នៅទីបំផុត បវរកញ្ញាកម្ពុជា ស្រីស្អាត ចន សុទីម៉ា មិនបានជាប់ Top ណាមួយនៃការកម្មវិធី «Miss Universe 2023» ដូចការរំពឹងរបស់អ្នកគាំទ្រឡើយ សម្រាប់ការប្រកួតវគ្គផ្តាច់ព្រ័ត្រដែលធ្វើឡើងកាលពីថ្ងៃទី១៩ ខែវិច្ឆិកា ឆ្នាំ២០២៣នេះ
រាជធានីភ្នំពេញ ៖ នៅទីបំផុត បវរកញ្ញាកម្ពុជា ស្រីស្អាត ចន សុទីម៉ា មិនបានជាប់ Top ណាមួយនៃការកម្មវិធី «Miss Universe 2023» ដូចការរំពឹងរបស់អ្នកគាំទ្រឡើយ សម្រាប់ការប្រកួតវគ្គផ្តាច់ព្រ័ត្រដែលធ្វើឡើងកាលពីថ្ងៃទី១៩ ខែវិច្ឆិកា ឆ្នាំ២០២៣នេះ។
តាមរយៈការបង្ហាញសមត្ថភាពនៅក្នុងវគ្គនីមួយៗនោះ ស្រីស្អាត ចន សុទីម៉ា ត្រូវបានអ្នកគាំទ្រកម្ពុជាជាច្រើននាក់ ដាក់សេចក្តីទុកចិត្តថា បវរកញ្ញាកម្ពុជារូបនេះ អាចនឹងចូល Top ណាមួយ នៃកម្មវិធីខាងលើ បើទោះបីជាមិនរំពឹងពីការគ្រងមកុដក៏ដោយ។ យ៉ាងណា នៅក្នុងវគ្គផ្តាច់ព្រ័ត្រនោះ គណៈកម្មការបានប្រកាសបេក្ខនារីដែលអាចឈានជើងចូលដល់ Top 20 ដំបូង នោះគឺមិនមានឈ្មោះ ចន សុទីម៉ា បវរកញ្ញាតំណាងប្រទេសកម្ពុជានោះឡើយ។
ចំណុចខាងលើនេះ បានធ្វើអោយមហាជន ជាពិសេសបណ្តាអ្នកគាំទ្រស្រីស្អាត ចន សុទីម៉ា បានសម្តែងការសោកស្តាយយ៉ាងខ្លាំង ក្នុងពេលដែលអ្នកស្នេហាវិស័យបវរកញ្ញានៅកម្ពុជាមួយចំនួន បានចាត់ទុកការជ្រើសរើសរបស់គណៈកម្មការហាក់មិនមានភាពយុត្តិធម៌។ មិនយុត្តិធម៌នោះ គឺដោយសារតែគេមើលឃើញថា បេក្ខនារីមួយចំនួន ដែលអាចឈានចូលដល់វគ្គ Top នោះ គឺមិនសាកសម ព្រោះមានបេក្ខនារីខ្លះមានរូបរាងធាត់មិនស្អាត និងមានអ្នកកែភេ.ទផងដែរ។
យ៉ាងណា បើទោះបីជាមិនបានជាប់នៅក្នុងការប្រកួតខាងលើនេះក៏ដោយ មហាជនខ្មែរនៅតែសម្តែងការគាំទ្រ សរសើរ និងលើកទឹកចិត្តទៅកាន់ស្រីស្អាត ចន សុទីម៉ា ដែលអាចបង្ហាញសមត្ថភាពបានយ៉ាងល្អ ជាមួយនឹងការនាំយកទង់ជាតិ និងវប្បធម៌ខ្មែរ បង្ហាញលើឆាកអន្តរជាតិ ។ ទោះបីជាមិនបានជោគជ័យពីការប្រកួត ប៉ុន្តែស្រីស្អាត ចន សុទីម៉ា បានយកឈ្នះនូវទឹកចិត្តប្រជាពលរដ្ឋខ្មែរតាមរយៈការបង្ហាញខ្លួនដ៏ល្អ និងពោរពេញទៅដោយសមត្ថភាពតំណាងកម្ពុជា នៅលើឆាកអន្តរជាតិនាពេលនេះ។
ជាការកត់សម្គាល់ អំឡុងពេលការប្រកួតនោះ ស្រីស្អាត ចន សុទីម៉ា បានបង្ហោះសារយ៉ាងដាក់ដោតមកដល់អ្នកគាំទ្រកម្ពុជាថា «កម្ពុជា ខ្ញុំបានតស៊ូធ្វើអស់ពីសមត្ថភាពហើយ ដើម្បីអ្នក ខ្ញុំស្រលាញ់អ្នក »។
គួរបញ្ជាក់ផងដែរថា សម្រាប់ម្ចាស់មកុដ Miss Universe 2023 បានទៅលើបវរកញ្ញាមកពីប្រទេស Nicaragua ខណៈលំដាប់រងទី១ បានទៅលើបវរកញ្ញាប្រទេសថៃ និងលំដាប់រងទី២ បានទៅលើបវរកញ្ញាមកពីប្រទេសអូស្ត្រាលី។
គួររំលឹកទៀតថា ៖ ស្រីស្អាត ចន សុទីម៉ា ធ្វើឲ្យមហាជនរំពឹងខ្លាំងពីភាពជោគជ័យ ក្រោយបង្ហាញឈុតតំណាងជាតិយ៉ាងលេចធ្លោ ៕
ចែករំលែកព័តមាននេះ