ញាធរខេត្ត
ក្រោយមកទៀត ក្រសួងធនធានទឹក ក៏សម្រេចប្រើបាវខ្សាច់យក្ស ដើម្បីទប់ច្រាំងទន្លេចាប់ពីចំណុចមុខសាលាបឋមសិក្សាកម្ពុជា-ចិនព្រះអណ្ដូង បន្តរហូតមកដល់ឃុំពាមកោះស្នា។ ការទប់នេះ ពិតជាមានប្រសិទ្ធភាពដោយមិនឲ្យការបា.ក់ច្រាំងមកដល់លំនៅដ្ឋានរបស់ពលរដ្ឋឡើយ។ នាពេលកន្លងទៅ ឯកឧត្តម អ៊ុន ចាន់ដា អភិបាលខេត្តក៏ធ្លាប់បានចុះទៅពិនិត្យ និងបានចាត់ឱ្យក្រុមបច្ចេកទេសប្រើបាវខ្សាច់ ដើម្បីទប់ច្រាំងទន្លេមិនឲ្យបា.ក់បន្តទៀតឡើយ ធ្វើឲ្យបងប្អូនប្រជាពលរដ្ឋរស់នៅតំបន់នោះមានភាពកក់ក្តៅយ៉ាងខ្លាំង។
ចែករំលែកព័តមាននេះ