ខេត្តប៉ៃលិន ៖ រហូតមកដល់ថ្ងៃទី២៧ ខែវិច្ឆិកា ឆ្នាំ២០២៣នេះ ប្រជាពលរដ្ឋរស់នៅជុំវិញផ្សារ និងអាជីវករលក់ដូរនៅក្នុងផ្សារសាមគ្គី ហៅប៉ាហ៊ី បានលើកឡើងទាំងព្រួយបារម្ភយ៉ាងខ្លាំងថា ពួកគាត់ពិតជាដេកមិនលក់ បក់មិនល្ហើយនោះទេ ខណៈពេលដែលឃើញមានជនមិនស្គាល់មុខបានលួ.ចបង្គរគំនរភ្លើង នៅក្នុងបរិវេណផ្សារសាមគ្គីផ្នែកខាងលើ ក្បែរតូបចំនួន៤កន្លែង លុះដល់រំលងអធ្រាត្រ ខណៈពេលកំពុងតែដុតនោះ ស្រាប់តែផ្ទុះទុយោទឹករលត់ភ្លាមៗតែម្ដង។
ហេតុការណ៍ជនល្មើសលួ.ចដុតផ្សារសាមគ្គីផ្នែកខាងលើនេះ បង្កឱ្យមានការភ្ញាក់ផ្អើលដល់ប្រជាពលរដ្ឋនាំគ្នាចេញទៅមើលនេះ កាលពីវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី២៤ ខែវិច្ឆិកា ឆ្នាំ២០២៣ ស្ថិតនៅចំណុចផ្សារសាមគ្គី(ផ្សារលើ) ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។
បើតាមការរៀបរាប់ពីអាជីវករលក់ដូរ និងប្រជាពលរដ្ឋរស់នៅជុំវិញផ្សារសាមគ្គី ហៅប៉ាហ៊ី បានប្រាប់ឱ្យភ្នាក់ងារយើងដឹងថា ខណ:ពេលដែលពួកគាត់កំពុងតែដេកលង់លក់សុខៗ ស្រាប់តែមានករណីជនល្មើសបានលួ.ចដុតផ្សារនេះចំនួន៤កន្លែង ដោយយកឆ័ត្រចំនួន២គ្រឿងទៅផ្គុំគ្នាដុត។ តែសំណាងល្អ នៅពេលកំពុងតែដុតសុខៗ ស្រាប់តែប៉ះចំទុយោទឹក បណ្តាលឱ្យផ្ទុះបា.ញ់ទឹកមកប៉ះភ្លើងកំពុងឆេះនោះឱ្យរលត់ ហើយពួកគាត់ក៏ភ្ញាក់ រួចនាំគ្នាចេញទៅជួយពន្លត់ទាន់ពេល។
ប្រភពព័ត៌មានដដែលបានឱ្យដឹងទៀតថា ពួកគាត់ពិតជាមានការព្រួយបារម្ភពីសន្តិសុខ និងសុវត្ថិភាពយ៉ាងខ្លាំង ខណ:ដែលម្នាក់ៗបានផ្ទុកទំនិញសម្លៀកបំពាក់ និងគ្រឿងសម្ភារ:លក់ដូរយ៉ាងច្រើននៅតាមតូបក្នុងផ្សារ។
បើតាមប្រភពព័ត៌មានពីអាជីវករ បានឱ្យដឹងដែរថា «ការលួ.ចដុតផ្សារសាមគ្គី ហៅប៉ាហ៊ីនេះ មានចំនួន៣លើកមកហើយ តែមិនទទួលបានជោគជ័យ»។
អាជីវករបញ្ជាក់ទៀតថា «ជារៀងរាល់ខែ ពួកគាត់បានបង់ប្រាក់ថ្លៃសន្តិសុខយាម ដោយក្នុង១ខែចំនួន១ទៅ២ម៉ឺនរៀលដែរ។ តែសន្តិសុខហាក់ដូចជាមិនមានការយកចិត្តទុកដាក់ ការពារសន្តិសុខសុវត្ថិភាពជូនដល់ពួកគាត់ទាល់តែសោះ។ ដូច្នេះ ពួកគាត់ក៏សំណូមពរដល់សមត្ថកិច្ចអធិការក្រុងប៉ៃលិន ស្នងការនគរបាលខេត្ត និងអាជ្ញាធរគ្រប់លំដាប់ថ្នាក់ ជួយមើល និងការពារសុវត្ថិភាពផ្សារនេះជូនពួកគាត់ផងដែរ។ ពួកគាត់ពិតជាគ្មានភាពកក់ក្តៅក្នុងការរស់នៅប្រចាំថ្ងៃនោះឡើយ»។
ពាក់ព័ន្ធនឹងបញ្ហាខាងលើនេះ លោក លី សុងហ៊ី អភិបាលក្រុងប៉ៃលិន បានឱ្យដឹងថា «ករណីជនល្មើសលួ.ចដុតផ្សារសាមគ្គី ហៅប៉ាហ៊ី ពេលនេះខាងសមត្ថកិច្ចគ្រប់លំដាប់ថ្នាក់ កំពុងតែតាមស៊ើបអង្កេត ដោយដឹងតម្រុយខ្លះៗ ហើយអាចនឹងឈានដល់ការហៅអ្នកដែលជាប់ពាក់ព័ន្ធពីការសង្ស័យនេះ យកទៅសួរនាំ ដើម្បីចាត់ការតាមផ្លូវច្បាប់។
គួរបញ្ជាក់ថា ភ្នាក់ងារយើងបានទាក់ទងទៅលោក យ៉ែម សារិទ្ធ អធិការនគរបាលក្រុងប៉ៃលិន តាមទូរស័ព្ទ បានឱ្យដឹងថា ខាងលោកបានដឹងតម្រុយជនល្មើសរួចរាល់អស់ហើយ ពេលនេះកំពុងតែស៊ើបអង្កេតបន្ត ដើម្បីចាត់ការតាមផ្លូវច្បាប់។
ចំណែកលោក ឡាំ សំរិទ្ធ ស្នងការរងទទួលបន្ទុកអ្នកនាំពាក្យនៃនគរបាលស្នងការខេត្ត ក៏ទូរស័ព្ទចូល គ្មានអ្នកទទួល៕
ចែករំលែកព័តមាននេះ