រាជធានីភ្នំពេញ ៖ ក្នុងនាមជាឪពុកម្តាយ យើងប្រាថ្នាចង់បានអ្វីដែលល្អបំផុតសម្រាប់កូនៗ ។ យើងចង់ឱ្យពួកគេទទួលបានជោគជ័យគ្រប់យ៉ាង ដែលពួកគេជ្រើសរើសធ្វើក្នុងនាមជាមនុស្សពេញវ័យ ។ យ៉ាងណាមិញ យើងចង់បានសម្រាប់ពួកគេ…
រាជធានីភ្នំពេញ ៖ ក្នុងនាមជាឪពុកម្តាយ យើងប្រាថ្នាចង់បានអ្វីដែលល្អបំផុតសម្រាប់កូនៗ ។ យើងចង់ឱ្យពួកគេទទួលបានជោគជ័យគ្រប់យ៉ាង ដែលពួកគេជ្រើសរើសធ្វើក្នុងនាមជាមនុស្សពេញវ័យ ។ យ៉ាងណាមិញ យើងចង់បានសម្រាប់ពួកគេ គឺមិនគ្រប់គ្រាន់ទេ ។ កូនៗត្រូវតែចង់បានសម្រាប់ខ្លួនគេ ទើបជារឿងសំខាន់ ។ ជាការពិតណាស់ មិនមែនគ្រប់កុមារទាំងអស់នឹងពូកែក្នុងសាលានោះទេ ។ កុមារខ្លះមានភាពខ្លាំងនៅកន្លែងផ្សេង ហើយអ្នកផ្សេងទៀតអាចមានបញ្ហាក្នុងការរៀនសូត្រ ដែលរារាំងភាពជោគជ័យក្នុងការសិក្សា ។ ប៉ុន្តែ ទោះបីបណ្តាលមកពីអ្វី ពួកគេអាចនឹងប្រសើរឡើងបើអ្នកដឹងអំពីរបៀបជំរុញពួកគេឱ្យប្រឹងប្រែង ។
១ បង្កើតរចនាសម្ព័ន្ធ និងទម្លាប់ ៖ ភាពទៀងទាត់នៃរចនាសម្ព័ន្ធ និងទម្លាប់រស់នៅប្រចាំថ្ងៃមានសារៈសំខាន់ណាស់ក្នុងការចិញ្ចឹមកូនរបស់អ្នក ។ ស្ថេរភាពនៅផ្ទះនឹងផ្តល់ឱ្យពួកគេនូវទំនុកចិត្ត និងការលើកទឹកចិត្ត ដើម្បីប្រឹងប្រែងរៀនសូត្រនៅសាលា ។ ជាញឹកញាប់ នៅពេលអ្នកព្យាយាមជំរុញកូនរបស់អ្នកឱ្យធ្វើអ្វីមួយ ជម្លោះអាចកើតឡើង ។ ម៉ោងចូលគេង ការបំពេញកិច្ចការផ្ទះ ឬម៉ោងលេងជាមួយមិត្តភ័ក្តិរបស់ពួកគេ សុទ្ធតែជាប្រភពនៃជម្លោះ លុះត្រាតែអ្នកបានរៀបចំរចនាសម្ព័ន្ធ និងទម្លាប់រស់នៅឱ្យបានល្អប្រសើរ ។ ជាការពិតណាស់អ្នកត្រូវតែប្រកាន់ខ្ជាប់នូវច្បាប់ និងទម្លាប់គ្រួសាររបស់អ្នក ហើយដឹកនាំដោយគំរូឱ្យពួកគេឃើញ ។
២ សង្កត់ធ្ងន់លើដំណើរការនៃលទ្ធផល ៖ លើកទឹកចិត្តកូនរបស់អ្នកឱ្យធ្វើអ្វីដែលធ្វើឱ្យកាន់តែប្រសើរឡើងនៅក្នុងសាលារៀន ។ ការធ្វើកិច្ចការផ្ទះឱ្យបានទៀងទាត់ ការយកចិត្តទុកដាក់ក្នុងថ្នាក់ និងការសិក្សាអាចនាំឱ្យទទួលបានចំណាត់ថ្នាក់ប្រសើរជាងមុន និងសមិទ្ធផលសិក្សាផ្សេងៗទៀត ។ កូនរបស់អ្នកអាចធ្វើអ្វីៗតាមនេះទាំងអស់ និងទទួលបានអត្ថប្រយោជន៍ពីវា ប៉ុន្តែមិនចាំបាច់ទាល់តែប្រឡងបានចំណាត់ថ្នាក់ខ្ពស់នោះទេ ។ ប្រសិនបើអ្នកគ្រាន់តែសង្កត់ធ្ងន់ទៅលើលទ្ធផលចុងក្រោយនៃសកម្មភាព ការខកចិត្តរបស់អ្នកអាចបង្អាក់កូនរបស់អ្នកពីការខិតខំប្រឹងប្រែងបន្ថែមទៀត ។ មិនថាកូនរបស់អ្នកទទួលបានពិន្ទុខ្ពស់ ឬទទួលបានរង្វាន់ពីសាលានោះទេ ពួកគេត្រូវតែមើលឃើញការកោតសរសើររបស់អ្នកចំពោះការងារដែលពួកគេបានធ្វើ ។
៣ បង្រៀនជំនាញរៀបចំឱ្យកូនរបស់អ្នក ៖ មានពេលខ្លះដែលអ្នកអាចកត់សម្គាល់ឃើញកូនរបស់អ្នកពិបាកក្នុងការគ្រប់គ្រងកិច្ចការផ្ទះ សកម្មភាពក្រោយសាលា និងជីវិតប្រចាំថ្ងៃរបស់ពួកគេ ហើយឆ្ងល់ថា ហេតុអ្វីបានជាពួកគេរវល់ខ្លាំងម្ល៉េះ ។ សូមចាំថា ជំនាញរៀបចំដែលអ្នកមានត្រូវតែបញ្ជូនបន្តទៅកូនរបស់អ្នក ។ បង្រៀនកូនរបស់អ្នកពីរបៀបគ្រប់គ្រងពេលវេលារបស់ពួកគេ កំណត់អាទិភាពសកម្មភាព និងរៀបចំរបស់របររបស់ពួកគេ ។ បង្ហាញពួកគេពីសារៈសំខាន់នៃការបង្កើតបញ្ជី ការប្រើប្រាស់ប្រតិទិន និងរៀបចំខ្លួនពួកគេជាមុនសម្រាប់សកម្មភាពជិតមកដល់ ។ នៅពេលដែលពួកគេមានអារម្មណ៍ត្រៀមខ្លួនកាន់តែច្រើន អាកប្បកិរិយារបស់ពួកគេចំពោះសាលារៀននឹងប្រសើរឡើង ហើយពួកគេអាចនឹងធ្វើបានប្រសើរ ។
៤ ជួយពួកគេឱ្យឃើញរូបភាពធំ ៖ ក្មេងៗអាចងឿងឆ្ងល់ជាមួយនឹងចំណាត់ថ្នាក់របស់ពួកគេ ។ ជាមធ្យោបាយនៃការលើកទឹកចិត្តពួកគេ ជួយពួកគេឱ្យមើលឃើញរូបភាពធំ ហេតុអ្វីបានជាការខិតខំប្រឹងប្រែង គឺចាំបាច់សម្រាប់គោលដៅ និងភាពជោគជ័យនាពេលអនាគតរបស់ពួកគេ ។ ពិភាក្សាអំពីអាជីព និងគោលដៅជីវិត និងរបៀបដែលការខំប្រឹងនៅក្នុងសាលារៀនឥឡូវនេះ អាចជួយឱ្យពួកគេនៅថ្ងៃខាងមុខ ។ នៅពេលដែលពួកគេមើលឃើញថា អ្នកសិក្សារៀនសូត្រអាចទទួលបានផលល្អ មានផាសុកភាព និងរស់នៅស្រួល ពួកគេនឹងមានអារម្មណ៍ថា មានការលើកទឹកចិត្ត ខំប្រឹងរៀនសូត្របន្ថែមទៀត ៕
អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និង សាលារៀនណត្សឡាញន៍ ។ សាលារៀនផ្តល់ជូនកម្មវិធីមត្តេយ្យភាសាខ្មែរ និងអង់គ្លេស កម្មវិធីភាសាអង់គ្លេសសម្រាប់កុមារ កម្មវិធីភាសាអង់គ្លេសសិស្សធំ កម្មវិធីចំណេះទូទៅខ្មែរ ពីថ្នាក់ទី ១ ដល់ទី ១២ និងកម្មវិធីភាសាចិន ។ សាលារៀនបន្តទទួលចុះឈ្មោះចូលរៀនរៀងរាល់ថ្ងៃ ។
សាលារៀនផ្តល់ជូននូវវេទិកា និងមធ្យោបាយសិក្សាយ៉ាងសម្បូរបែបជាមួយនឹងប្រព័ន្ធគ្រប់គ្រងសាលារៀន ប្រព័ន្ធគ្រប់គ្រង់ការសិក្សា និងអេបសាលារៀនជូនដល់មាតាបិតាសិស្ស និងសិស្សានុសិស្សក្នុងការគ្រប់គ្រងការសិក្សា និងតាមដានព័ត៌មានសិក្សារបស់បុត្រធីតាផងដែរ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕
ចែករំលែកព័តមាននេះ