ខេត្តមណ្ឌលគិរី ៖ ប្រជាពលរដ្ឋមានកំណើតជាជនជាតិដើមភាគតិចប្រមាណ១០០នាក់ បាននាំគ្នាប្រមូលផ្តុំលើភ្នំរដាង ដើម្បីរៀបចំពិធីសែនព្រេនដល់ម្ចាស់ទឹកដីអារុក្ខអារក្សអ្នកតាសុំសេចក្តីសុខឡើងវិញ ក្រោយក្នុងភូមិរបស់ពួកគាត់មានកើតហេតុភេទចម្លែកៗ ជាពិសេស អ្នកភូមិមានជំងឺតម្កាត់នានា ហើយថែមទាំងមានអ្នកចង.កធ្វើអត្តឃាតទៀតផងនាពេកកន្លងមក ។…
ខេត្តមណ្ឌលគិរី ៖ ប្រជាពលរដ្ឋមានកំណើតជាជនជាតិដើមភាគតិចប្រមាណ១០០នាក់ បាននាំគ្នាប្រមូលផ្តុំលើភ្នំរដាង ដើម្បីរៀបចំពិធីសែនព្រេនដល់ម្ចាស់ទឹកដីអារុក្ខអារក្សអ្នកតាសុំសេចក្តីសុខឡើងវិញ ក្រោយក្នុងភូមិរបស់ពួកគាត់មានកើតហេតុភេទចម្លែកៗ ជាពិសេស អ្នកភូមិមានជំងឺតម្កាត់នានា ហើយថែមទាំងមានអ្នកចង.កធ្វើអត្តឃាតទៀតផងនាពេកកន្លងមក ។
តំណាងប្រជាពលរដ្ឋអ្នកស្រី រឿន ហែង ដែលបានចូលរួមក្នុងពិធីខាងលើបានឲ្យដឹងថា បន្ទាប់ពីមូលមតិគ្នាពីបងប្អូនអ្នកភូមិរាប់សិបគ្រួសារ កាលពីព្រឹកថ្ងៃទី៣០ វិច្ឆិកា ២០២៣ នៅភ្នំរដាង ក្នុងភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី បានរៀបចំពិធីសែន ក្របី ស្រាពាង ជ្រូក មាន់ ថ្វាយភ្លេងប្រពៃណីវាយគង ដើម្បីថ្វាយដល់អារុក្ខអារក្សអ្នកតាម្ចាស់ទឹកដីដែលថែរក្សាភូមិឋាននេះ ជួយឃុំគ្រងកុំឲ្យអ្នកភូមិកើតមានគ្រោះអាសន្ន ។
អ្នកស្រី រឿន ហែង បានលើកឡើងបែបនេះ ដ្បិតកន្លងមក ក្នុងភូមិពូលូងបានកើតមានហេតុការណ៍ប្លែកៗឧស្សាហ៍មានមនុស្សម្នាឈឺថ្កាត់ រហូតឈានដល់មានមនុស្សចង.កសម្លាប់ខ្លួន។ មិនត្រឹមប៉ុណ្ណោះទេ ទីតាំងអណ្តូងទឹកបុរាណនៅជើងភ្នំរដាង(ក្បាលអូរច្បារឬទឹកច្រប់)ដែលមានអាយុកាលរាប់រយឆ្នាំ ជាច្រើនតំណរ មិនដែលរីងស្ងួតម្តងណានោះ សម្រាប់អ្នកភូមិប្រាស់បែរជាប្រែប្រួលពណ៌ពីថ្លាទៅខៀវយ៉ាងចម្លែក។
កត្តាទាំងនេះ ត្រូវបានអ្នកភូមិចាប់អារម្មណ៍ថា អាចបណ្តាលមកពីសកម្មភាពមិនប្រក្រតីដែលបានកើតមានតាំងពីឆ្នាំ២០១៩ដល់២០២០ ដែលកាលនោះ មានគ្រឿងចក្រមួយចំនួនបានចូលទៅឈូសឆាយដីព្រៃកន្លែងតំណមរបស់អ្នកភូមិលើភ្នំរដាង ក្នុងនោះបំណងហ៊ុមព័ទ្ធយកជាកម្មសិទ្ធិ ។ ក្រោយមានការប្រឆាំងតវ៉ាពីអ្នកភូមិ សកម្មភាពកាប់រានដីនេះក៏ត្រូវផ្អាក ហើយមានការប្តឹងផ្តល់គ្នាឡើងតុលាការអស់ជាច្រើនឆ្នាំ មិនដឹងឈ្នះចាញ់ ។
បន្ទាប់ពីចាស់ទុំក្នុងភូមិបានជួបជំនុំគ្នា ក៏បានគិតគូរអំពីជំនឿតពីដូនតា ដែលទីតាំងសក្ការៈរបស់ពួកគាត់រងការរំខាន បណ្តាលឲ្យរុក្ខអារក្សអ្នកតាកើតមានការខឹងសម្បារ ទើបធ្វើឲ្យអ្នករស់នៅក្នុងភូមិជួបប្រទះបញ្ហាសុខភាព និងកើតមានរឿងជាហូរហែ ។ ដូច្នេះ ដើម្បីមានភាពស្ងប់ស្ងាត់ ក្នុងភូមិឋានរបស់ពួកគាត់ ទើបអ្នកភូមិរៃអង្គាសលុយ៥ម៉ឺនរៀលក្នុងមួយគ្រួសារ ទិញក្របីឡើងកមួយក្បាល ជ្រូកមួយក្បាល មាន់ និងស្រាពាងជាច្រើនទៀត រៀបចំពិធីសែនព្រេនតែម្តង ។
លោក ចាន់ រតនា អភិបាលរងខេត្តមណ្ឌលគិរី ដែលបានអញ្ជើញចូលរួមក្នុងពិធីសែនព្រេនកាប់ក្របី ជាមួយបងប្អូនជនជាតិដើមភាគតិច លោកបានជម្រុញនិងលើកទឹកចិត្តដល់អ្នកភូមិទាំងអស់ នៅពេលមានបញ្ហាសុខភាពត្រូវទៅមន្ទីរពេទ្យដើម្បីពិនិត្យព្យាបាល ហើយបើមានបញ្ហាទំនាស់នានា ត្រូវរិះរកការដោះស្រាយតាមផ្លូវច្បាប់ ដែលអាចធានាដល់សិទ្ធិ និងអត្ថប្រយោជន៍ផ្សេងៗសម្រាប់បងប្អូន ។
លោក ចាន់ រតនា មានប្រសាសន៏ថា អបីយជំនឿរបស់អ្នកភូមិ មិនត្រូវបានហាមឃាត់ដោយសាមីអង្គភាពណាមួយឡើយ ពោលគឺបងប្អូនទាំងអស់ មានសិទ្ធិគោរពប្រតិបត្តិទៅតាមការជឿជាក់របស់ខ្លួន។ហើយសកម្មភាពទាំងនេះ ត្រូវបានលើកទឹកចិត្តពីអាជ្ញាធរ ព្រោះនេះជាការបង្ហាញពីប្រពៃណី វប្បធម៏ របៀបរស់នៅ ដែលសេសសល់តាំងពីបុរាណទៅតាមតំបន់នីមួយៗ ៕
ចែករំលែកព័តមាននេះ