ADផ្ទាំងផ្សព្វផ្សាយពាណិជ្ជកម្ម

បុរសអូស្ត្រាលីសុខចិត្តប្រថុយគ្រោះថ្នាក់ជួយរំដោះសុនខពីសត្វកងគូរូ

4 ខែ មុន

០៤ ខែ ធ្នូ ឆ្នាំ ២០២៣ ម៉ោង ០១:៥២

ទីក្រុងស៊ីដនី៖ បុរសជនជាតិអូស្ត្រាលីម្នាក់ឈ្មោះក្រេកតុងឃីន (Greig Tonkins) សុខចិត្តប្រថុយនឹងគ្រោះថ្នាក់ដើម្បីជួយរំដោះសត្វសុនខរបស់ខ្លួនចេញពីកណ្ដាប់ដៃរបស់សត្វកងគូរូ។ គេមិនទាន់ដឹងថាតើមកពីមូលហេតុអ្វីទើបបានជាសត្វទាំង២ធ្លាក់ទៅក្នុងស្ថានភាពប្រទាញប្រទង់គ្នាយ៉ាងដូច្នេះ។ បុរសឈ្មោះក្រេកកំពុងជិះឡានហ្ស៊ីបសុខៗ គាត់ហក់ចុះពីលើឡាន និងរត់សំដៅទៅរកសត្វទាំង២។ ពេលទៅដល់ឃើញកងគូរូចាប់ក្រៀកកសត្វសុនខរបស់គាត់មិនព្រមលែងទាល់តែសោះ។…

ទីក្រុងស៊ីដនី៖ បុរសជនជាតិអូស្ត្រាលីម្នាក់ឈ្មោះក្រេកតុងឃីន (Greig Tonkins) សុខចិត្តប្រថុយនឹងគ្រោះថ្នាក់ដើម្បីជួយរំដោះសត្វសុនខរបស់ខ្លួនចេញពីកណ្ដាប់ដៃរបស់សត្វកងគូរូ។ គេមិនទាន់ដឹងថាតើមកពីមូលហេតុអ្វីទើបបានជាសត្វទាំង២ធ្លាក់ទៅក្នុងស្ថានភាពប្រទាញប្រទង់គ្នាយ៉ាងដូច្នេះ។ បុរសឈ្មោះក្រេកកំពុងជិះឡានហ្ស៊ីបសុខៗ គាត់ហក់ចុះពីលើឡាន និងរត់សំដៅទៅរកសត្វទាំង២។ ពេលទៅដល់ឃើញកងគូរូចាប់ក្រៀកកសត្វសុនខរបស់គាត់មិនព្រមលែងទាល់តែសោះ។

ឃើញដូច្នោះ គាត់ក៏បញ្ចេញកាយវិការហាក់ដូចជាចង់ស្ទុះទៅចាប់ទាញសុនខចេញពីដៃរបស់កងគូរូ។ ប៉ុន្តែកងគូរូអាចនឹងស្មានថាបុរសនោះប៉ុនប៉ងធ្វើបាបវា។ វាក៏ពន្លាដៃចេញពីករបស់សុនខ ហើយចាប់ផ្ដើមតាំងឃុំប្រុងប្រដាល់ជាមួយគាត់។ បុរសនោះក៏ដាល់កងគូរូមួយដៃ ប៉ុន្តែមិនថ្វីទេព្រោះវាជាសត្វដែលមានសាច់ដុំ និងមានកាយសម្បទាមាំមួន។ អ្នកដែលឃើញព្រឹត្តិការណ៍នោះផ្ទាល់ភ្នែកនិយាយថាកងគូរូនោះហាក់ដូចជាមានស្មារតីរឹងប៉ឹង និងមិនមានបញ្ហារបួសស្នាមអ្វីទេ។

អ្នកជំនាញបកស្រាយអំពីមូលហេតុដែលកងគូរូចាប់ក្រៀកកសត្វសុនខមិនព្រមលែង
អ្នកជំនាញសត្វព្រៃយល់ថាអាកប្បកិរិយារបស់កងគូរូនៅពេលនោះមានលក្ខណៈខុសប្លែកពីធម្មតា។ ជាទូទៅ សត្វនេះមិនចង់ប្រទាំងប្រទើសគ្នាជាមួយនឹងសត្វ ឬមនុស្សទេ។ កងគូរូជាសត្វស៊ីតិណជាតិជាអាហារ (តិណាសី) ហើយក៏មិនមែនជាសត្វប្រមាញ់នោះដែរ។ ជាទម្លាប់ នៅពេលឃើញសត្វដទៃទៀតទៅក្បែរ វានឹងដកខ្លួនថយពីទីតាំងឈរជើងរបស់វា។ ប៉ុន្តែចម្លែកអ្វីតែសត្វកងគូរូមួយក្បាលនេះ។ វាមិនត្រឹមតែមិនដកខ្លួនថយទេ វាបែរជាហានតទល់ជាមួយសត្វសុនខថែមទៀត។

បណ្ឌិតម៉ាក អឹលឌ្រីច (Mark Eldridge) យល់ថាប្រហែលជាសត្វសុនខជាអ្នកបង្កបញ្ហាមុន ដោយព្រុសដាក់សត្វកងគូរូ ព្រោះសត្វសុនខទាំងនោះជាប្រភេទសុនខកោះសត្វ ឬសុនខប្រមាញ់សត្វ។ មានន័យថាមិនមែនកងគូរូដើរសំដៅទៅរកសុនខទេ ប្រហែលជាសុនខដើរសំដៅទៅរកកងគូរូមុន។ លោកយល់ថាកងគូរូចាប់ក្រៀកករបស់សុនខដើម្បីការពារខ្លួន។

បណ្ឌិតម៉ាកយល់ថាមុនពេលម្ចាស់សុនខទៅដល់ កងគូរូមិនដឹងថាត្រូវធ្វើអ្វីទៀត ម៉្លោះហើយមានតែកៀកកសុនខនៅមួយកន្លែង។ ប៉ុន្តែនៅពេលបុរសម្ចាស់សុនខវ័ធកងគូរូមួយដៃ ធ្វើឱ្យកងគូរូសម្រេចថាត្រូវដកខ្លួនថយតែម្ដង។ អ្នកជំនាញយល់ថាមនុស្សយើងបើប្រើដៃទទេវ៉ៃមួយស្មើមិនអាចឈ្នះកងគូរូទេព្រោះវាមានកាយសម្បទាមាំមួន មានសាច់ដុំធំៗ និងមានក្រញាំដៃ ក្រញាំជើងវែងៗ។ បណ្ឌិតម៉ាកយល់ថានេះសំណាងហើយដែលកងគូរូមិនតដៃ។ កុំអីម្ចាស់សុនខអាចនឹងរងរបួសធ្ងន់។

ប្រតិកម្មពីក្រុមអ្នកអភិរក្សសត្វព្រៃ និងអ្នកការពារសិទ្ធិរបស់សត្វ
ក្រោយការបង្ហោះវីឌីអូឃ្លីបនៅលើបណ្ដាញសង្គម ក្រុមអ្នកស្រឡាញ់សត្វព្រៃ និងអ្នកការពារសិទ្ធិរបស់សត្វបានបញ្ចេញប្រតិកម្មចំពោះរឿងនេះ។ អ្នកខ្លះបញ្ចេញមតិថាបុរសម្ចាស់សុនខគួរតែផ្ដោតសំខាន់ទៅលើការរំដោះសត្វសុនខពីកណ្ដាប់ដៃរបស់កងគូរូទៅបានហើយ ហើយដើរចេញពីទីនោះទៅចប់រឿងបាត់ទៅហើយ។ ប៉ុន្តែអ្នកខ្លះយល់ថាស្ថានភាពនៅពេលនោះមិនអាចមើលស្រាលបានឡើយ។ គាត់គ្រាន់តែចង់ការពារសុនខ និងការពារខ្លួនគាត់តែប៉ុណ្ណោះ។

នៅក្នុងវីឌីអូនោះ បើគេពិនិត្យឱ្យបានដិតដល់ គេឃើញថាទោះបីម្ចាស់សុនខព្យាយាមដកថយពីរបីជំហានហើយក៏ដោយ ក៏សត្វកងគូរូនៅតែដើរសំដៅទៅរកគាត់ និងចាប់ផ្ដើមតាំងឃុំដាក់គាត់ ហាក់ដូចជាចង់ប្រដាល់គ្នាជាមួយគាត់។ គេដឹងថាក្រេកតុងឃីន (Greig Tonkins)ជាមនុស្សស្រឡាញ់សត្វ និងជាបុគ្គលិកបម្រើការនៅសួនសត្វថារ៉ុនហ្កា (Taronga)។ គណៈគ្រប់គ្រងសួនសត្វបានទទួលយកនូវមតិយោបល់របស់ប្រិយមិត្តពាក់ព័ន្ធនឹងហេតុការណ៍នោះ។ ប៉ុន្តែសួនសត្វសម្រេចចិត្តអនុញ្ញាតឱ្យគាត់ធ្វើការនៅទីនេះជាបន្តទៀតទោះបីមតិខ្លះទាមទារឱ្យបណ្ដេញគាត់ចេញពីក្របខណ្ឌការងារយ៉ាងណាក្ដី៕

ប្រភព៖ Daily Mail និងប្រភពដទៃទៀត
https://a-z-animals.com/blog/man-punches-kangaroo-to-save-his-dog-in-most-australian-moment-ever/#:~:text=In%20this%20case%2C%20the%20man,the%20kangaroo%20got%20his%20dog
https://www.dailymail.co.uk/news/article-4003998/The-kangaroo-defended-instead-running-away-Expert-explains-marsupial-dog-HEADLOCK-pooch-s-owner-punched-face.html

វីឌីអូ https://www.youtube.com/watch?v=FIRT7lf8byw&ab_channel=ViralHog