- ភ្នំពេញ
អ្នកធ្លាក់បាក់ឌុប អាចស្រក់ទឹកភ្នែក ដោយសារតែប្រឡងធ្លាក់។ ប៉ុន្តែត្រូវប្រែក្លាយការបរាជ័យនេះ អោយទៅជាការតស៊ូកសាងអនាគតនាពេលអនាគត ពីព្រោះថា ធ្លាក់បាក់ឌុបមិនមែនមានន័យថា
អ្នកធ្លាក់បាក់ឌុប អាចស្រក់ទឹកភ្នែក ដោយសារតែប្រឡងធ្លាក់។ ប៉ុន្តែត្រូវប្រែក្លាយការបរាជ័យនេះ អោយទៅជាការតស៊ូកសាងអនាគតនាពេលអនាគត ពីព្រោះថា ធ្លាក់បាក់ឌុបមិនមែនមានន័យថា អនាគតចប់ត្រឹមនេះឡើយ។
ឱកាសនៅតែមាន ប្រសិនបើយើងចេះឈឺចាប់ ហើយប្រែក្លាយការឈឺចាប់ ពោលគឺបរាជ័យនៅក្នុងពេលនេះ ទៅជាកម្លាំងជំរុញ និងខំប្រឹងឡើងវិញ ។
ការប្រឡងសញ្ញបត្រមធ្យមសិក្សាទុតិយភូមិ សម័យប្រឡងថ្ងៃទី៦ ខែវិច្ឆិកា ឆ្នាំ២០២៣ ដែលមានបេក្ខជនចុះឈ្មោះប្រឡងសរុបចំនួន ១៣៧.៤១២នាក់ ចែកជា ២២៧មណ្ឌលប្រឡង ត្រូវជា ៥.៥៤៣បន្ទប់ លទ្ធផលចេញហើយដោយក្រសួងអប់រំ យុវជន និងកីឡា បានប្រកាសថា សិស្សានុសិស្ស និងបេក្ខជនដែលប្រឡងជាប់ គឺមាន ៧២,៨៩ ភាគរយ ស្មើនឹង ៩៨.៤៦០នាក់។ នៅក្នុងនោះ ទទួលបាននិទ្ទេស A ចំនួន១.៦៧៣នាក់, និទ្ទេស B ចំនួន៦.៩៦៤នាក់, និទ្ទេស C ចំនួន១៨.៣០៨នាក់, និទ្ទេស D ចំនួន៣៤.២៤៦នាក់ និងនិទ្ទេស E ចំនួន៣៧.២៦៩នាក់ ក្រៅពីនោះ គឺជាអ្នកធ្លាក់ ។
ចំពោះអ្នកធ្លាក់ប្រហែលជាអ្នកខ្លះត្រូវឪពុកម្តាយស្តីបន្ទោស ខ្លះទៀតក៏លួងលោមលើកទឹកចិត្ត។ ប៉ុន្តែទោះបីជាយ៉ាងណាក៏ដោយ ប្អូនៗកុំដាក់ទោសខ្លួនឯងបន្ថែមទៀត ។ ប្អូនយំចុះ តែត្រូវជូតទឹកភ្នែក ហើយតាំងចិត្តអោយកាន់តែរឹងមាំធ្វើដំណើរទៅមុខទៀតក្នុងវិថីជីវិ.ត។
ប្អូនៗដែលបរាជ័យមិនមែនជាអ្នកនៅក្រៅសង្គមទេ។ សម្តេចធិបតី នាយករដ្ឋមន្ត្រី ក៏មិនបំភ្លេចអ្នកទាំងអស់គ្នាដែរ ដោយក្រៅពីបានអបអរសាទរចំពោះបេក្ខជនប្រឡងជាប់ហើយ សម្តេចក៏បានប្រាប់ថា «បេក្ខជនដែលបានទទួលលទ្ធផលមិនល្អ កុំបាក់ទឹកចិត្ត ត្រូវខិតខំប្រឹងប្រែងរៀនសូត្របន្ថែមទៀត»។
សម្ដេចតេជោបន្ដថា «សូមកុំបាក់ទឹកចិត្ត ហើយត្រូវខិតខំប្រឹងប្រែងរៀនសូត្របន្ថែម ដើម្បីអាចទទួលបានលទ្ធផលល្អក្នុងការប្រឡងនាឆ្នាំក្រោយ ឬអាចនឹងចាប់យកឱកាសក្នុងការសិក្សាជំនាញវិជ្ជាជីវៈ ឬកម្រិតនៃការសិក្សាបន្ទាប់ ដើម្បីនឹងបន្តអភិវឌ្ឍន៍សិក្សាជំនាញអាជីពសម្រាប់អនាគតដ៏ភ្លឺស្វាងនៅពេលខាងមុខ»។
នៅចាំទេ! កាលពីថ្ងៃទី១៤ ខែវិច្ឆិកា ថ្មីៗនេះ រាជរដ្ឋាភិបាលបានប្រកាសជាផ្លូវការនូវគោលនយោបាយបណ្ដុះបណ្ដាលជំនាញវិជ្ជាជីវៈដល់យុវជនចំនួន១,៥លាននាក់ ដោយការបណ្ដុះបណ្ដាលនេះ មានមុខជំនាញចំនួន៣៨ នៅក្នុងវិស័យចំនួន១០ រួមមាន ៖ វិស័យសំណង់ អគ្គិសនី អេឡិចត្រូនិក មេកានិកទូទៅ ទេសចរណ៍ សេវាកម្ម កសិកម្ម កសិឧស្សាហកម្ម ធុរៈកិច្ច និងបច្ចេកវិទ្យាព័ត៌មានជាដើម។
ប្អូនៗអាចដាក់ចិត្ត ដាក់កាយ ចាប់យកអាជីពខាងលើនេះសិនក៏បាន ដោយនៅក្នុងអំឡុងពេលរៀន ប្អូនៗមិនតម្រូវឱ្យមានការបង់ប្រាក់នោះទេ ហើយសម្រាប់អ្នកចូលរួមបណ្ដុះបណ្ដាលពេញម៉ោង អាចនឹងទទួលបានប្រាក់ឧបត្ថម្ភប្រចាំខែចំនួន២៨ម៉ឺនរៀលបន្ថែមផងដែរ ហើយនៅពេលរៀនចប់អាចមានឱកាសធ្វើការ បង្កើតមុខរបរខ្លួនឯង ពោលគឺអាចរកប្រាក់ចិញ្ចឹមជីវិ.តបាន មុនអ្នកជាប់ផងក៏ថាបាន ។
ក្រៅពីមុខជំនាញបណ្តុះបណ្តាលវិជ្ជាជីវៈទាំងនេះ ប្អូនៗក៏អាចនឹងចុះឈ្មោះរៀនបរិញ្ញាប័ត្ររងក៏បាន។ នៅពេលរៀនចប់ ប្អូនៗក៏អាចនឹងមានសិទ្ធិចុះឈ្មោះរៀនបន្តរហូតដល់ថ្នាក់បិរញ្ញាប័ត្រ អនុបណ្ឌិត និងបណ្ឌិតក៏បានដែរ ។ សង្គមយើងមិនបិទឱកាសទេ។ ដូច្នេះ កុំបាក់ទឹកចិត្ត ហើយនៅក្នុងករណីយើងនៅតែចង់បានសញ្ញាប័ត្របាក់ឌុបនេះ គឺអាចបន្តរំលឹកមេរៀនចាស់ៗជាប្រចាំ រហូតដល់ពេលចុះឈ្មោះប្រឡង។ យើងអាចដាក់ប្រឡងនៅក្នុងនាមជាបេក្ខជនស្វ័យរិន ក៏បានដូចគ្នា ដូច្នេះព្រួញមួយអាចបា.ញ់បានសត្វពីរ។
បរាជ័យនៅពេលនេះ មិនមែនប្អួនៗគ្មានផ្លូវដែលត្រូវដើរឡើយ ។ សូមកែប្រែខ្លួន ហើយខំប្រឹងសិក្សាចាប់យកឱកាស ហើយប្រែក្លាយការបរាជ័យទៅជាកម្លាំងធ្វើយ៉ាងណាចាប់ឱកាស ហើយទម្លុះរនាំងនៃឧបសគ្គ ដើម្បីធ្វើយ៉ាងណាអោយអនាគតយើងអាចភ្លឺស្វាង នៅពេល អនាគត ។ អនាគតល្អ គ្មានឡើយសម្រាប់អ្នកដែលគ្មានការតស៊ូ ហើយដេកដួលនឹងបរាជ័យ ។ បរាជ័យនៅកន្លែងណា ក្រោកឈរ ហើយព្យាយាមច្បាមឱកាសនៅកន្លែងនោះ ហើយធ្វើដំណើរឆ្ពោះទៅកន្លែងដែលភ្លឺស្វាង ៕
អត្ថបទដោយ ៖ ហេង ចេស្តារ
ចែករំលែកព័តមាននេះ