ខេត្តព្រះសីហនុ ៖ ព្រឹកថ្ងៃទី២២ ខែឧសភា ឆ្នាំ២០១១ គណៈកម្មការចំរុះមួយក្រុមដែលមានសមាសភាពមកពីបណ្តាស្ថាប័នពាក់ព័ន្ធមួយចំនួនរួមមានលោក ឆេង លៀង អភិបាលរងក្រុងព្រះសីហនុ លោក ឪ សារឿន ប្រធានមន្ទីរព័ត៌មានខេត្ត លោកហែម សារឿន ប្រធានមន្ទីរបរិស្ថានខេត្ត លោក រស់ វិបុល អនុប្រធានមន្ទីរទេសចរណ៍ខេត្ត និងជាប្រធានការិយាល័យ អេកូទេសចរណ៏ និងតំណាងលោកណុប ហេង ប្រធានមន្ទីរគមនាគមន៍ខេត្ត បានចុះត្រួតពិនិត្យនិងតាមដានស្រាវជ្រាវរកប្រភពទឹកស្អុយគឺទឹកពណ៌ខ្មៅដែលកំពុងបំពុលបរិស្ថាននិងបាន ហូរចាក់ចូលសមុទ្រ បន្ទាប់ពីមានប្រតិកម្មយ៉ាង ខ្លាំងពីប្រជាពលរដ្ឋ ដែលមានទីលំនៅក្នុងក្រុម១៧ ភូមិ៤ សង្កាត់៤ ក្រុងព្រះសីហនុ និងភ្ញៀវទេសចរមួយចំនួនដែលបានឆ្លងកាត់តំបន់នោះ។
ប្រជាពលរដ្ឋម្នាក់រស់នៅជាប់ព្រែក គល់ស្ពានអតីតដំណាក់ស្តេចស្ថិតក្នុងក្រុម១៧ ភូមិ៤ សង្កាត់៤ ក្រុងព្រះសីហនុបានរៀបរាប់ថា បើនិយាយពីព្រែកមួយនេះគឺចំណុចព្រែកអតីតដំណាក់ស្តេចចុងឆ្នេរអូរឈើទាលកាលពីដើមមានទឹកថ្លាឈ្វេង មានមច្ឆាជាច្រើនប្រភេទនិងអាចចុះងូតទឹកបានយ៉ាងត្រជាក់។ ប៉ុន្តែប៉ុន្មានឆ្នាំចុងក្រោយនេះទឹកព្រែកទាំងមូលដែលមានប្រវែង៤គីឡូម៉ែត្របានប្រែក្លាយទៅជាពណ៌ខ្មៅ ល្អក់ សូម្បីតែត្រី និងស្មៅដែលដុះនៅជាប់មាត់ ព្រែកក៏ងាប់គ្មានសល់ដែរ។ មិនត្រឹមតែប៉ុណ្ណោះ
ទឹកខ្មៅកខ្វក់ ហើយមានក្លិនស្អុយនេះបានហូរចាក់ចូលទៅក្នុងសមុទ្រធ្វើឱ្យទឹកសមុទ្រមានពណ៌ខ្មៅរីករាលដាលចំងាយ១គីឡូមែត្របួនជ្រុងដែលនៅជាប់ពីមុខព្រែកធ្វើឱ្យមានការប៉ះពាល់ យ៉ាងធ្ងន់ធ្ងរដល់បរិស្ថាននៅតំបន់ឆ្នេរអូរឈើទាលដែលជាតំបន់ទេសចរណ៍ដ៏សំខាន់របស់ខេត្តព្រះសីហនុ។
ប្រភពដដែលបានបន្តទៀតថា រយៈពេល២ឆ្នាំហើយដែលរូបគាត់ទ្រាំរស់នៅជាមួយក្លិនស្អុយ ដោយគ្មានអាជ្ញាធរណាឬស្ថាប័នពាក់ព័ន្ធណាមួយអើពើឡើយ។ សូម្បីតែខាងមន្ទីរបរិស្ថានដែលមានលោក ហែម សារឿនជាប្រធាននោះក៏ពុំដែលយកភ្នែកមើលឬមកតាមដានសួរនាំទេ ប្រៀបដូចអត់សមត្ថភាព។
ប្រជាពលរដ្ឋដដែលបានបន្តទាំងញញឹមថា រហូតមកដល់ព្រឹកថ្ងៃទី២២ ឧសភា ទើបឃើញមានគណៈកម្មការមួយក្រុមចុះមកស្រាវជ្រាវ និងត្រួតពិនិត្យពីផលប៉ះពាល់បរិស្ថានដ៏ធ្ងន់ធ្ងរដែលមានរយៈពេល២ឆ្នាំមកហើយនេះ។ ដូចនេះសង្ឃឹមថា អស់លោកគណៈកម្មការចំរុះដែលមានវត្តមាននៅថ្ងៃនេះនឹងមានវិធានការទប់ស្កាត់ទៅនឹងផលប៉ះពាល់ទាំងនេះជាក់ជាពុំខាន។
លោក ឆេង លៀង អភិបាលរងក្រុង និង លោក ឱ សារឿន ប្រធានមន្ទីរព័ត៌មានខេត្ត បានអោយអ្នកយកព័ត៌មានដឹងថា លោកនឹងរាយការណ៍ទៅលោក ស្បោង សារ៉ាត អភិបាលខេត្តដើម្បីសុំបើកការប្រជុំមួយជាបន្ទាន់ឆ្ពោះទៅ រកដំណោះស្រាយនិងវិធានការទប់ស្កាត់ជាបន្ទាន់នូវផលប៉ះពាល់បរិស្ថានដ៏ធ្ងន់ធ្ងរនេះ។ ចំពោះមូលហេតុដែលបង្កឱ្យមានការប៉ះពាល់បរិស្ថានធ្ងន់ធ្ងរនេះនិងលទ្ធផលស្តីពីដំណោះស្រាយវិធានការទប់ស្កាត់លោកនឹងបកស្រាយនៅក្រោយអង្គប្រជុំ ៕
ចែករំលែកព័តមាននេះ