អូឡាំពិក ២០២៤ ថែមសំបុត្រ៤០ម៉ឺនសន្លឹក ក្រោយជាង៧លានសន្លឹកលក់ដាច់គ្មានសល់
ប្រទេសបារាំង ៖ អ្នករៀបចំព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ (Paris 2024) កាលពីថ្ងៃ
ប្រទេសបារាំង ៖ អ្នករៀបចំព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ (Paris 2024) កាលពីថ្ងៃទី២២ ខែវិច្ឆិកា ឆ្នាំ២០២៣ កន្លងទៅ បានប្រកាសថា សំបុត្រទស្សនាប្រហែល៤០ម៉ឺនសន្លឹកបន្ថែមទៀត នឹងត្រូវដាក់លក់នៅសប្តាហ៍ចុងក្រោយនៃខែវិច្ឆិកានេះ បន្ទាប់ពីសំបុត្រចំនួន ៧.២លានសន្លឹកលក់ដាច់គ្មានសល់។ នេះបើយោងតាមប្រភពពីគេហទំព័រផ្លូវការរបស់គណៈកម្មាធិការអូឡាំពិកអន្តរជាតិ ហៅកាត់ថា IOC ចេញផ្សាយកាលពីថ្ងៃទី២៣ ខែវិច្ឆិកា ឆ្នាំ២០២៣។
ព្រឹត្តិការណ៍ប៉ារីសឆ្នាំ ២០២៤ សង្ឃឹមថានឹងលក់សំបុត្រសរុបចំនួន ១០លានសន្លឹកសម្រាប់ការប្រកួតកីឡារដូវក្តៅរបស់ខ្លួន ចាប់ពីថ្ងៃទី២៦ ខែកក្កដា រហូតដល់ថ្ងៃទី១១ ខែសីហា បន្ទាប់ពី ៧.២លានសន្លឹកលក់ដាច់គ្មានសល់។ នេះបើតាមការបញ្ជាក់ពីលោក Michael Aloisio ប្រធានផ្នែកប្រតិបត្តិការនៃព្រឹត្តិការណ៍។ លោកបានបន្ថែមយ៉ាងដូច្នេះថា «ខ្ញុំមិនគិតថាគណៈកម្មាធិការរៀបចំផ្សេងទៀតបានលក់សំបុត្រច្រើនយ៉ាងនេះទេ»។
អ្នករៀបចំព្រឹត្តិការណ៍បានបញ្ជាក់ថា សំបុត្រភាគច្រើនគឺសម្រាប់ព្រឹត្តិការណ៍កីឡាអូឡាំពិក ហើយសំបុត្រសម្រាប់ពិធីបើក និងបិទក៏មានផងដែរ។ មួយភាគបីនៃសំបុត្រដែលទើបចេញថ្មីនឹងមានតម្លៃក្រោម៥០អឺរ៉ូ នៅគ្រប់វិញ្ញាសាប្រកួតទាំងអស់ លើកលែងតែកីឡាស្គីលើទឹក (Surfing)។ សំបុត្រប្រហែល ៣០ម៉ឺនសន្លឹកដែលមាននៅថ្ងៃទី៣០ ខែវិច្ឆិកា នឹងមានសម្រាប់វគ្គអត្តពលកម្ម ជាមួយនឹង ២៤,០០០សន្លឹកផ្សេងទៀត សម្រាប់កីឡាវាយកូនបាល់ (Tennis)។ សំបុត្រថ្លៃបំផុតប្រចាំព្រឹត្តិការណ៍ប៉ារីសឆ្នាំ ២០២៤ មានតម្លៃ ២,៧០០អឺរ៉ូ ស្មើនឹង ២,៩០០ដុល្លារអាមេរិក សម្រាប់ពិធីបើក និងសំបុត្រតម្លៃថោកបំផុតមានចំនួន ២៤អឺរ៉ូ ស្មើនឹង ២៦ដុល្លារ។
ទន្ទឹមជាមួយគ្នានោះ អ្នករៀបចំក៏កំពុងស្វែងរកការលក់សំបុត្រចំនួន ២.៨លានសន្លឹកសម្រាប់ព្រឹត្តិការណ៍ប៉ារ៉ាឡាំពិករបស់ខ្លួនផងដែរ ដោយបានបញ្ជាក់ថា ពួកគេនឹងផ្តល់ព័ត៌មានលម្អិតបន្ថែមនៅចុងឆ្នាំ ២០២៣ ។
គួរបញ្ជាក់ថា ព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ នឹងដំណើរការចាប់ពីថ្ងៃទី២៦ ខែកក្កដា រហូតដល់ថ្ងៃទី១១ ខែសីហា ដោយមាន ៣២ប្រភេទកីឡា និង ៤៨វិញ្ញាសាប្រកួត ហើយបន្ទាប់មក ព្រឹត្តិការណ៍កីឡាប៉ារ៉ាឡាំពិក នឹងប្រព្រឹត្តទៅចាប់ពីថ្ងៃទី២៨ ខែសីហា រហូតដល់ថ្ងៃទី៨ ខែកញ្ញា៕ (ប្រភព ៖ Inside The Games)
ចែករំលែកព័តមាននេះ