ទីភ្នាក់ងារព័ត៌មានបរទេសបានផ្សាយកាលពីថ្ងៃទី១៩ ឧសភា ថា សេដ្ឋកិច្ចជប៉ុនជួបនឹងស្ថានភាពធ្លាក់ចុះច្រើនជាងការរំពឹងទុកក្នុងអំឡុងត្រីមាសដំបូងនៃឆ្នាំ២០១១ ។ មូលហេតុចម្បងបណ្តាលមកពីគ្រោះវិបត្តិធម្មជាតិរញ្ជួយដីកម្លាំងជិត៩រិចស្ទ័រ និងមានរលកយក្សស៊ូណាមីវាយប្រហារកោះហុងស៊ូ កាលពីថ្ងៃទី១១ មីនា កន្លងមក ដែលធ្វើឱ្យប៉ះពាល់ដល់ការវិនិយោគ និងការចំណាយរបស់ក្រុមគ្រួសារក្នុងប្រទេសជប៉ុន ។
នៅក្នុងរបាយការណ៍ចុងក្រោយបានឱ្យដឹងតាមរយៈទីស្តីការគណៈរដ្ឋមន្ត្រីជប៉ុនថា តួលេខកំណើនផលិតផលសរុបក្នុងស្រុក (GDP) ក្នុងត្រីមាសដំបូងរបស់ជប៉ុនបានធ្លាក់ចុះដល់ទៅ០,៩% គឺខ្ពស់ជាងតួលេខព្យាករណ៍ទុកកាលពីមុនដែលថាស្ថិតក្នុងកម្រិត០,៥% ។ រីឯអត្រារីកចម្រើនផ្នែកសេដ្ឋកិច្ចរបស់ជប៉ុន ក្នុងរយៈពេល១ឆ្នាំពេញ បានរំកិលពីការធ្លាក់ចុះ ២% ដល់៣,៧% ។
ក្រៅពីនេះ នៅក្នុងរបាយការណ៍ចុងក្រោយ របស់អាជ្ញាធរជប៉ុនបញ្ជាក់ថា តួលេខតម្រូវការប្រើប្រាស់របស់ប្រជាជនដែលមានចំនួនជិត៦០% នៃតម្រូវការសរុបក្នុងប្រព័ន្ធសេដ្ឋកិច្ចបានរំកិលធ្លាក់ប្រហែ០,៦% ខណៈពេលតួលេខចំណាយរបស់ ក្រុមអាជីករផ្សេងៗក៏ធ្លាក់ចុះប្រហែល០,៩% ៕
ចែករំលែកព័តមាននេះ