ម៉ាឡេស៊ី ក្លាយជាប្រទេសទទួលភ្ញៀវបរទេសច្រើនជាងគេនៅអាស៊ីអាគ្នេយ៍ឆ្នាំនេះ
ម៉ាឡេស៊ី ៖ ប្រទេសម៉ាឡេស៊ី ក្លាយជាគោលដៅពេញនិយមបំផុតនៅក្នុងតំបន់អាស៊ីអាគ្នេយ៍នៅឆ្នាំ
ម៉ាឡេស៊ី ៖ ប្រទេសម៉ាឡេស៊ី ក្លាយជាគោលដៅពេញនិយមបំផុតនៅក្នុងតំបន់អាស៊ីអាគ្នេយ៍នៅឆ្នាំនេះ បន្ទាប់ពីបានទទួលភ្ញៀវបរទេសចំនួន ២៦.១លាននាក់ នៅចន្លោះខែមករារហូតដល់ខែវិច្ឆិកា។ នេះបើយោងតាមប្រភពពី VnExpress ចេញផ្សាយកាលពីថ្ងៃទី ១៨ ខែ ធ្នូ ឆ្នាំ ២០២៣។
យោងតាមទិន្នន័យដែលប្រមូលបានពីបណ្តាក្រសួងទេសចរណ៍នៃប្រទេសក្នុងតំបន់អាស៊ីអាគ្នេយ៍បានបង្ហាញថា ប្រទេសថៃជាប់ចំណាត់ថ្នាក់លេខ ២ ជាមួយនឹងការមកដល់នៃភ្ញៀវបរទេសចំនួន ២៤.៦លាននាក់ អំឡុងពេលដូចគ្នា បន្ទាប់មកប្រទេសសិង្ហបុរីចំនួន ១២.៤លាននាក់ និងប្រទេសវៀតណាមចំនួន ១១.២លាននាក់។
ប្រទេសនៅអាស៊ីអាគ្នេយ៍ផ្សេងទៀតដូចជា ឥណ្ឌូនេស៊ី ហ្វីលីពីន និងកម្ពុជា បានកត់ត្រាការមកដល់របស់ភ្ញៀវបរទេសតិចជាង១០លាននាក់។ គិតត្រឹមចុងខែវិច្ឆិកា ហ្វីលីពីនបានកត់ត្រាភ្ញៀវបរទេសត្រឹមតែ ៤.៦លាននាក់ ខណៈដែលឥណ្ឌូនេស៊ី ៩.៥លាននាក់ និងកម្ពុជា ៤.៤លាននាក់គិតត្រឹមខែតុលា។
នៅឆ្នាំនេះ បណ្តាប្រទេសអាស៊ីអាគ្នេយ៍បានប្រណាំងប្រជែងគ្នា ដើម្បីទាក់ទាញភ្ញៀវទេសចរបរទេសជាមួយនឹងគោលនយោបាយអន្តោប្រវេសន៍ដែលបត់បែនឥតឈប់ឈរ។ ចាប់ពីថ្ងៃទី១ ខែធ្នូ ម៉ាឡេស៊ីបានលើកលែងទិដ្ឋាការរយៈពេល៣០ថ្ងៃ សម្រាប់ពលរដ្ឋមកពីប្រទេសចិនដីគោក និងឥណ្ឌា ដែលជាការផ្លាស់ប្តូរស្រដៀងគ្នាទៅនឹងប្រទេសថៃ។ លោក Datuk Seri Tiong King Sing រដ្ឋមន្ត្រីក្រសួងទេសចរណ៍ សិល្បៈ និងវប្បធម៌របស់ប្រទេសម៉ាឡេស៊ី បានថ្លែងថា លោកសង្ឃឹមថា ការមកដល់របស់ភ្ញៀវទេសចរនឹងបន្តកើនឡើង បន្ទាប់ពីការអនុវត្តការលើកលែងទិដ្ឋាការរយៈពេល៣០ថ្ងៃ។
នៅក្នុងឆ្នាំ ២០១៩ ប្រទេសម៉ាឡេស៊ី បានកត់ត្រាភ្ញៀវទេសចរបរទេសចំនួន ២៦.១លាននាក់ មុនពេលធ្លាក់ចុះ ៨៣.៤% មកនៅត្រឹម ៤.៣៣លាននាក់ក្នុងឆ្នាំ ២០២០ ដែលជាឆ្នាំនៃការផ្ទុះឡើងជំងឺកូវីដ-១៩ ជាលើកដំបូង។ នៅឆ្នាំបន្ទាប់ តួលេខបានធ្លាក់ចុះបន្ថែមទៀតមកត្រឹម ១៣០,០០០នាក់ មុននឹងងើបឡើងវិញដល់ ១០.១លាននាក់ នៅឆ្នាំ ២០២២៕
ចែករំលែកព័តមាននេះ