ខេត្តកំពង់ចាម ៖ ក្នុងរដូវប្រាំងស្លឹកឈើក្រៀមស្វិតស្រពោន ហើយលំនៅដ្ឋានប្រសិនបើមានការធ្វេសប្រហែសនោះ អគ្គិភ័យអាចនឹងឆាបឆេះ បើសិនជាម្ចាស់មិនមានការប្រុងប្រយ័ត្ន។ ជាក់ស្ដែងកាលពីវេលាម៉ោង២និង១០នាទីរសៀល ថ្ងៃទី១៧ ខែធ្នូ ឆ្នាំ២០២៣នេះ មានគ្រោះអគ្គិភ័យបានកើតឡើងនៅឃុំស្វាយពោធិ៍ ស្រុកស្រីសន្ធរ បណ្ដាលឱ្យផ្ទះ២ខ្នងត្រូវអណ្ដាតភ្លើងឆាបឆេះយ៉ាងសន្ធោសន្ធៅខ្ទេចអស់ទាំងស្រុង ធ្វើឱ្យម្ចាស់ផ្ទះសោកស្ដាយយ៉ាងខ្លាំងរហូតយំលែងចេញ។
បើតាមសមត្ថកិច្ចមូលដ្ឋាន បានប្រាប់ឲ្យដឹងថា ក្រោមការយកចិត្តទុកដាក់ពីសំណាក់លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្ត បានដាក់ឲ្យកម្លាំងនគរបាលតាមបណ្ដាស្រុក-ក្រុង ត្រូវប្រចាំបញ្ជា២៤ម៉ោងលើ២៤ម៉ោង ដើម្បីត្រៀមចេញជួយដល់ប្រជាពលរដ្ឋក្នុងពេលដែលមានគ្រោះអគ្គិភ័យកើតឡើងនៅតំបន់ណាមួយ។
សមត្ថកិច្ចមូលដ្ឋាន បន្តឲ្យដឹងទៀតថា លោកអធិការនគរបាលស្រុកស្រីសន្ធរ ក្រោយពីទទួលព័ត៌មានថា មានករណីអគ្គិភ័យឆាបឆេះផ្ទះប្រជាពលរដ្ឋ ស្ថិតនៅភូមិជីប៉ោ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាមភ្លាម លោកអធិការក៏បញ្ជាឲ្យលោកអធិការរងទទួលការងារសណ្តាប់ធ្នាប់ ចេញរថយន្តសង្គ្រោះអគ្គិភ័យចំនួន២គ្រឿងរបស់អធិការនគរបាលស្រុកស្រីន្ធរ អន្តរាគមន៍ជាបន្ទាន់ និងសហការជាមួយប៉ុស្តិ៍ស្វាយពោធិ៍ មេឃុំ ក្រុមប្រឹក្សាឃុំស្វាយពោធិ៍ មេភូមិជីប៉ោ និងប្រជាការពារផងដែរ។
សមត្ថកិច្ចមូលដ្ឋានបន្តទៀតថា លុះពេលទៅដល់ គឺអគ្គិភ័យបានឆេះអស់ផ្ទះ១ខ្នងទៅហើយ និងបន្តឆេះរាលដាលទៅ១ខ្នងទៀត។ ខណៈពេលនោះ សមត្ថកិច្ចបានគ្រប់គ្រងស្ថានការណ៍ ដោយបា.ញ់ទឹកទប់ស្កាត់មិនអោយអណ្ដាតភ្លើងឆាបឆេះរាលដាលដល់ផ្ទះទី៣ឡើយ និងប្រើប្រាស់រថយន្តអស់ចំនួន២គ្រឿង ប្រើប្រាស់ទឹកអស់ចំនួន៣ឡាន ។ ហើយទីតាំងផ្ទះកើតហេតុនោះ គឺនៅចម្ងាយពីអធិការដ្ឋានប្រហែល១០គីឡូម៉ែត្រ ណាមួយផ្ទះកើតហេតុ គឺធ្វើអំពីឈើ ដូច្នេះពេលណាដែលមានគ្រោះអគ្គិភ័យកើតឡើង គឺឆាបឆេះលឿនណាស់។
សមត្ថកិច្ចមូលដ្ឋាន បានបញ្ជាក់ថា ការអន្តរាគមន៍បា.ញ់ទឹកពន្លត់ភ្លើងឆេះផ្ទះនេះ គឺបានរលត់ទៅវិញទាំងស្រុងនៅវេលាម៉ោង៣និង១៥នាទីរសៀលថ្ងៃដដែល។ ចំពោះការខូចខាត គឺបណ្ដាលឱ្យឆេះផ្ទះទាំងស្រុងអស់ចំនួន២ខ្នង និងឆេះរាលដល់ជញ្ជាំងផ្ទះទី៣ អស់មួយចំហៀងទៀត ។
សមត្ថកិច្ចបន្តថា ម្ចាស់ផ្ទះខាងលើរួមមាន ៖
ទី១- ឈ្មោះ ឌី វៃ ភេទប្រុស អាយុ៥៩ឆ្នាំ រស់នៅភូមិជីប៉ោ ខូចខាតផ្ទះអស់ទាំងស្រុង ដែលមានទំហំ៥ម៉ែត្រ×៧ម៉ែត្រ ធ្វើអំពីឈើប្រក់ក្បឿង, ម៉ូតូចំនួន១គឿង, អង្ករចំនួន៣បេ, ស្រូវចំនួន២០បេ, ខ្សែ.ក, ខ្សែដៃ, ចិញ្ចៀនចំនួន៧ជី(ផ្លាកទីន), ចិញ្ចៀន១ជី(មាស), ថវិការចំនួន៥០០ដុល្លារ. គ្រែឈើចំនួន១, ទូឈើចំនួន២ និងសម្ភារៈប្រើប្រាស់មួយចំនួនទៀត។
២- ម្ចាស់ផ្ទះឈ្មោះ សែម ធឿន ភេទប្រុស អាយុ៥០ឆ្នាំ រស់នៅភូមិជីប៉ោ ខូចខាតផ្ទះ១ខ្នងទាំងស្រុង ដែលមានទំហំ៦ម៉ែត្រ×៨ម៉ែត្រ ធ្វើអំពីឈើប្រក់ក្បឿង, ថវិការចំនួន៣លានរៀល, ខ្សែ.កខ្សែដៃចំនួន២ដំឡឹង (មាស), ស្រូវចំនួន២០បេ, គ្រែឈើចំនួន៣, ទូឈើចំនួន២ និងសម្ភារៈប្រើប្រាស់មួយចំនួនទៀត។
៣- ម្ចាស់ផ្ទះឈ្មោះ ឌី ភី អាយុ៨៣ឆ្នាំ រស់នៅភូមិជីប៉ោ រងការខូចខាតឆះជញ្ជាំងផ្ទះអស់មួយចំហៀង ប្រវែង៩ម៉ែត្រ។
សមត្ថកិច្ចបញ្ជាក់ទៀតថា ចំពោះមូលហេតុ គឺបណ្ដាលមកពីឆ្លងចរន្តអគ្គិសនី ហើយគ្រោះអគ្គិភ័យនេះ មិនបណ្តាលអោយគ្រោះថ្នាក់ដល់ជីវិ.តមនុស្ស និងសត្វពាហនៈឡើយ។
គួរបញ្ជាក់ថា នៅក្នុងរដូវប្រាំងនេះ សមត្ថកិច្ចក៏បានក្រើនរំលឹកដល់ម្ចាស់ផ្ទះ បើមិននៅផ្ទះទេ សូមបិទបារ៉ែតភ្លើង ឬពន្លត់ភ្លើងចង្ក្រានឲ្យបានរួចរាល់ មុននឹងចាកចេញពីផ្ទះទៅប្រកបរបរលក់ដូរ ឬធ្វើការផ្សេងៗដោះស្រាយជីវភាពគ្រួសារ ដើម្បីចៀសវាងគ្រោះអគ្គិភ័យដោយថាហេតុណាមួយ។
ចែករំលែកព័តមាននេះ