នៅក្រោមម្លប់ឈើមួយដើមធំ ផ្លូវឡើងចំណោតមកភ្នំប្រុសភ្នំស្រី ស្ថិតក្នុងស្រុកកំពង់សៀម គេប្រទះឃើញស្ត្រីចំណាស់ម្នាក់បានឱ្យកូនស្រីរបស់ខ្លួនដែលមានជំងឺឈឺមើលមិនជារយៈពេលជាច្រើនឆ្នាំមកហើយ មកដេករង់ចាំការប្រោសព្រំពីព្រះអង្គធម្មវនវាសី ច័ន្ទមុន្នី ដែលកំពុងតែល្បីពេញបណ្ដាញសង្គមថា
ខេត្តកំពង់ចាម ៖ នៅក្រោមម្លប់ឈើមួយដើមធំ ផ្លូវឡើងចំណោតមកភ្នំប្រុសភ្នំស្រី នាវេលាម៉ោងជាង១១ព្រឹក ថ្ងៃទី២២ ខែវិច្ឆិកា ឆ្នាំ២០២៣ ស្ថិតក្នុងស្រុកកំពង់សៀម គេប្រទះឃើញស្ត្រីចំណាស់ម្នាក់បានឱ្យកូនស្រីរបស់ខ្លួនដែលមានជំងឺឈឺមើលមិនជារយៈពេលជាច្រើនឆ្នាំមកហើយ មកដេករង់ចាំការប្រោសព្រំពីព្រះអង្គធម្មវនវាសី ច័ន្ទមុន្នី ដែលកំពុងតែល្បីពេញបណ្ដាញសង្គមថា «លោកមានបារមីអាចប្រោសជំងឺឲ្យជាសះស្បើយបាន ប្រសិនបើមានឧបនិស្ស័យជាមួយនឹងព្រះអង្គ»។
បើតាមអ្នកស្រី ឃ្លាំង សុធារី អាយុ៥៧ឆ្នាំ រស់នៅឃុំហាន់ជ័យ ស្រុកកំពង់សៀម បានរៀបរាប់ឲ្យដឹងថា «កូនស្រីរបស់គាត់ឈ្មោះ ហុង សាវី អាយុ៦ឆ្នាំ ត្រូវនាំទៅចុះឈ្មោះចូលរៀននៅសាលាបឋមសិក្សាមួយកន្លែង ស្ថិតក្នុងភូមិហាន់ជ័យ តែកូនស្រីរបស់គាត់ រៀនមិនសូវចេះចាំនឹងគេនោះទេ។ រហូតមកដល់រៀនបានថ្នាក់ទី៥ កូនស្រីក៏ចាប់ផ្ដើមឈឺ ហើយការរៀនសូត្រចេះតែមានការថមថយ ដោយមិនអាចចាប់អ្វីដែលគ្រូបង្រៀនបានឡើយ»។
អ្នកស្រីសុធារី រៀបរាប់បន្តឱ្យដឹងទៀតថា «ដោយសារតែបញ្ហាសុខភាព កូនស្រីមានជំងឺមិនចងចាំបាន ជួនកាលពេលនៅផ្ទះនឹកឃើញរៀន ក៏ទាញសៀវភៅមករៀន។ ដោយឃើញសភាពបែបនេះ គឺគាត់មិនអនុញ្ញាតឲ្យកូនទៅរៀនបន្តទៀតនោះទេ។ បន្ទាប់មក គាត់ក៏បាននាំកូនស្រីមករកគ្រូពេទ្យ ដើម្បីឱ្យជួយព្យាបាលជំងឺ ទាំងពេទ្យរដ្ឋ និងឯកជន នៅក្នុងខេត្តកំពង់ចាម ព្រមទាំងមន្ទីរពេទ្យមួយទៀតនៅឯរាជធានីភ្នំពេញ។ ប៉ុន្តែនៅពេលកូនស្រីលេបថ្នាំដំបូង គឺបានធូរស្រាល តែអស់ជាតិថ្នាំក៏រើឡើងវិញដដែល ហើយកូនស្រីដែលឈឺនេះ គឺជាកូនទី៤ និងជាកូនពៅទៀតផង»។
អ្នកស្រីសុធារី ប្រាប់បន្តទៀតថា «លុះនៅព្រឹកថ្ងៃទី២២ ខែវិច្ឆិកា ឆ្នាំ២០២៣នេះ ក៏ឮដំណឹងថា ព្រះអង្គ ចន្ទ មុន្នី និមន្តមកកាន់ភ្នំប្រុសភ្នំស្រី គាត់ក៏ប្រញាប់ប្រញាល់ដឹកកូនស្រីមកឈប់សម្រាកនៅក្រោមដើមឈើធំមួយ និងបានឲ្យកូនស្រីដេករង់ចាំជាច្រើនម៉ោង តែមិនទាន់ឃើញព្រះអង្គនិមន្តមកដល់នៅឡើយ»។
ស្ថិតក្នុងទឹកមុខទាំងស្រងូតស្រងាត់ និងសប្បាយផង អ្នកស្រីសុធារី បានលើកឡើងទៀតថា«បើសិនជាកូនស្រីរបស់គាត់មានឧបនិស្ស័យជាមួយនឹងព្រះអង្គមែននោះ អាចនឹងប្រោសជំងឺកូនស្រីរបស់គាត់អោយជាក៏ថាបានដែរ»។
ចំណែកលោកយាយអ៊ិ តេក អាយុ៧៨ឆ្នាំ រស់នៅភូមិដៃបួន ឃុំជ្រៃវៀន ស្រុកព្រៃឈរ ក៏បានមានប្រសាសន៍ឱ្យដឹងដែរថា «គាត់មានជំងឺឈឺដៃជើង និងរាងកាយជាច្រើនឆ្នាំមកហើយ ព្យាបាលមិនព្រមជាសោះ ហើយថែមទាំងពិបាកដើរទៀតផង។ បន្ទាប់មកគាត់ក៏ទទួលបានដំណឹងថា ព្រះសង្ឃ ចន្ទ មុន្នី និមន្តមកកាន់ភ្នំប្រុស ក្នុងទឹកដីស្រុកកំពង់សៀម គាត់រួមទាំងសមាជិកក្រុមគ្រួសារជាច្រើននាក់ នាំគ្នាជិះរថយន្តឈ្នួលមួយគ្រឿង ធ្វើដំណើរមកកាន់វត្តភ្នំប្រុស ក្នុងគោលបំណងសុំសេចក្តីសុខពីព្រះសង្ឃ និងធ្វើយ៉ាងណាឲ្យគាត់បានជាសះស្បើយពីជំងឺ»។
រីឯលោក រ៉េត សារ៉ាត ប្រធានមន្ទីរធម្មការ និងសាសនាខេត្តវិញ បានបញ្ជាក់ឲ្យដឹងនៅព្រឹកថ្ងៃទី២៣ ខែវិច្ឆិកា ឆ្នាំ២០២៣ នេះថា «គ្រាន់តែពុទ្ធបរិស័ទដែលរង់ចាំទទួលព្រះអង្គនិមន្តមកកាន់ទឹកដីខេត្តកំពង់ចាម គឺពួកគាត់នាំគ្នាមកចាំតាំងពីព្រឹកព្រលឹមថ្ងៃទី២២ ខែវិច្ឆិកា ឆ្នាំ២០២៣ រហូតមកដល់ពេលល្ងាច ទើបព្រះអង្គ ចន្ទ មុន្នី បាននិមន្តមកដល់កម្មវិធីបុណ្យមួយ ស្ថិតក្នុងស្រុកកំពង់សៀម ដើម្បីសម្ដែងធម៌ទេសនា»។
សូមបញ្ជាក់ថា តាមទីតាំងជាច្រើន ក្នុងនោះមានដូចជានៅ ៖ បាធាយ រង្វង់មូលស្គន់ ស្រុកជើងព្រៃ, ផ្សារព្រៃទទឹង ស្រុកព្រៃឈរ, ច្រកឡើងភ្នំប្រុសភ្នំស្រី, មុខមន្ទីរពេទ្យ៧ដេ ស្រុកកំពង់សៀម និងមុខស្នងការដ្ឋាននគរបាលខេត្ត ដែលសរុបពលរដ្ឋទាំងអស់មានប្រមាណជាង៧ម៉ឺននាក់ឯណោះ។
ហើយបើតាមថេរដីការបស់ព្រះអង្គ ចន្ទ មុន្នី បានសង្កត់ធ្ងន់ឱ្យខ្មែរចេះសាមគ្គីគ្នាជាធ្លុងមួយ ដើម្បីឲ្យជាតិយើងមានការរីកចម្រើនក្រោមម្លប់សន្តិភាពការដឹកនាំរបស់សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយគ្នានោះដែរ ប្រជាពលរដ្ឋដែលមានជំងឺ ក្នុងគោលបំណងឲ្យព្រះអង្គប្រោសព្រំ ដើម្បីបានជាជំងឺនោះ គឺរូបលោកពុំទាន់ទទួលបានដំណឹងថា តើមានអ្នកជំងឺប៉ុន្មាននាក់បានជានោះទេ0x017d7 ហើយរហូតដល់វេលាម៉ោងជាង៧យប់ ថ្ងៃទី២២ ខែវិច្ឆិកា ទើបព្រះអង្គ ចន្ទ មុន្នី បាននិមន្តតាមរថយន្តឆ្ពោះទៅកាន់វត្តតាសុត ស្ថិតនៅស្រុករលាប្អៀរ ខេត្តកំពង់ឆ្នាំងវិញ។
ចែករំលែកព័តមាននេះ